ކުރީގެ ރައީސް އަބްދުﷲ ޔާމީން ހިޔަޅަކާ އެއްގޮތްކުރައްވައި މި ސަރުކާރުގެ ނައިބްވަޒީރަކު ކުރެއްވި ޓްވީޓެއް ރައީސް ޑރ މުޙައްމަދު މުއިއްޒު ރީޓްވީޓު ކުރެއްވި ވާހަކަ ނޫސްތަކުން ޖެހުމުން، ރީޓްވީޓް ޑިލިޓްކޮށްލައްވައިފިއެވެ.
މި ސަރުކާރުގެ ނައިބްވަޒީރަކު ލިޔެފައިވާ އެ ޕޯސްޓުގައި ބުނެފައިވަނީ ރައީސް ޔާމީން ޙުކުމުގެ ކުރިން ކެންޑިޑޭޓު ނެރެން ފުރުސަތު ދެއްވުމަށްފަހު ކަން ކުރައްވަން އުޅުއްވީ ވަރަށް "ހިޔަޅުކޮށް" ކަމަށާއި، ރައީސް ޔާމީނު އަސްލު އުޅުއްވީ ރައީސް މުއިއްޒު ޕީޕީއެމްއިން ވަކި ކުރައްވައި ޕްރައިމަރީން ބަލި ކުރައްވަން ކަމަށެވެ.
އެ ޓްވީޓު ރީޓްވީޓު ކުރެއްވުމަށްފަހު، ނޫސްތަކުން އެ ވާހަކަ ރިޕޯޓު ކުރަން ފެށުމުން ރައީސް ވަނީ ރީޓްވީޓް ޑިލީޓް ކޮށްލައްވާފައެވެ. އަންގާރަ ދުވަހުގެ 13:45 އާ ހަމައަށްވެސް ރައީސްގެ ރީޓްވީޓު ފެންނަން އޮތެވެ.
ރައީސް ރީޓްވީޓް ޑިލީޓް ކޮށްލެއްވިނަމަވެސް، ނައިބްވަޒީރުގެ ޕޯސްޓް އަދިވެސް ފެންނަން އެބައޮތެވެ.
ރައީސް ޔާމީނު ވަނީ މި ސަރުކާރަށް ބޮޑެތި ފާޑުކިޔުން އަމާޒު ކުރައްވާފައެވެ. އެގޮތުން ޔާމީނު ވިދާޅުވީ، ރައީސް ޑރ މުއިއްޒު އިތުރުފުޅު ހައްދަވާ ވާހަކަ މިއަދު ރައްޔިތުން ދައްކަމުންދާ ކަމަށެވެ.
އޭގެ އިތުރުން، ވެރިކަމަށް ވަޑައިގަންނަވާ ގޮތަށް ޔާމީނު މިނިވަން ކުރައްވާނެކަމަށް ވިދާޅުވަމުން ގެންދެވި ވާހަކަފުޅާ ގުޅިގެން މިއަދު ރައްޔިތުން ސުވާލު ކުރަމުންދާކަމަށް އެމަނިކުފާނު ވިދާޅުވިއެވެ.
ރައީސް ޔާމީނު ވިދާޅުވީ، އެމަނިކުފާނު މިނިވަން ކުރެއްވުމަށް ކުރައްވަންޖެހޭ މަސައްކަތް ކުރައްވާނެކަމަށް ރައީސް މުއިއްޒު ވިދާޅުވެފައިވާ ކަމަށެވެ.
އެހެންނަމަވެސް، އެކަމަށްޓަކައި ރައީސް މުއިއްޒު އެއްވެސް މަސައްކަތެއް ނުކުރައްވާ ކަމަށާއި، ކުރައްވާ ހަމައެކަނި ކަމަކީ އެމަނިކުފާނުގެ ޝަރީއަތް ލަސް ކުރެއްވުންކަމަށް ރައީސް ޔާމީނު ވިދާޅުވިއެވެ.
ރައީސް ޔާމީނު ވިދާޅުވާ ގޮތުގައި އެމަނިކުފާނުގެ ޝަރީއަތް ލަސްވަމުންދަނީ ސަރުކާރުގެ މަތީ ފަންތިން އަތް ބާނައިގެންކަމަށް މައުލޫމާތު ލިބިވަޑައިގަންނަވާފައިވާ ކަމަށެވެ.
