ބޭންކުން ބަޣާވަތް ކުރިިިކަމަށް ބުނާ މައްސަލައިގައި އަސްލު ތުހުމަތު ރައްދުވާ ފަރާތް ސާފުވާން ޖެހޭނެ: ޝަމީމް

ބޭންކުން ބަޣާވަތް  ކުރިިިކަމަށް ބުނާ މައްސަލައިގައި އަސްލު ތުހުމަތު ރައްދުވާ ފަރާތް ސާފުވާން ޖެހޭނެކަމަށް ކުރީގެ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

އަންގާރަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ޝަމީމް ވިދާޅުވީ، ފުލުހުންގެ ބަޔާނަށް ބަލާއިރު ތުހުމަތު ރައްދުވަނީ "ބޮޓްތަކަކަށް" ކަމަށް ބެލެވޭ ކަމަށާއި، ނަމަވެސް ސީދާ ތުހުމަތު ކުރެވޭ ފަރާތް ސާފެއް ނޫން ކަމަށެވެ.

މި މައްސަލައިގައި ތުހުމަތު ވަނީ ބޮޓު ތަކަށްތޯ، ސިޔާސީ ޕާޓީތަކަށްތޯ ނުވަތަ ނޫންތޯ ސާފުވާން ޖެހޭނެކަމަށްވެސް ޝަމީމް ވިދާޅުވިއެވެ.

އެކަންކަން ބޮޑަށް ސާފުވެގެންދާނީ ފުލުހުން އެކަންކަން ތަހުގީގުކޮށް ނިމުމުންކަމަށްވެސް ޝަމީމް ވިދާޅުވިއެވެ.

ޝަމީމް އިތުރަށް ވިދާޅުވީ، ކުރީގެ ޤާނޫނުލްއުޤޫބާތުގައި ދައުލަތާ ދެކޮޅު ހަރަކާތް ހިންގުމާއި، ފިތުނަ އުފެއްދުމާ ބެހޭ މާއްދާއެއް އޮންނަ ކަމަށެވެ.

ރުފިޔާ ކާޑުން ޑޮލަރު ނުލިބޭ ގޮތް ބޭންކް އޮފް މޯލްޑިވްސް (ބީއެމްއެލް) އިން ހެދުމާ ގުޅިގެން ސީދާ ބަޣާވާތެއް ހިންގަން އުޅުނު ކަމަށް ރައީސް ޑރ. މުހައްމަދު މުއިއްޒު  ވަނީ ވިދާޅުވެފައެވެ.

ޑޮލަރު ލިބުން ތާށިވެފައިވާތީ އެކަން ހައްލު ކުރުމަށް އެތައް މަޝްވަރާތަކެއް ސަރުކާރާ އެކު ބޭންކުން ކުރިކަމަށް އާދިއްތަ ދުވަހު ރައީސް އޮފީހުގައި އޮތް ނޫސް ކޮންފަރެންސްގައި ފިނޭންސް މިނިސްޓަރ މުހައްމަދު ޝަފީގު ވިދާޅުވި ނަމަވެސް، ސަރުކާރުން ބުނަމުން ދަނީ ބޭންކުގެ ނިންމުމަކީ ސަރުކާރުން ދިން ލަފަޔާ ދެކޮޅަށް ނިންމި ނިންމުމެއް ކަމަށެވެ.