ސައީދުގެ މައްސަލައިގައި އޭސީސީން ބެލީ ވެރިކަން ބަދަލުވުމުން ސައީދުގެ އެމްޑީކަމުގައި ހިނގައިދިޔަ ކަންކަން އެކަނި ދައުވާ ކުރަން ފޮނުވަން: ޝަމީމް
ފެނަކަ ކުންފުނީގެ ކުރީގެ އެމްޑީ އަޙްމަދު ސަޢީދު 4 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކުރި
ޕްރޮސެކިއުޓަރ ޖެނެރަލް ހުސައިން ޝަމީމް
ފެނަކަ ކުރީގެ މެނޭޖިންގ ޑިރެކްޓަރ އަހުމަދު ސައީދު މުހައްމަދުގެ މައްސަލައިގައި އޭސީސީން ބަލާފައިވަނީ ސައީދުގެ އެމްޑީކަމުގައި ހިނގައިދިޔަ ކަންކަން ވެރިކަން ނިމުމުން ދައުވާ ކުރަން ފޮނުވަން ކަމަށް، ކުރީގެ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމުގެ އަމިއްލަ ބްލޮގުގައި ލިޔުއްވާފައިވާ ލިޔުމެއްގައި ވިދާޅުވެފައިވަނީ ފެނަކަ ކޯޕަރޭޝަންގެ ކޮރަޕްޝަންގެ މައްސަލައެއްގައި، އެ ކުންފުނީގެ ކުރީގެ އެމް.ޑީ އަޙްމަދު ސަޢީދު، 4 އަހަރު ދުވަހުގެ މުއްދަތަކަށް ޖަލަށްލުމަށް ކްރިމިނަލް ކޯޓުން ހުކުމް ކުރި ކަމަަށާއި، މިއީ، ބޭރުފުށުން ބަލާއިރު، ކޮރަޕްޝަނަ ދެކޮޅަށް ކުރިއަށް އެޅުނު ފިޔަވަޅެއް ނަމަވެސް، މައްސަލައިގެ ފުނަށް ފީނާ، އެ މައްސަލައިގައި ކަން ހިނގައިފައިވާ ގޮތަށް ބެލުމުން ފެންނަނީ އޭސީސީގެ ނާޤާބިލްކަމާއި ބަރުހެލިކަން ކަމަށް ޝަމީމު ލިޔުއްވާފައިވެއެވެ.
ބްލޭޒަން މައްސަލައިގައި ކަން ހިނގައިދިޔަގޮތް
- ސެޓްލްމަންޓް އެގްރީމެންޓުގައި ސޮއިކޮށްފައި އޮތީ 25 އެޕްރިލް 2019
- ކިތާބީ (ލިޔެކިޔުމުން ހުރި) ހެކިތަކުގައި ހުރީ 2017 ގެ 4 އިޢުލާނަކާއި 2018 ގެ 3 ލިޔުމަކާއި 2019 ގެ 10 ލިޔުމަކާއި 3 މެއި 2023 ގެ ތާރީޚެއް އޮތް ސިޓީއެއް
- 2019 ގައި ހުށަހެޅި، 2023 ވަނަ އަހަރުގެ މެއި މަހު، ތަޙްޤީޤަށް ބޭނުންވާ ހުރިހާ ލިޔުމެއް ހަމަވުމުންވެސް، އެމައްސަލަ ޕްރޮސިކިއުޝަނާ ހަމައަށް ފޮނުވަން 1 އަހަރާއި 7 މަސްދުވަސް ނަގާފައިވޭ
- 2023 ގައި އެ މައްސަލަ ޕީޖީ އޮފީހަށް ފޮނުވިނަމަ، ޕީޖީ އޮފީހަށް ޤާނޫނުން ލިބިދޭ 15 ދުވަސް ތެރޭގައި އެމައްސަލައިގައި ދަޢުވާ އުފުލުމުން، 2023 ވަނަ އަހަރުގެ ޖޫން މަހުގެ ތެރޭގައި އެމައްސަލަ ކޯޓަށް ހުށަހެޅޭނެ
ފެނަކަ ކޯޕަރޭޝަންގެ ކޮރަޕްޝަންގެ މި މައްސަލަ އެންޓި ކޮރަޕްޝަން ކޮމިޝަނަށް ހުށަހެޅި ތަޙްޤީޤު ފެށީ، އެމް.ޑީ.ޕީގެ ވެރިކަމުގައި އޮތް އިރުކަން ފާހަގަކުރައްވާ ޝަމީމް ވިދާޅުވީ އޭރު، އެމައްސަލައިގައި ތުހުމަތުކުރެވޭ އަޙްމަދު ސަޢީދު ހުންނެވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރު ކަމުގެ މަޤާމުގައި ކަމަށާއި، އެމައްސަލައިގެ ޝަރީޢަތް ނިމުނު ގޮތުގެ ރިޕޯޓަށް ބެލުމުން، އެމައްސަލައިގައި ހޯދަންޖެހޭ ހެކިންގެ ހެކިބަސްތައްވެސް އެމްޑީޕީ ވެރިކަމުގައި، އޭރުވެސް ލިބެންހުރިކަން އެނގޭ ކަމަށެވެ.
