ޗައިނާއިން އުތުރު ތިލަފަޅުގައި އިންވެސްޓް ކުރަަނީ ދަނޑުވެރިކަމަކަށް ނޫން، އެއީ އަސްކަރީ މަގުސަދެއްގައި ކުރާކަމެއް - ފައްޔާޒު

ޗައިނާއިން އުތުރު ތިލަފަޅުގައި އިންވެސްޓް ކުރަަނީ ދަނޑުވެރިކަމަށް ނޫން ކަމަށާއި، އެއީ އަސްކަރީ މަގުސަދެއްގައި ކުރާކަމެއް ކަމެއް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

އެމްޑީޕީން ބެއްވި ކޭމްޕޭން ހަރަކާތެއްގައި ވާހަކަ ދައްކަވަމުން ފައްޔާޒު ވިދާޅުވީ އުތުރު ތިލަފަޅުވަނީ 200 މިލިއަން ޑޮލަރަށް ވިއްކާލައިފަ ކަމަށާއި، ރިސޯޓް ހަދަން އެ ފަޅު ވިއްކާލައިފިނަމަ އެތަނަކީ 150 އާއި 200 މިލިއަން ޑޮލަރުގެ އެކުއެޒިޝަން ކޮސްޓް ލިބޭނެތަނެއް ކަމަށެވެ. އެތަން ރިސޯޓް ހަދަން ވިއްކާލާފައި ލިބޭ ލާރިން ރައީސް ޑރ. މުހައްމަދު މުއިއްޒަށް ދަނޑުވެރިކަން ކުރެވޭނެ ކަމަށް ފައްޔާޒު ވިދާޅުވިއެވެ.

ލ. އަތޮޅު ގަމުގައި ބޮޑެތި ބިންތައް އޮތް އިރު، ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ގެ ފޮނަދޫ އެބައޮތް ކަމަށާއި، ވަށަފަރު އަދި ކެލާފަދަ ބިންބޮޑު ރަށްތައް އެބަހުރި ކަމަށެވެ. ނަމަވެސް އުތުރުތިލަފަޅުން ބިމެއް ހިއްކައިގެން އެތަނުގައި ދަނޑުވެރިކަން ކުރަން އުޅޭ ސަބަބާއި މެދު ފައްޔާޒު ވަނީ ސުވާލު އުފައްދަވާފައެވެ.

ފައްޔާޒް ވިދާޅުވީ ރާއްޖޭގެ އިގްތިސާދީ ސަރަހައްދުގައި 3 މަސް ވަންދެން ޗައިނާގެ އަސްކަރީ އުޅަނދެއް، ރާއްޖޭގެ ކަނޑުގެ އަޑި އޮތްގޮތް ބަލަމުން ޗާޓް ހަދަމުންދިޔަ ކަމަށެވެ. އަދި ކުރީ ސަރުކާރުގައި އެގްރީމެންޓްތަކެއް ހަދާ ހާމަކަންބޮޑުގޮތެއްގައި ކުރިކަމެއް މިހާރު އެގްރީމެންޓެއް އޮތްކަމެއް ނެތްކަމެއް ވެސް ނޭނގި މަސައްކަތް ކުރަމުންދާ ކަމަށެވެ.

ފައްޔާޒް ވިދާޅުވީ އެ ނެގޭ މައުލޫމާތަށް ވަނީ ކިހިނެއް ކަމެއް ނޭނގޭ އިރު، ކުރިއަށް އޮތްތަނުގައި މި ސަރަހައްދުގައި ހަނގުރާމައަކާ ދިމާލަށް ދިއުމުގެ ނިޝާންތައް ފެންނަމުންދާ ކަމަށެވެ. އަދި މާ ދުރުގައި އޮތް ގައުމެއްގެ ބާރު މި ސަރަހައްދަށް ގެނެސް އިންޑިއާ ކަނޑުގެ ސަރަހައްދަށް ވައްދައިގެން، މުޅި އިންޑިއާ ކަނޑުގެ ސުލްހަ މަސަލަސްކަން ނަގާލަން މި ސަރުކާރުން މަސައްކަތް ކުރަމުންދާ ކަމަށެވެެ. މިއީ ބިރުވެރިކަމެއް ކަމަށް ފައްޔާޒު ސިފަކުރެއްވިއެވެ.

ފައްޔާޒު ވިދާޅުވީ 2028 ވަނަ އަހަރު އެމްޑީޕީން ވެރިކަމާއި ހަވާލުވެފައި އުތުރު ތިލަފަޅުގައި ކިތައްމެއް ގަހެއް އިންދާފައި އޮތަސް އެތަން މާލޭގެ ރައްޔިތުންނަށް ބޯހިޔާވަހިކަމަށް ދެއްވާނެ ކަމަށެވެ. އަދި އެތަނަށް ހަގީގަތުގައި ވެސް އިންވެސްޓެއް ކޮށްފައި އޮތްނަމަ އެކަން ރަނގަޅަށް ކުރެވޭނެ ބޮޑު ބިމެއް ދައްކާ އެކަން އެބޭފުޅުންނަށްވެސް އަންގާނެ ކަމަށެވެ.