ކޯނޭ ލިފްޓްގެ ޓަޗްލެސް ސިގްނަލައިޒޭޝަން އެސްޓީއޯއިން ތައާރަފްކޮށްފި
މީގެ ސަބަބުން ކޮވިޑް ފެތުރުން މަދުކުރެވިގެންދާނެ
ކޯނޭ ޓަޗްލެސް ސިގްނަލައިޒޭޝަން ލިފްޓް
ކޯނޭ ލިފްޓްގެ ޓަޗްލެސް ސިގްނަލައިޒޭޝަން އެސްޓީއޯއިން ތައާރަފްކޮށްފިއެވެ.
އެސްޓީއޯ އިން އެތެރެކުރާ "ކޯނޭ" ލިޕްޓް ބްރޭންޑަކީ ޒަމާނީ ހޯދުންތަކަށް ބިނާކޮށް ތަފާތު އެކި އީޖާދުތަކާއެކު މާކެޓަށް ތައާރަފްކުރަމުންދާ، ދުނިޔޭގައި އެންމެ ނަން ހިނގާ އެއް ބްރޭންޑެވެ. މިގޮތުން ކޯނޭއިން އެންމެ ފަހުން ތައާރަފްކޮށްފައިވާ މޮޑެލްގެ ސީ.އޯ.ޕީ (ލިފްޓް ޕުޝް ބަޓަންސް) އަކީ ލިފްޓުގެ އެއްވެސް ފިތެއްްގައި އަތްނުލައި، ހަމައެކަނި އަތްތިލަ ކައިރި ކޮށްލުމުން ބޭނުންވާ ފްލޯއަކަށް ދެވޭ ގޮތަށް ފަރުމާ ކުރެވިފައިވާ މޮޑެލްއެކެވެ.
ދުނިޔޭގެ މިހާރު ހާލަތަށް ބަލާއިރު މިއީ ވަރަށް މުޙިއްމު އީޖާދެކެވެ. ލިފްޓްގެ ފިތްތަކަކީ ވަރަށް ގިނަ މީހުން އަތްލާ އެއްޗަކަށް ވުމާއެކު، ޓަޗްލެސް ސީއޯޕީއާއެކު އެއް ލިފްޓެއް ބޭނުންކުރާ ގިނަ ފަރާތްތަކުގެ މެދުގައި ކޮވިޑް ފެތުރޭ މިންވަރު ވަރަށް ބޮޑަށް މަދުކުރެވިގެންދާނެއެވެ. މިއީ ލިފްޓް ބޭނުންކުރާ ފަރާތްތަކަށް އިތުރު ހިތްހަމަ ޖެހުމަކަށް ވާނެ ކަމެއް ވެސް މެެއެވެ.
މީގެ އިތުރުން އެސްޓީއޯއިން ވަނީ، މިހާރު ކުރިމަތިވެފައިވާ ބަލިމަޑުކަމުގެ ހާލަތަށް އެކަށީގެންވާ ގޮތަށް، ލިފްޓްގައި ހަރުކުރާ ކޯނޭ އެއަރ ޕިއުރިފަޔަރ ވެސް ތައާރަފްކޮށްފައެވެ. އެއަރ ޕިއުރިފަޔަރގެ ބޭނުމަކީ ލިފްޓް ތެރޭގައި ހުންނަ ވައި ސާފުކޮށްދިނުމެވެ. އެހެންކަމުން ލިފްޓް ތެރޭގައި ހުންނަ އެކި ވަސްވަހާއި، ޖަރާސީމުތައް މި އެއަރ ޕިއުރިފަޔަރއިން ނައްތާލާނެއެވެ. ކޯނޭއިން އެއަރ ޕިއުރިފަޔަރއަށް ބޭނުންކޮށްފައިވަނީ ނާސާއިން ޖައްވަށް ފޮނުވާ އުޅަނދުތަކުގައި ކޮންޓަމިނޭޝަން ނައްތާލުމަށް ބޭނުންކުރާ ޕީސީއޯ ޓެކްނޮލޮޖީއެވެ.
މިއީ އެސްޓީއޯއިން ތައާރަފުކުރާ އެންމެ އީޖާދީ އެއް އުފެއްދުންކަމަށް އެކުންފުނިން މައުލޫމާތު ދެއެވެ.
ކޯނޭ ޓަޗްލެސް ސީއޯޕީ އަދި ކޯނޭ އެއަރ ޕިއުރިފަޔަރ އެންމެ ފުރަތަމަ ރާއްޖޭގައި ހަރުކުރެވިގެންދާނީ އެސް.ޓީ.އޯ ޓްރޭޑް ސެންޓަރުގައި ހުންނަ ލިފްޓްގައެވެ. ރާއްޖެއަށް މުޅިން އަލަށް ތައާރަފުކުރެވޭ މިމޮޑެލްއަށް ލިފްޓު ގަންނަން ބޭނުންވާ ފަރާތްތަކަށް އެ ފުރުސަތު އެސްޓީއޯން މިހާރުވަނީ ހުޅުވާލާފައެެވެ.
