ބްލޮގަރ ޔާމީން ރަޝީދުގެ މަރުގެ މައްސަލައިގެ އިސްތިއުނާފު ޝަރީއަތް ދިވެހިރާއްޖޭގެ ހައިކޯޓުގައި ފަށައިފިއެވެ.
މި މައްސަލައިގައި ކުރި ޙުކުމުގައި ނިންމާފައިވަނީ އިސްމާއިލް ހައިޝަމާއި އަހުމަދު ޒިހާންގެ މައްޗަށް ކުށް ސާބިތުވާކަމަށާއި، ބާކީ ތިބި 4 މީހުންގެ މައްޗަށް ދައުލަތުން އުފުލާފައިވާ ދައުވާ ސާބިތުނުވާ ކަމަށެވެ.
މި މައްސަލައިގައި ކުށް ސާބިތުނުވާކަމަށް ނިންމި 4 މީހުންގެ ތެެރޭގައި ހިމެނޭ ހުސައިން ޒިޔާދުއާއި، ޙަސަން ޝިފާޒުގެ ބައި އިސްތިއުނާފު ކުރާ މިންވަރަށް ހެކި ލިބިފައެއް ނުވެއެވެ.
އެހެންކަމުން، ދައުލަތުން ހައިކޯޓުގައި އިސްތިއުނާފު ކުރީ މުހައްމަދު ދިފްރާނުއާއި، އިސްމާއީލް ރަޝީދުގެ ބައި އެކަންޏެވެ.
އަދި ކުށް ސާބިތުވި ދެ މީހުންކަމަށްވާ އިސްމާއިލް ހައިޝަމާއި އަހުމަދު ޒިހާންގެ ފަރާތުން އެ ޙުކުމްވެސް ހައިކޯޓުގައި އިސްތިއުނާފު ކުރިއެވެ.
ހައިކޯޓުގައި މި ދެ އިސްތިއުނާފުވެސް ކުރިއަށް ގެންދާނީ އެކުއެކީގައެވެ.
ހައިކޯޓުގައި މި މައްސަލައިގެ އިސްތިއުނާފީ ފުރަތަމަ އަޑުއެހުން ބާއްވާފައިވާއިރު، މި އަޑުއެހުމުގައި ހައިޝަމާއި ޒިހާންގެ ވަކީލުން ވަނީ އިސްތިއުނާފީ ނުކުތާތައް ހުށަހަޅުއްވާފައެވެ.
އިސްތިއުނާފީ ނުކުތާތަކަށް ބަލާއިރު، ސިއްރު ހެކިވެރިންގެ ހެކިބަހަށް ބުރަދަން ދީފައިވާ ގޮތާއި، އިންސާފުން ޝަރީއަތް ހިންގުމުގެ ހައްޤަށް އުނިކަން ލިބޭގޮތަށް ސިއްރު ހެކިވެރިންގެ ހެކިބަސް ނަގާފައިވުމާއި، ސިއްރު ހެކިވެރިންގެ ހެކިބަހުން ރުޖޫއަވާން އެދިފައިވަނިކޮށް އެކަމަށް ރިއާޔަތް ނުކޮށް އެ ހެކިބަސްތަކަށްވެސް ބުރަދަން ދީފައިވުން ފަދަ ނުކުތާތައް ހިމެނެއެވެ.
ހައިޝަމާއި ޒިހާންގެ ވަކީލުން ވަނީ ދަށު ކޯޓުގެ ޙުކުމް ބާތިލުކޮށް، ދަށު ކޯޓުން އަލުން މައްސަލަ ބެލުމަށް މި މައްސަލަ ތަހުވީލު ކޮށްދިނުމަށް އެދިފައެވެ.
ޝަރީއަތުގެ ވަގުތު ހަމަވުމުން ދިފްރާނުއާއި، އިސްމާއީލް ރަޝީދުގެ ބައި އެ އަޑުއެހުމުގައި ކުރިއަށް ގެންދެވިފައެއް ނުވެއެވެ. އެހެންކަމުން އެ ބައި ކުރިއަށްގެންދާނީ ދެން އޮންނަ އަޑުއެހުމެއްގައެވެ.
