"ޔޫޓީއެފް އެއްބަސްވުމުގައި، ގައުމީ ސަލާމަތަށް ނުރައްކާވާ ވަރުގެ ކަމެއް ނެތް"

އުތުރުތިލަފަޅު (ޔޫޓީއެފް) އެއްބަސްވުމުގައި ގައުމީ ސަލާމަތަށް ނުރައްކާވާ ވަރުގެ ކަމެއް ނެތްކަމަށް, ހިތަދޫ އުތުރު ދާއިރާގެ މެމްބަރު އަދި ރައްޔިތުންގެ މަޖިލީހުގެ 241 ކޮމިޓީގެ މުޤައްރިރު މުޙައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ 241 ކޮމިޓީއަށް، ޑިފެންސް މިނިސްޓަރ މާރިޔާ އަޙުމަދު ދީދީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލްއާއި، ވައިސް ޗީފް އޮފް ޑިފެންސް ފޯސް ޢަބްދުއްރަޙީމް ޢަބްދުއްލަޠީފް ވަޑައިގެން، ޔޫޓީއެފް އެއްބަސްވުން ވަނީ ކޮމިޓީގެ މެމްބަރުންނަށް ހިއްސާ ކުރައްވާފައެވެ. އަދި އެއްބަސްވުމުގެ އަސްލު މެމްބަރުންނަށް ދައްކަވައި، އެއްބަސްވުމުގައި ހިމެނޭ މުހިއްމު ބައިތައް ވިދާޅުވުމުގެ ފުރުސަތުވެސް ދެއްވާފައިވާއިރު، އެމްއެންޑީއެފުން ވަނީ އެއްބަސްވުމުގައި ހިމެނޭ ކަންކަމާ ގުޅޭ ޕްރެޒެންޓޭޝަނެއްވެސް ކޮމިޓީ މެމްބަރުންނަށް ހިއްސާ ކޮށްފައެވެ.

އޭގައި ގައުމީ ސަލާމަތަށް ނުރައްކާވާވަރުގެ އެއްވެސް ކަމެއް ހިމެނިފައި ނުވާކަމަށް އަސްލަމް ވަނީ ވިދާޅުވެފައެވެ.

އަސްލަމް އެހެން ވިދާޅުވެފައިވާއިރު، ޔޫޓީއެފް އެއްބަސްވުމުގައިވާ ކަންކަމުގެ މައުލޫމާތު ސަރުކާރުން ރައްޔިތުންނަށް ސާފު ކޮށްދިނުމަކީ ބޭނުންތެރި ކަމެއް ކަމަށާއި، މި ސަރުކާރުން ފޮރުވައިގެން ކަންކަން ކުރަން ނޫޅޭކަން ރައްޔިތުންނަށް ސާފު ކޮށްދިނުމަކީ ބޭނުންތެރި ކަމެއްކަމަށް އެމްޑީޕީގެ ޗެއަރ ޕަރސަން، ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފު ހޮނިހިރު ދުވަހު ކުރެއްވި ޓްވީޓެއްގައި ވަނީ ވިދާޅުވެފައެވެ.

އޭނާ ވަނީ، އިންޑިއާގެ އެހީތެރިކަން ސަރުކާރުން ހޯދާ ގޮތްތަކުގެ މައުލޫމާތު ރައްޔިތުންނަށް ސާފު ކޮށްދިނުމަށް ސަރުކާރަށް ގޮވާލައްވާފައެވެ.

އެ ޓްވީޓަށް ރައްދު ދެއްވައި ދުވާފަރު ދާއިރާގެ އެމްޑީޕީ މެމްބަރު އިސްމާޢީލް އަޙުމަދު ވަނީ، 241 ކޮމިޓީގައި އިންނަވާ މެމްބަރެއްގެ ޙައިސިއްޔަތުން މެމްބަރު ޙަސަން ލަޠީފް ޤާނޫނީ ޒިންމާ އަދާ ކުރެއްވުމަށް ގޮވާލައްވާފައެވެ. އަދި އޭނާ ކުރެއްވި ޓްވީޓުގެ ވާހަކަަތައް ބޭރުގެ މީޑިއާއަކުން ރިޕޯޓު ކޮށްފައިވާ ލިއުމެއް ހިއްސާ ކުރައްވައި މެމްބަރު އިސްމާޢީލް ވަނީ، އަސްލު މަގުސަދަކީ އެއީކަމަށް ވިދާޅުވެފައެވެ.

އެކަމާގުޅޭގޮތުން ރާއްޖެއެމްވީން ސުވާލު ދެންނެވުމުން އިސްމާޢީލް ވިދާޅުވީ، 241 ކޮމިޓީން ޔޫޓީއެފް އެއްބަސްވުން ތަފްސީލީ ގޮތެއްގައި ބަލައި، ދިރާސާ ކުރުމަށް ފުރުސަތު ލިބިފައިވާ ކަމަށެވެ. އަދި އެ ހުރިހާ މައުލޫމާތެއް ލިބިވަޑައިގެން ހުންނަވައި، ސޯޝަލް މީޑިއާގައި އެގޮތަށް ވާހަކަ ދެއްކެވުމަކީ ކަންބޮޑުވެވަޑައިގަންނަވާ ކަމެއް ކަމަށް މެމްބަރު ވިދާޅުވިއެވެ.

