އިންޑިއާއާއެކު ވެފައިވާ އެއްބަސްވުންތަކަކީ ކުރީ ސަރުކާރުން ގޮތް ނިންމާފައިވާ އެއްބަސްވުންތަކެއް ކަމަށާއި، މިސަރުކާރުން ގެނައި ބަދަލާއެކު އެ އެއްބަސްވުންތަކުގައި ލުއި ލިބިފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.

ރިޔާސީ އިންތިހާބުގެ ދެވަނަ ބުރުގެ މަސައްކަތްތަކާއި ގުޅޭ މަޝްވަރާ ބައްދަލުވުމަށްފަހު ސޯލްޓް ކެފޭއިން ނުކުމެވަޑައިގެން ނޫސްވެރިންނާއި ބައްދަލުކުރައްވާ، އިންޑިއާ ސިފައިން ތިބޭ ވާހަކައާއި ސިއްރު އެއްބަސްވުންތަކާއި ގުޅިގެން ދެކެވޭ ވާހަކައަށް ރައީސް ވިދާޅުވީ އެ ވާހަކަ ވަރަށް ސާފުކޮށް އެތައް ފަހަރަކު ދައްކަވާފައިވާނެ ކަމަށާއި، ރާއްޖެއާއި އިންޑިއާ ދޭތެރޭގައި، ރާއްޖޭގެ ސަލާމަތާއި، މިނވަންކަމަށް ފުށޫ އަރާކަހަލަ އެއްވެސް އެގްރީމެންޓެއް ނޯންނާނެ ކަމަށެވެ. އަދި އެގްރީމެންޓް ހާމަނުކުރަނީ ދެފަރާތުގައި ވެވޭ އެއްބަސްވުމުގައި ހާމަނުކުރެވޭ ކަންކަން ހުންނާނެތީ ކަމަށާއި، ނަމަވެސް ދެވެން ހުރި ހުރިހާ މައުލޫމާތެއް 241 ކޮމިޓީއަށް ދީފައިވާނެ ކަަމަށެވެ. އަދި ޑިފެންސުން ވެސް އެފަދަ އެއްވެސް ކަމެއް ނެތްކަމަށް ވިދާޅުވެފައިވާނެ ކަމަށެވެ.

ރައީސް ވިދާޅުވީ އެގްރީމެންޓްތަކަށް އިތުރުގޮތެއް ހަދާފައި ނުވާނެ ކަމަށާއި، ފަހުން ގެނައި ބަދަލުތަކުގެ ސަބަބުން އެކަމަށް ލުއިތަކެއް ލިބިފައިވާނެ ކަމަށެވެ.

އިންޑިއާގެ އުނގަށް ވެއްޓިފައިވާނެ ކަމަށް ދެކެވޭ ވާހަކަތާއި ގުޅިގެން ރައީސް ވިދާޅުވީ، ރާއްޖޭގެ ހާރިޖީ ސިޔާސަތަކާއި އެއްބަސްވެވޭ އަދި އެއް ލައިނެއްގައި މަސައްކަތް ކުރެވޭނެ ހުރިހާ ގައުމަކާއެކީގައި މަސައްކަތް ކުރާކަމަށެވެ. އެގޮތުން 180 އެތައް ގައުމަކާއެކީގައި ގުޅުން ބަދަހި ކޮށްފައިވާ ކަމަށެވެ.

ރައީސް ވިދާޅުވީ އިންޑިއާ ފަސްޓްޕޮލިސީ އަކީ ކުރީ ސަރުކާރުތަކުގައިވެސް ނަގަހައްޓާފައިވާ ޕޮލިސީއެއް ކަމަށެވެ.