ރާއްޖެ ބާރު ސްޕީޑްގައި މީގެ 30 އަހަރު ފަހަތަށް ދާ މަންޒަރު ފެނޭ، ގައުމު ސަލާމަތް ކުރުމަށް މަޖިލީހުގައި ތިއްބެވި ބޭފުޅުން ވެސް މައިބަދާގައި ވަރުކޮޅެއް ޖައްސަންޖެހޭ: އިމްރާން
ސިޔާސީ މިނިވަންކަމާއި، ފަރުދީ މިނިވަންކަން ރައްޔިތުން ބޭނުންވޭ
ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް ޝައިޚް އިމްރާން އަބްދުﷲ
ދިވެހިރާއްޖެ ވަރަށް ބާރު ސްޕީޑްގައި މީގެ 30 އަހަރު ފަހަތަށް ދާ މަންޒަރު ފެންނަ ކަމަށާއި، ގައުމު ސަލާމަތް ކުރުމަށް ރައްޔިތުން މަޖިލީހުގައި ތިއްބެވި ބޭފުޅުންގެ ވެސް މައިބަދާގައި ވަރުކޮޅެއް ޖައްސަންޖެހޭ ކަމަށް ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް ޝައިޚް އިމްރާން އަބްދުﷲ ވިދާޅުވެއްޖެ އެވެ.
ބުދަ ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި ޝައިޚް އިމްރާން ވިދާޅުވީ ރާއްޖޭގައި މިހާރު ކަންކަންދާ ގޮތުން ވަރަށް ކަންބޮޑުވާ ކަމަށާއި، ގައުމު މިދަނީ ބާރު ސްޕީޑްގައި 25 ނުވަތަ 30 އަހަރު ފަހަތަށް ކަމަށެވެ.
އެ ދުވަސްވަރަށް އިޝާރާތް ކުރައްވައި އިމްރާން ވިދާޅުވީ އޭރު އިސްލާހީ މަސައްކަތް ފެށިގެންދިޔައީ ރައްޔިތުންގެ މެދުގައި އުފެދިފައިވާ ބިރުވެރިކަމެއްގެ ސަބަބުން ކަމަށެވެ. އެދުވަސްވަރު މީހަކަށް ބުނެވޭ ބަހަކުން ނުވަތަ ލިޔެވޭ އެއްޗަކުން އެތައް ދުވަހަކު ޖަލު ގޮޅީގައި އޮންނަންޖެހޭ ކަމަށާއި، ވިޔަފާރިވެރިއަކަށް ބަލާލެވޭ ގޮތަކުން ނުވަތަ ނޭގި ދެވޭ އިޝާރާތަކުން އެވިޔަފާރިއެއް ފުނޑި ނިމިގެންދާ ކަމަށް އޭނާ ވިދާޅުވިއެވެ. އަދި ވިދާޅުވީ ދީނީ އިލްމުވެރިންނަށް ވެސް ރައްޔިތުންގެ ކުރިމަތީގައި ދީނުގެ ވާހަކައެއް ވެސް ދެއްކުމުގެ ހުއްދަ ލިބެނީ ކިޔަވައިގެން ރާއްޖެއަށް އަންނަތާ 3 އަހަރު ފަހުން ކަމަށެވެ.
އޭރު ރާއްޖޭގެ އިޖްތިމާއީ އާދާލަތު ގެއްލިފައިވާކަން ފާހަގަކުރައްވައި އިމްރާން ވިދާޅުވީ ރައްޔިތުންގެ މެދުގައި އޮތީ ބިރުވެރިކަމާއި، ނާމާންކަން ކަމަށެވެ. އަނިޔާވެރިކަމާ ދެކޮޅަށް ނުކުމެ އިސްލާހީ މަސައްކަތް ފަށައި، ކާމިޔާބުކުރީ ސިޔާސީ މިނިވަންކަމާއި، ފަރުދީ މިނިވަންކަން ރައްޔިތުން ބޭނުންވާތީ ކަމަށް އޭނާ ވިދާޅުވިއެވެ.
