"ވާނުވާ" އަކީ މިހާރު ސިޔާސީ ވާހަކައެއް، އެކަން ޙައްލުކުރެވޭނީ ކޯޓުތަކަށް ވަސީލަތްތައް ދީގެން: ޝަމީމް
މައްސަލަ ކުރިއަށްދާނެ ގޮތުގެ ތާވަލެއް ދިނުމަށް ޕީޖީ އޮފީހުން އަބަދުވެސް ކޯޓުތަކުގައި އެދޭ
ޕްރޮސެކިއުޓަރ ޖެނެރަލް ހުސައިން ޝަމީމް
ޝަރީއަތް ނިމެންދެން ބަންދުކޮށް، "ވާނުވާ" ޖަހާފައި ތިބި މީހުންގެ މައްސަލަތަކަށް ޙައްލު ހޯދޭނީ ކޯޓުތަކަށް ބޭނުންވާ ވަސީލަތްތައް ދެވިގެންކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ޝަމީމް ވިދާޅުވީ، ވާނުވާގެ ވާހަކައަކީ މިހާރު ސިޔާސީ ބޭފުޅުން ސިޔާސީ ކަމެއްގެ ގޮތުގައި ދައްކަވާ ވާހަކައެއް ކަމަށެވެ.
އެހެންނަމަވެސް، ވާނުވާއަކީ މިހާރު އޮތް އެއްޗެއް ނޫންކަމަށް ޝަމީމް ވިދާޅުވިއެވެ.
ސަބަބަކީ މީހަކު ހައްޔަރުކުރާ ދުވަހުން ފެށިގެން އެމީހެއްގެ މައްސަލަ ތަޙްޤީޤު ނިންމާ ޕީޖީ އޮފީހަށް ފޮނުވާނެ މުއްދަތެއް ޖިނާއީ އިޖުރާއަތުގެ ޤާނޫނުގައި ބަޔާން ކޮށްފައިވާއިރު، ޤާނޫނުގެ ދަށުން ޝަރީޢަތް ކުރާނެ ގޮތުގެ ތާވަލު ދައުވާލިބޭ މީހާއަށް ލިބުމުން ބަންދުގެ "ވާނުވާ ވަންތަކަން" ގެއްލިގެންދާތީކަމަށް ޝަމީމް ކުރިންވެސް ވިދާޅުވެފައިވެއެވެ.
ޝަމީމް ވިދާޅުވާ ގޮތުގައި ދައުވާ އުފުލާ މީހުންނަށް އެމީހުންގެ މައްސަލަ ކުރިއަށްދާނެ ގޮތުގެ ތާވަލެއް ދިނުމަށް ޕީޖީ އޮފީހުން އަބަދުވެސް ކޯޓުތަކުގައި އެދެއެވެ.
އެހެންނަމަވެސް، މިހާރު މައްސަލަތައް ލަސްވެގެން ދިއުމުގައި ކޯޓުތަކުގެ ވަސީލަތްތައް ނެތުން ސަބަބެއްގެ ގޮތުގައި ހިމެނޭކަމަށް ޝަމީމް ވިދާޅުވިއެވެ.
ޝަމީމް ވިދާޅުވާ ގޮތުގައި ސިޔާސީ ފަރާތްތަކުންވެސް ވާނުވާގެ ވާހަކަ ދެއްކެވުމުގެ ބަދަލުގައި، ކޯޓުތަކަށް ފޯރުކޮށްދޭން ޖެހޭ ވަސީލަތްތައް ފޯރުކޮށްދީ، އެ މައްސަލަ ޙައްލު ކުރެވޭނެ ގޮތްތަކެއް ހައްދަވަން ޖެހެއެވެ.
މި މައްސަލައާ ގުޅޭގޮތުން ޝަމީމް ވިދާޅުވެފައިވަނީ ޝަރީއަތް ނިމެންދެން ގާތްގަނޑަކަށް 300 ވަރަކަށް މީހުން އަބަދުވެސް ބަންދުގައި ތިބޭ ކަމަށާއި، އެއީ 4 ބާވަތެއްގެ ކުށުގެ ތުހުމަތުގައި ހައްޔަރުކޮށްފައި ތިބޭ މީހުން ކަމަށެވެ.
4 ބާވަތުގެ ކުށަށް އިޝާރާތް ކުރައްވައި ޝަމީމް ވިދާޅުވީ އެއީ ކުޑަކުދިންނަށް ޖިންސީ ގޯނާ ކުރާ ކަމަށް ތުހުމަތުކުރެވޭ މީހުންނާއި، ޓެރަރިޒަމްގެ ކުށެއްގެ ތުހުމަތުގައި ތިބޭ މީހުންނާއި، މީހުން މެރުމުގެ ދައުވާކޮށްފައި ތިބި މީހުން އަދި ބޮޑެތި އަދަދުތަކުން މަސްތުވާތަކެތި ވިއްކާ ވިޔަފާރިކުރާ ކަމަށް ތުހުމަތުކުރެވޭ މީހުން ކަމަށެވެ. މިފަދަ މީހުން މުޖުތަމައުއަށް ދޫކޮށްލުމުން ބައެއް ފަހަރު ކުށް ތަކުރާރުވެފައިވާ ކަމަށް ޝަމީމް ވިދާޅުވިއެވެ.
