ޔޫޓީއެފް އެއްބަސްވުން ރަނގަޅު، އެވާހަކަ ދެއްކީ އިދިކޮޅުން ރައްޔިތުންނަށް އޮޅުވާލާތީ: ހަސަން ލަތީފް
ޔޫޓީއެފްގައި ގައުމީ ސަލާމަތަށް ނުރައްކާވާވަރުގެ އެއްވެސް ކަމެއް ހިމެނިފައި ނުވޭ
އެމްޑީޕީގެ ޗެއަރ ޕަރސަން، ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފު
މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު"ގެ ނަމުގައި ގާއިމުކުރާ ކޯސްޓްގާޑް ބަނދަރާއި ސަރވިސް ޑޮކްޔާޑާއި ގުޅޭ އެއްބަސްވުމަކީ ނުހަނު ރަނގަޅު އެއްބަސްވުމެއް ކަމަށާއި، އެ އެއްބަސްވުމުގެ ވާހަކަ ދެއްކެވީ އިދިކޮޅުން ރައްޔިތުންނަށް އޮޅުވާލާތީކަމަށް އެމްޑީޕީގެ ޗެއަރ ޕަރސަން، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ޔޫޓީއެފް އެއްބަސްވުމުގައިވާ ކަންކަމުގެ މައުލޫމާތު ސަރުކާރުން ރައްޔިތުންނަށް ސާފުކޮށްދިނުމަކީ ބޭނުންތެރި ކަމެއް ކަމަށާއި، މި ސަރުކާރުން ފޮރުވައިގެން ކަންކަން ކުރަން ނޫޅޭކަން ރައްޔިތުންނަށް ސާފު ކޮށްދިނުމަކީ ބޭނުންތެރި ކަމެއްކަމަށް ހަސަން ލަތީފު ހޮނިހިރު ދުވަހު ކުރެއްވި ޓްވީޓެއްގައި ވަނީ ވިދާޅުވެފައެވެ. ހަސަން ލަތީފް ވަނީ އިންޑިއާގެ އެހީތެރިކަން ސަރުކާރުން ހޯދާ ގޮތްތަކުގެ މައުލޫމާތު ރައްޔިތުންނަށް ސާފު ކޮށްދިނުމަށް ސަރުކާރަށް ގޮވާލައްވާފައެވެ.
އެ ޓްވީޓަށް ރައްދު ދެއްވައި ދުވާފަރު ދާއިރާގެ އެމްޑީޕީ މެމްބަރު އިސްމާއީލް އަހުމަދު ވަނީ، 241 ކޮމިޓީގައި އިންނަވާ މެމްބަރެއްގެ ޙައިސިއްޔަތުން މެމްބަރު ހަސަން ލަތީފް ގާނޫނީ ޒިންމާ އަދާ ކުރެއްވުމަށް ގޮވާލައްވާފައެވެ. އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އިސްމާއީލް ވިދާޅުވީ، 241 ކޮމިޓީއަށް ޔޫޓީއެފް އެއްބަސްވުން ތަފްސީލީ ގޮތެއްގައި ބަލައި، ދިރާސާ ކުރުމަށް ފުރުސަތު ލިބިފައިވާ ކަމަށެވެ. އަދި އެ ހުރިހާ މައުލޫމާތެއް ލިބިވަޑައިގެން ހުންނަވައި، ސޯޝަލް މީޑިއާގައި އެގޮތަށް ވާހަކަ ދެއްކެވުމަކީ ކަންބޮޑުވެވަޑައިގަންނަވާ ކަމެއް ކަމަށް މެމްބަރު ވިދާޅުވިއެވެ.
މެމްބަރު އިސްމާއިލް ކުރެއްވި ޓްވީޓަށް ރައްދު ދެއްވައި ހަސަން ލަތީފް ވަނީ އެވާހަކަތައް ދައްކަވަނީ އެއްބަސްވުމާމެދު ސުވާލު އުފެދިގެން ނޫން ކަމަށް ވިދާޅުވެ، އެއްބަސްވުން ނުހަނު ރަނގަޅު ކަމަށް ވިދާޅުވެފައެވެ. އެހެންނަމަވެސް، އިދިކޮޅު ފަރާތްތަކުން ރައްޔިތުންނަށް އޮޅުވާލަން މަސައްކަތްކުރާއިރު، ކަންކަން އޮތް ގޮތް ކިޔާ ނުދެވޭނަމަ، އޮޅުވާލަން މަސައްކަތް ކުރާ ފަރާތްތަކަށް އެކަން ކުރުމަށް އިތުރަށް ފުރުސަތު ބޮޑުވެގެންދާނެކަން ހަސަން ލަތީފް ފާހަގަ ކުރެއްވިއެވެ.
މި މައްސަލައަށް މަޖިލީހުގައި ބަހުސް ކުރައްވަމުން މީގެ ކުރިން ހަސަން ވަނީ ބޮޑެތި ގައުމުތައް ވެސް އެހެން ގައުމުތަކުން އަސްކަރީ އެހީތެރިކަން ހޯދާ ކަމަށާއި، އެއީ އާ ކަމެއް ނޫން ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ 241 ކޮމިޓީއަށް، ޑިފެންސް މިނިސްޓަރ މާރިޔާ އަހުމަދު ދީދީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލްއާއި، ވައިސް ޗީފް އޮފް ޑިފެންސް ފޯސް އަބްދުއްރަޙީމް އަބްދުއްލަތީފް ވަޑައިގެން، ޔޫޓީއެފް އެއްބަސްވުން ކޮމިޓީގެ މެމްބަރުންނާ ވަނީ ހިއްސާ ކުރައްވާފައެވެ. އަދި އެއްބަސްވުމުގެ އަސްލު މެމްބަރުންނަށް ދައްކަވައި، އެއްބަސްވުމުގައި ހިމެނޭ މުހިއްމު ބައިތައް ވިދާޅުވުމުގެ ފުރުސަތުވެސް ދެއްވާފައިވާއިރު، އެމްއެންޑީއެފުން ވަނީ އެއްބަސްވުމުގައި ހިމެނޭ ކަންކަމާ ގުޅޭ ޕްރެޒެންޓޭޝަނެއްވެސް ކޮމިޓީ މެމްބަރުންނާ ހިއްސާ ކުރައްވާފައެވެ.