މީގެ އިތުރުން ތަޙްޤީޤުގައި އިތުރު ލިޔުންތަކެއް ހޯދާފައިވާކަމެއް، އަދި އެއިން ލިޔުމަކަށް ޝަރީޢަތުން އާދަޔާ ޚިލާފު ބަރުދަނެއް ދީފައިވާކަމެއް އެނގޭކަށް ނެތް ކަމަށާއި، ނަމަވެސް، އެ މައްސަލަ ދަޢުވާކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް ފޮނުއްވުނީ، އެމް.ޑީ،ޕީގެ ވެރިކަން ނިމި، މިހާރު މި އޮތް ސަރުކާރުގެ ވެރިކަމަށްވެސް އަހަރެއްހައި ދުވަސްވީ ފަހުން ކަމަށް ބުނެފައިވެއެވެ. އަދި އެ މައްސަލަ ކޯޓަށް ހުށަހެޅިފައި އޮތީ 24 ޑިސެމްބަރ 2024 ގައި ކަންވެސް ޝަމީމް ފާހަގަ ކުރެއްވިއެވެ.
މީގެ އިތުރުން، އަޙްމަދު ސަޢީދުގެ މައްސަލައިގެ ޝަރީޢަތް ނިމުނު ގޮތުގެ ރިޕޯޓަށް ބެލުމުން، އޭސީސީގެ ތަޙްޤީޤުގެ މިސްރާބުގައި ނުކިއްސަރުކަމެއް ހުރިކަން ސާފުވާ ކަމަށާއި، މުޅި މައްސަލައިގެ ވަށައިގެންވާ ކަންކަން ބެލުމުގެ ބަދަލުގައި އޭސީސީއިން ބެލީ އެމްޑީޕީ ވެރިކަމުގައި ހިނގި ބައި ނިންމައި، އެމްޑީޕީ ވެރިކަން ނިމުމުން، އެމައްސަލަ ދައުވާ ކުރަން ފޮނުވަން ކަމަށް ޝަމީމް ލިޔުއްވާފައިވެއެވެ. އެމައްސަލައިގައި ހާދިސާ ހިނގައިފައިވަނީ 2018 ވަނަ އަހަރުކަމަށްވާތީ، އޭރު އެމްޑީ ކަމުގެ މަޤާމުގައި ހުރި މީހާގެ މައްސަލަ ބަލާކަށް އޭސީސީއަކުން ނޫޅޭ ކަމަށް ވެސް ޝަމީމް ފާހަގަ ކުރައްވާފައިވެއެވެ.
އެއްވެސް ވެރިކަމެއްގެ ތެރޭގައި، އެ ވެރިކަމެއްގައި ހިނގާ މައްސަލައެއް ނުބެލުމުގެ ސިޔާސަތަކީ، އޭސީސީގެ މިދައުރުގެ ރައީސް ޚާއްޞަ ސަމާލުކަމެއް ދެއްވާ ސިޔާސަތެއް ކަމަށް ޝަމީމް ވިދާޅުވެފައިވެއެވެ. އަދި ކުރީ ސަރުކާރާބެހޭ ގޮތުން ޢަމަލުކުރެއްވި ގޮތަށް، މިއަދުގެ ސަރުކާރާބެހޭ ގޮތުން ހުށަހެޅޭ މައްސަލަތަކުގައި ވެސް އޭސީސީއިން ޢަމަލުކުރައްވަނީ ހަމަ މިއުޞޫލުން ކަމަށާއި، ނަމަވެސް، މިއީ، އޭސީސީ މަސައްކަތްކުރަންޖެހޭކަމަށް ޤާނޫނީ ނިޒާމު ތަޞައްވަރުކޮށްފައިވާ ހަމައެއް ނޫން ކަމަށް ޝަމީމް ވިދާޅުވިއެވެ. އަދި މިވަގުތު ފެންނަ މަންޒަރަކީ، ކޮރަޕްޝަންގެ މައްސަލަތައް އިތުރަށް ފުޅާވެ ކުރިއަރައިގެންދަނީ އެންޓި ކޮރަޕްޝަން ކޮމިޝަނުގެ މަސައްކަތްތައް ބަރުހެލިކަމުންނާއި، ކޮމިޝަންގެ ރައީސްގެ ޚާއްޞަ ސިޔާސަތުތަކުގެ ސަބަބުންކަމަށް ޝަމީމް ލިޔުއްވާފައިވެއެވެ.