އެކަމާ ގުޅިގެން މެމްބަރު ޙަސަން ލަޠީފަށް ގުޅާލުމުން ފޯނަށް ޖަވާބު ދެއްވާފައެއް ނުވެއެވެ. އެހެންނަމަވެސް މި މައްސަލައަށް މަޖިލީހުގައި ބަހުސް ކުރައްވަމުން މީގެ ކުރިން ޙަސަން ވަނީ އިދިކޮޅު ސިޔާސީ ފަރާތްތަކަށް ރައްދުވެސް ދެއްވާފައެވެ. އެގޮތުން އޭނާ ވިދާޅުވީ، ޑޮކްޔާޑަކީ ދިވެހިންގެ މިލްކެއް ކަމަށެވެ. އަދި އިންޑިއާ ކަނޑުގައި ފިނި ހަނގުރާމައެއް ކެކެމުން އަންނަ މަންޒަރު އެބަފެންނަކަން ފާހަގަ ކުރައްވައި މެމްބަރު ވިދާޅުވީ، ބޮޑެތި ގައުމުތައް ވެސް އެހެން ގައުމުތަކުން އަސްކަރީ އެހީތެރިކަން ހޯދާ ކަމަށާއި، އެއީ އާ ކަމެއް ނޫން ކަމަށެވެ.

އޭގެ އިތުރުން ދައުލަތަށް ގެއްލުންވާފަދަ ކަމެއް މި ސަރުކާރުން ނުކުރާނެ ކަމަށާއި، މިއީ ކުރީގެ ސަރުކާރުތަކުން ވެސް ކުރިއަށްގެންދިޔަ މަޝްރޫޢެއްކަން ކޮމިޓީގައިވެސް މެމްބަރުން ވަނީ ފާހަގަކޮށްފައެވެ.

އެމްއެންޑީއެފް ކޯސްޓްގާޑުގެ އުޅަނދުފަހަރު ބަނދަރު ކުރުމާއި ޑޮކްކޮށް ބެލެހެއްޓޭނެ އެކަށޭނަ ވަސީލަތެއް ގާއިމު ކުރުމުގެ އެހީތެރިކަމަށް އިންޑިޔާ ސަރުކާރުގައި އޭރުގެ ސަރުކާރުން އެދުނީ  2013 ވަނަ އަހަރުއެވެ. އެއަށްފަހު އެޕްރީލް 2016ގައި ރައީސް ޔާމީނު އިންޑިޔާއަށް ކުރެއްވި ދަތުރުފުޅުގައި، ޑިފެންސް ކޯޕަރޭޝަން އެއްބަސްވުމުގައި އިންޑިޔާއާއެކު ސޮއިކުރެއްވިއެވެ. އެހެންނަމަވެސް، އުތުރުތިލަފަޅުގައި ޑޮކްޔާޑަކާއި ހާބަރެއް ހެދުމުގެ ނަމުގައި އިންޑިޔާ ސިފައިންނަށް ގާއިމުވެ ތިބެވޭ ގޮތަށް ހަދާ އެއްބަސްވުން ހާމަކުރުމަށާއި، އިންޑިޔާއިން ނަގާފައިވާ ލޯނުތަކުގެ ތަފުސީލު ހާމަކުރަން ގޮވާލައި އިދިކޮޅު ފަރާތްތަކުން ދަނީ އެކަމުގެ ހަގީގަތް އޮޅުވާލުމަށް ގިނަ ވާހަކަތަކެއް ދައްކަމުންނެވެ.

ރާއްޖޭގެ ކޯސްޓް ގާޑުގެ ކެރިކުޅަދާނަކަން އިތުރުކުރުމަށްޓަކައި މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު"ގެ ނަމުގައި ގާއިމުކުރާ ކޯސްޓްގާޑް ބަނދަރާއި ސަރވިސް ޑޮކްޔާޑުގައި، ބޭރުގެ އަސްކަރީ އެއްވެސް ބަޔަކު ނުތިބޭނެކަމުގެ ޔަގީންކަން ސިފައިން ވެސް ވަނީ ދީފައެވެ. ދިވެހި ސިފައިން ބުނެފައިވަނީ މި ބަނދަރުގައި ތިބޭނީ ދިވެހި ސިފައިންނާއި ދިވެހި މުވައްޒަފުން ކަމުގައެވެ. މި ބަނދަރަކީ ރާއްޖޭގެ ކޯސްޓްގާޑުގެ އުޅަނދުތައް ބަނދަރުކޮށް މަރާމާތުކުރުމަށް ހަދާ ތަނެއްކަމަށާއި، ބޭރުގެ އަސްކަރީ އެއްވެސް ބަޔަކު ގާއިމުވެގެން ނުތިބޭނެކަން ވެސް ސިފައިން ފާހަގަކޮށްފައިވެއެވެ.