ޖުމްހޫރިއްޔާ ވަރުގަދަކުރަން އިތުރު މަސައްކަތް ކުރަންޖެހޭ - އެމްއާރްއެމް

ރާއްޖޭގެ ޖުމްހޫރިއްޔާ ވަރުގަދަ ކުރުމަށް އަދިވެސް ކުރަން ޖެހިފައިވާ މަސައްކަތްތައް މުހިންމު ވެފައި ގިނަގުނަ ކަމަށް މޯލްޑިވްސް ރިފޯމް މޫވްމަންޓުން ބުނެފިއެވެ.

ރާއްޖޭގެ ޖުމްހޫރީ ދުވަހުގެ މުނާސަބާއާ ގުޅުވައި އެ ޕާޓީން ނެރުނު ބަޔާނެއްގައި ބުނެފައިވަނީ ރާއްޖޭގެ ޖުމްހޫރީ ހަޔާތުގައި މި ވޭތުވެގެން ދިޔަ ދިގު މުއްދަތުގެ ތެރޭގައި ތަފާތު އިމްތިހާންތަކާ ރާއްޖެއިން ކުރިމަތިލާން ޖެހުނު ކަމަށެވެ. އެގޮތުން ރާއްޖޭގެ ފުރަތަމަ ޖުމްހޫރިއްޔާ ކުރު މުއްދަތެއްގެ ތެރޭގައި ނިމިގެން ދިޔަ ދިޔުމާއި ދެވަނަ ޖުމްހޫރިއްޔާއެއް ގާއިމުކުރަން ޖެހުނު ސަބަބުތަކާއި އެ ނިޒާމް ނިމެން މެދުވެރިވި ސަބަބު ތަކާއި ރިޔާސީ ނިޒާމު ހަރުދަނާ ކުރުމަށް ކުރެވުނު މަސައްކަތްތަކާއި ޒަމާނީ މަލްޓި ޕާޓީ ޑިމޮކްރަސީ އެއް ހޯދުމަށް ރައްޔިތުން ކުރި މަސައްކަތާއި އޭގެ ފަހުން ހިނގައި މިދިޔަ 13 ވަރަކަށް އަހަރުގެ ތެރޭގައި ކަން ހިނގަމުން މިދާ ގޮތް ހިމެނޭ ކަމަށެވެ. މިކަންކަމުން ހާމަ ވެގެން ދާ އެއްކަމަކީ ރާއްޖޭގެ ޖުމްހޫރިއްޔާ ވަރުގަދަ ކުރުމަށް އަދިވެސް ކުރަން ޖެހިފައިވާ މަސައްކަތްތައް މުހިންމު ވެފައި ގިނަގުނަ ކަން ކަމުގައެވެ.

Advertisement

ޖުމްހޫރީ ދުވަސް ބައްދަލު ކުރިއިރު، ކޮވިޑް-19 ވަނީ މުޅި ދުނިޔޭގައި ފެތުރިފައި ކަމަށާއި، މިހާރުވެސް ރާއްޖޭގެ އެކި ކަންކޮޅުގައި މިބަލި އިތުރަށްފެތުރެމުންދާ ކަމުގައެވެ. އެހެންކަމުން، މި ބަލިންރައްކާތެރިވެ ތިބުމަށްޓަކައި އަޅުގަނޑުމެންގެ ފަރުދީ ޒިންމާ އަދާކުރުމަށް މިއަދުވެސް އަޅުގަނޑުމެން ޢަޒުމު ވަރުގަދަކުރަންޖެހެއެވެ.

ޖުމްހޫރީ ދުވަހުގެ މި މުނާސަބު ދަނޑިވަޅުގައި ހަނދާން ބަހައްޓަން ޖެހޭ ކަންކަމުގެތެރޭގައި، ޤައުމީ ޙަޔާތުގައި ރައްޔިތުންގެ ބައިވެރިވުން އިތުރުކޮށް ބާރުވެރި ކުރުވަން ޖެހޭ ކަމަށެވެ. އެކަކު އަނެކަކަށް އިޙްތިރާމްކުރާ އަދި އިތުބާރު ކުރާ މުޖުތަމަޢެއް ޤާއިމު ކުރުމާއި، ޙައްޤުތައް ކަށަވަރު ކޮށްދިނުމާއި، ދައުލަތުގެ މުއައްސަސާތައް ވަރުގަދަކުރަން ޖެހޭ ކަމަށެވެ. އަދި ދިވެހިރާއްޖެ ތަރައްޤީ ކުރުމުގައާއި، ރައްޔިތުންނަށް ކުރިއެރުން ގެނައުމުގައި ރައްޔިތުން އިންތިޚާބުކުރާ ވެރިއަކު ހުރުމުގެ ފައިދާ ދިވެހީން ދެކެފައިވާ ކަމުގައި ބަޔާނުގައި ބުނެފައިވެއެވެ.