ޤައުމީ ދިފާއީ ބާރަށް އަމާޒުކޮށް ދޮގު ވާހަކަތައް ފަތުރާކަމަށްވާނަމަ ފިޔަވަަޅު އަޅާނަން: މޭޖަރ ޖެނެރަލް އަބްދުﷲ ޝަމާލް

ޤައުމީ ދިފާއީ ބާރަށް އަމާޒުކޮށް ދޮގު ވާހަކަތައް ފަތުރާކަމަށްވާނަމަ ފިޔަވަަޅު އަޅާނެ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.

އުތުރު ތިލަފަޅުގެ އެއްބަސްވުމާ ގުޅޭގޮތުން އެކި ޕްލެޓްފޯމްތަކުގައި ފަތުރަމުންދާ ދޮގު ވާހަކަތަކާ ގުޅޭގޮތުގެ ތަފްސީލް ހާމަކުރުމަށް އަންގާރަ ދުވަހު މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަމާލް ވިދާޅުވީ އެގޮތަށް ދޮގު ވާހަކަތައް ފަތުރާކަމަށްވާނަމަ އެކަން ވަރަށް ސީރިއަސް ކަމެއްގެ ގޮތުގައި ނަގާނެ ކަމަށެވެ. އަދި މިހާރު ވެސް އެ ފަރާތްތަކާމެދު ފިޔަވަޅު އެޅޭނެ ގޮތްތައް ބަލަމުންދާ ކަމަށް ޝަމާލް ފާހަގަކުރެއްވިއެވެ.

ޝަމާލް ވިދާޅުވީ ރާއްޖޭގެ އިސްތިޤްލާލާއި، ސިޔާދަތާއި، މިނިވަންކަން ހިފެހެއްޓުމަށްޓަކައި ދިވެހި ސިފައިން ސާބިތުކަންމަތީގައި ތިބޭނެ ކަމަށާއި، އެކަންތައްތަކަށް ޒައްރެއްގެ މިންވަރަށް ވެސް ކޫރުމެއް އެޅުމަށް ސިފައިން ފުރުސަތެއް ނުދޭނެ ކަމަށެވެ.

މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޭޝަނަލް ކައުންޓަރ ޓެރަރިޒަމް ސެންޓަރުގެ ޑައިރެކްޓަރ ޖެނެރަލް އަދި ބްރިގޭޑިއަރ ޖެނެރަލް ޒަކަރިއްޔާ މަންސޫރު ވިދާޅުވީ އުތުރު ތިލަފަޅުގެ އެއްބަސްވުމާ ގުޅޭގޮތުން ދިވެހި އަސްކަރިއްޔާ ބަދުނާމުވާގޮތަށް ވާހަކަ ދައްކައި، ރައްޔިތުންގެ އިތުބާރު އަސްކަރިއްޔާގެ މައްޗަށް ގެއްލޭ ގޮތަށް ވާހަކަ ދެއްކެވިޔަސް އެކަން އެގޮތަށް ނުވާނެ ކަމަށެވެ. އަދި އަސްކަރިއްޔާ އަކީ ކުޅޭ ކުޅޭ ތަނެއްގެ ގޮތުގައިނުހެދުމަށާއި, އެއްވެސް ބައެއްގެ ކުޅިވަރު މައިދާނަކަށް ނުހެދުމަށް އޭނާ ވަނީ އެދިވަޑައިގެންފައެވެ.

ޔޫޓީއެފްގެ އެގްރީމެންޓްގެ ދަށުން ގާއިމުކުރުމަށް ހަމަޖެހިފައިވަނީ ކޯސްޓް ގާރޑް ބަނދަރަކާއި، ސަރވިސް ޑޮކް ޔާރޑެކެވެ. މި ޚިދުމަތްތައް ގާއިމުކުރުމަށް މަސައްކަތްކުރާތާ އެތައް އަހަރެއް ފަހުން މިކަން ހަގީގަތަކަށްވުން އެއީ ގައުމީ ދިފާއީބާރަށް ލިބޭ ބޮޑު ކުރިއެރުމެއްގެ ގޮތުގައި ދިވެހި އަސްކަރިއްޔާއިން ފާހަގަކުރެއެވެ.

ރާއްޖޭގެ ކޯސްޓް ގާޑުގެ ކެރިކުޅަދާނަކަން އިތުރުކުރުމަށްޓަކައި މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު" ގެ ނަމުގައި ގާއިމްކުރާ ކޯސްޓްގާޑް ބަނދަރާއި ސާރވިސް ޑޮކްޔާޑުގައި ބޭރުގެ އަސްކަރީ އެއްވެސް ބަޔަކު ނުތިބޭނެކަމުގެ ޔަގީންކަން ދިވެހި ސިފައިން ވަނީ ދީފައެވެ. ދިވެހި ސިފައިން ބުނެފައިވަނީ މި ބަނދަރުގައި ތިބޭނީ ދިވެހި ސިފައިންނާއި ދިވެހި މުވައްޒަފުން ކަމުގައެވެ. އެ ބަނދަރަކީ ރާއްޖޭގެ ކޯސްޓްގާޑުގެ އުޅަނދުތައް ބަނދަރުކޮށް މަރާމާތުކުރުމަށް ހަދާ ތަނެއްކަމަށާއި، ބޭރުގެ އަސްކަރީ އެއްވެސް ބަޔަކު ގާއިމުވެގެން ނުތިބޭނެކަން ވެސް ސިފައިން ފާހަގަކޮށްފައިވެއެވެ.

އޭގެ އިތުރުން، ކޯސްޓްގާޑް ބަނދަރާއި ޑޮކްޔާޑަކީ 2013 ވަނަ އަހަރުން ފެށިގެން ކުރެވުނު މަސައްކަތަށްފަހު، 2016 ވަނަ އަހަރުގެ އެޕްރީލް މަހު ކުރީގެ ރައީސް ޔާމީން އިންޑިއާއަށް ކުރެއްވި ދަތުރުފުޅުގައި ސޮއިކުރެވުނު ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަނުގެ ތެރޭގައި ވެސް ހިމެނޭ ކަމެކެވެ.

ދެ ފިޔަވައްސަަކަށް ބަހާލައިގެން ކުރިއަށްގެންދާ މި ޕްރޮޖެކްޓްގެ މަސައްކަތް ނިންމުމަށް އޮތީ 3 އަހަރެވެ. އެގްރީމެންޓްގެ މުއްދަތަކީ 15 އަހަރެވެ.