ޑީކޯވާ މީހުންނަށް ފަރުވާދެވޭނެ ފެސިލިޓީއެއް ކަނޑިންމަ ރިސޯޓުގައި ގާއިމްކޮށްފި
ރާއްޖޭގައި މިވަގުތު ހުރީ 4 ޑީކޮމްޕްރެޝަން ފެސިލިޓީ
ކަނޑިންމަ ރިސޯޓުގައި ގާއިމްކޮށްފައިވާ ފެސިލިޓީ
ފީނުމުގެ ތެރޭގައި ޑީކޯވާ މީހުންނަށް ފަރުވާދޭ ޑީކޮމްޕްރެޝަން ޗެމްބަރެއް ދ. އަތޮޅު ކަނޑިންމަ މޯލްޑިވްސް ރިސޯޓުގައި ބަހައްޓައިފިއެވެ.
ކަނޑިންމަ ރިސޯޓުގައި ގާއިމްކުރެވުނު މި ޗެމްބަރާއެކު މިވަގުތު ރާއްޖޭގެ 4 ސަރަހައްދެއްގައި ޑީކޮމްޕްރެޝަން ޗެމްބަރު ވަނީ ގާއިމްކުރެވިފައެވެ. މި ފެސިލިޓީ އޮޕަރޭޓްކުރުމުގެ މަސައްކަތްކުރަނީ ރާއްޖޭގައި މިވަގުތު ހުރި މި ދާއިރާގެ އެންމެ ތަޖުރިބާކާރު އެކަކު ކަމުގައިވާ އަލީ ޒުބައިރެވެ.
ޒުބައިރު ފާހަގަކުރި ގޮތުގައި އެ ސަރަހައްދުގައި މީގެ ކުރިން މިފަދަ ފެސިލިޓީއެއް ނެތުމުން ޑީކޯވާ ޑައިވަރުން ގެންދަންޖެހެނީ މާލެ އަތޮޅަށް، ނޫނީ މި ޚިދުމަތް ގާއިމްކުރެވިފައިހުރި އެހެން ރިސޯޓަކަށެވެ. ދ. އަތޮޅާއި އެ އަތޮޅު ކައިރީގައި ވެސް މިފަދަ ފެސިލިޓީއެއް ގާއިމުވެފައި ނެތުމުން މީގެ ކުރިން ޑީކޯވެގެން ގިނަ ބަޔަކު މަރުވުމުގެ ހާދިސާތަކާ ވެސް ކުރިމަތިލާންޖެހިފައިވާކަން އޭނާ ފާހަގަކުރިއެވެ.
މި ފެސިލިޓީގައި ހަރަކާތްތެރިވާ ޑައިވިން ޑޮކްޓަރެއް ކަމަށްވާ ޑރ. ޖޮހެނާ ބުނި ގޮތުގައި މި ފެސިލިޓީގެ ސަބަބުން ޑީކޯވާ ޑައިވަރުންގެ ފުރާނަ ސަލާމަތްކުރުމަށް އިތުރަށް ފަސޭހަވެގެންދާނެ ކަމަށެވެ. ޑީކޯވާ މީހުން ވައިގެ މަގުން އެއް ތަނުން އަނެއް ތަނަށް ގެންދިއުމަކީ ރައްކާތެރި ކަމެއް ނޫން ކަމަށާއި، އެމީހުންނަށް ވީހާވެސް އަވަހަކަށް ފަރުވާ ދިނުން ވަރަށް މުހިންމު ކަމަށް ޖޮހެނާ ބުނެފައިވެއެވެ.
މި ފެސިލިޓީން ޑައިވަރުންގެ އިތުރުން ޑިކޯވާ މަސްވެރިންނަށް ވެސް ފަރުވާދެވޭނެއެވެ. އެމީހުންގެ ފަރުވާގެ ހުރިހާ ކަމެއް ކަވަރ ކުރާނީ ޑައިވިން އިންޝުއަރެންސުންނެވެ.
ޑީކޯވާ މީހުންނަށް ދޭންޖެހޭ އަވަސް ފަރުވާ ނުދެވި، އެތައް ބަޔަކު ވަނީ މަރުވެފައެވެ. މިގޮތުން މި ފަހަކުން އެންދަމަން ފޭބި މީހަކު ވެސް ޑީކޯވިއެވެ. އަދި ޑައިވަރެއް ވެސް ޑީކޯވެ ފަރުވާ ނުދެވި ވަނީ މަރުވެފައެވެ.