ނަމަވެސް މިއަދު އަނެއްކާ ވެސް އެ އަނިޔާވެރިކަން ގައުމުން ފެންނަމުންދާ ކަމަށާއި، އެކަމާ ދެކޮޅަށް ރައްޔިތުންގެ މަޖިލީހުގެ ބޭފުޅުން ނުކުންނަންޖެހޭ ކަމަށް އިމްރާން ވިދާޅުވިއެވެ. އެބޭފުޅުންގެ މައިބަދާގައި ވަރުކޮޅެއް ޖައްސަން ކަމަށާއި، އެތެރެއިން ހޫނުވާ މަންޒަރު ފެންނަ ކަމަށް އިމްރާން ވިދާޅުވިއެވެ.
މިއަދު ޚާއްސަކޮށް ރައްޔިތުން މަޖިލީހުގައި ތިއްބެވި ބޭފުޅުންގައި ގައިގައި އެބޭފުޅުންގެ މައިބަދާގައި އެބަޖެހޭ ވަރުކޮޅެއް ޖައްސަން. އަޅުގަނޑުމެންނަށް އެނގޭ އެކަން ވާކަން ވެސް. ރައްޔިތުން މަޖިލީހުގައި ތިއްބެވި ބޭފުޅުން މިއަދު ކުޑަކޮށް އެބޭފުޅުން އަމިއްލައަށް މާބޮޑު ވިސްނުމެއް ނެތި ފާސްކޮށްލެއްވުނު ގާނޫނަކުން ކުޑަކޮށް މަޑު ޖައްސާލައިގެން އެބަތިބި. އެބޭފުޅުން އެބަ ކެކިއަރާ. އެތެރެއިން އެބަ ހޫނުވޭ. ކަންކަން ނިމިގެންދާއިރު އަޅުގަނޑަށް ހީވަނީ ފަޅައިގެންދާނީ ވަރަށް ބާރަށް ހެން. އެހެންވީމަ މިކަންކަން ނުހުއްޓުވޭނެ. އެބޭފުޅުންގެ އާއިލާ ވެސް އެބައޮތް. މުޅި ގައުމަށް ވާގޮތް ފެނޭ. އެބޭފުޅުން ތޮށިފަޅާފައި ނުކުންނާނެ. އަނިޔާވެރިވި މީހުންނަށް ލިބޭ ގެއްލުން ވަރަށް ބޮޑުވާނެ.ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް ޝައިޚް އިމްރާން އަބްދުﷲ
އިމްރާން ވިދާޅުވީ ހާލަތު ބަދަލު ވެގެންދާނީ ކޮން ވަގުތަކު ކިހިނެތްކަން ބުނަން ނޭނގޭ ކަމަށެވެ.
ގައުމުގައި ކަމެއް ގޯސްކޮށްދާނަމަ، ނުވަތަ ގޯސްކޮށް ކުރާނަމަ އެކަން ހުއްޓުވުމަށް މަސައްކަތް ކުރާ ބަޔަކަށް ކޮންމެ މީހަކުވެސް ވާންޖެހޭ ކަމަށާއި، އެގޮތަށް މަސައްކަތް ކުރާނަމަ މިއަދު މިފެންނަމުންދާ ނުރައްކާތެރި ބަދަލުތަކާއި، މަންޒަރުތައް ނުފެންނާނެ ކަމަށް އޭނާ ވިދާޅުވިއެވެ. އަދި ވިދާޅުވީ އިސްލާހީ މަސައްކަތުގައި އުޅުނު ބޭފުޅުން މާޒީމަތިން ހަނދާން ނައްތާލައި، މިއަދު ސަރުކާރުގެ ތެރޭގައި ތިއްބެވި ކަމަށާއި، އެއީ ނުރައްކާތެރި ކަމެއް ކަމަށް އޭނާ ވިދާޅުވިއެވެ.
