ރައީސް މުއިއްޒު އަމުރު ކުރެއްވި ނަމަވެސް ގާނޫނު އަސާސީއާ ހިލާފު ގާނޫނަކަށް ތަބާވާކަށް ނުޖެހޭނެ: އިބްރާހިމް ރަޝީދު
މީޑިއާ ކޮންޓްރޯލް ކުރާ ބިލު ގާނޫނު އަސާސީއާ ހިލާފު
ފަލަސުރުހީ ޕްރޮގްރާމްގައި މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަމުރު ކުރެއްވި ނަމަވެސް ގާނޫނު އަސާސީއާ ހިލާފު ގާނޫނަކަށް ރައްޔިތުން ތަބާވާން ނުޖެހޭނެ ކަމަށް މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން އިބްރާހިމް ރަޝީދު ވިދާޅުވީ މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލު ފާސްކޮށް، ތަސްތީގު ކުރި ނަމަވެސް އެއީ ފެހި ގާނޫނު އަސާސީއާ ހިލާފު ގާނޫނެއް ކަމަށާއި، އެއަށް އަމަލު ކުރަން ނުޖެހޭ ކަމަށެވެ.
އެ ގާނޫނަށް އަމަލު ނުކުރާނަމަ ފިޔަވަޅު އަޅާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި އިބްރާހިމް ރަޝީދު ވިދާޅުވީ ގާނޫނަށް ވުރެ އެއްވެސް ބޭފުޅަކަށް މަތިނުވެވޭނެ ކަމަށެވެ. އަދި ވިދާޅުވީ ރައީސް މުއިއްޒަކީ ވެސް ގާނޫނަށް ތަބާވާ ބޭފުޅެއް ނޫން ކަމަށާއި، އެމަނިކުފާނު އަމުރު ކުރެއްވި ނަމަވެސް ގާނޫނު އަސާސީއާ ހިލާފު ގާނޫނަކަށް ތަބާވާކަށް ނުޖެހޭނެ ކަމަށެވެ.
ދެން ރައީސުލްޖުމްހޫރިއްޔާ މި ބުނަނީ ވަރަށް ބާރުލާފައި ހުރިހާ އެންމެން ޖެހޭނޭ ގާނޫނު އަސާސީއަށް ތަބާވާން. ކޮން ގާނޫނު އަސާސީއަކަށްތޯ އޭނާ ތަބާވަނީ ފުރަތަމަ ބަލަންޖެހޭނީ. މިހާރު ވެރިކަމުގައި އެހުރި މީހާއަށް ވަކިން އެހެން ކުލައެއްގެ ގާނޫނު އަސާސީއެއް އޮތީތޯ. ހަމަ ގައިމު ވެސް އޭނާ ގާނޫނު އަސާސީއަކަށް ތަބައެއް ނުވޭ. ގާނޫނު އަސާސީއަށް ތަބާވާނަމަ ސުޕްރީމް ކޯޓުގައި މައްސަލައެއް ކުރިއަށް ގޮސް އޮއްވާ މައްސަލާގެ ތެރެއިން ބެންޗު ބަދަލުކޮށްފައި އަދިވެސް އެމައްސަލަ އޮތީ ޕާކު ކޮށްފައި. ދިވެހިރާއްޖޭގެ ގާނޫނު އަސާސީއަށް ތަބާވާނަމަ މިހާރު ވެސް އޭސީސީގައި އެއޮތީ 17 މައްސަލައެއް އޭނާގެ. އެމައްސަލަތައް އޮއްބާލާފައި ނުބޭއްވޭނެ. ކޮބާ ގާނޫނު. ރިހާކުރު ފުޅިއަށް ގާނޫނު ހިނގާ. މީނާގެ 17 މައްސަލައަށް ގާނޫނު ނުހިނގާ. ކޮބާ އިންސާފަކީ. އެހެންވީމަ ރައްޔިތުން އެވާހަކަ ދައްކާނެ. މިހާރު މިއީ ކުރީ ޒަމާނެއް ނޫން. ރަށްރަށަށް ދިޔާމަ މިހާރު ޖޯކު ޖަހާނީ. އެއީ ރައީސުލްޖުމްހޫރިއްޔާ ކާޕެޓް އަޅައިގެން ވަށައިގެން ބޭރުގައި ދެބަރިއަށް މީހުން އެތުރި ޒަމާނެއް ނޫން މިހާރު މިއީ. މީނާ މިއުޅެނީ ނުބައި ޒަމާނެއްގައި ވެރިކަަމަށް އައިސްފައި އެކަމަކު ވެރިކަން ކުރަން ބޭނުންވީ 2008 ގެ ކުރީގެ ހިނގިބާވަތުގެ ވެރިކަމެއް ކުރަން ހިތުނިއަތް ގަނެގެން މިތިބީ.''މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު
އިބްރާހިމް ރަޝީދު ވިދާޅުވީ އިހުތިރާމާއި، ރައްޔިތުންގެ ލޯތްބަކީ ގަދަކަމުން ހޯދޭނެ އެއްޗެއް ނޫން ކަމަށާއި، ރައްޔިތުންގެ ފަރާތުން އެ ހޯދޭނީ ރައްޔިތުންނަށް ވެސް އެ ލޯތްބާއި އިހުތިރާމް ދީގެން ކަމަށެވެ. އަދި ގާނޫނަކުން މަޖުބާރުން ނުހޯދާނެ ކަމަށް އޭނާ ވިދާޅުވިއެވެ.
މީގެ އިތުރުން އިބްރާހިމް ރަޝީދު ވިދާޅުވީ ރައީސް މުއިއްޒަށް ވެރިކަމަށް ވަޑައިގެންނެވީ އޭރު ރާއްޖޭގެ ހާލަތު އޮތް ގޮތުން ކަމަށާއި، ނަމަވެސް މިހާރު ކުރީގެ ރައީސް އަބްދުﷲ ޔާމީން ވިދާޅުވާ ފަދައިން އެންމެން އެކައްޗެއް ކިޔައިގެން މިގައުމާ ރައްޔިތުން މިކަމުން ސަލާމާތްވާން ޖެހޭ ކަމަށެވެ.
