ރާއްޖޭގައި އޮތީ ރައްޔިތުންގެ ބާރުވެރިކަމެއް ނޫން، ރައީސްގެ ބާރުވެރިކަން: ވަހީދު
ރާއްޖޭގެ ނިޒާމު ފައްކާވެފައިވަނީ ވަރަށް ނުރައްކާތެރިކޮށް
ރާއްޖެޓީވީގެ ޕްރޮގްރާމެއްގައި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު ވާހަކަ ދައްކަވަނީ
ދިވެހިރާއްޖޭގައި އޮތީ ރައްޔިތުންގެ ބާރުވެރިކަމެއް ނޫން ކަމަށާއި، އޮތީ ރައީސުލްޖުމްހޫރިއްޔާގެ ބާރު ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ހޮނިހިރު ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި ވަހީދު ވިދާޅުވީ ރާއްޖޭގެ ނިޒާމަށް ބޮޑެތި ބަދަލުތަކެއް ގެންނަންޖެހޭ ކަމަށާއި، މިނިޒާމުގައި މައްސަލަތަކެއް އެބަހުރި ކަމަށެވެ. މިހާތަނަށް ގައުމުގައި ހިނގާފައިވާ ކަންކަމުން އެކަން ރައްޔިތުންނަށް އެނގޭނެ ކަމަށް އޭނާ ވިދާޅުވިއެވެ.
ވަހީދު ވިދާޅުވީ ރާއްޖޭގެ ނިޒާމު ފައްކާވެފައިވަނީ ވަރަށް ނުރައްކާތެރިކޮށް ކަމަށާއި، ފަސް އަހަރުން ރައްޔިތުން ބަދަލަކަށް ބޭނުންވެ އައު ބޭފުޅެއް އިންތިޚާބުކުރާ ކަމަށެވެ. ނަމަވެސް ގައުމުގެ ހުންގާނާ ހަވާލުވާ ބޭފުޅާ އިހުލާސްތެރިވާނެ ކަމަށް ތިބެވެން ނެތް ކަމަށް ވަހީދު ވިދާޅުވިއެވެ.
މީގެ އިތުރުން ވަހީދު ވިދާޅުވީ މިއަދު ރާއްޖޭގައި ރައްޔިތުންގެ ބާރުވެރިކަން ނެތް ކަމަށާއި، އޮތީ ރައީސްގެ ބާރުވެރިކަން ކަމަށެވެ. އަދި އަދުލުއިންސާފުގެ އިތުރުން ގައުމުގެ ހުރިހާކަމެއް ކުރިއަށް ގެންދަނީ ރައީސް ބޭނުންފުޅުވާ ގޮތަށް ކަމަށް އޭނާ ވިދާޅުވިއެވެ.
އެހެންވީމަ މި ނިޒާމުގައި ހުރި މައްސަލަތަކެއް ހުރިކަން އަޅުގަނޑުމެން ގަބޫލުކޮށް، މިއަށް ބަދަލުތަކެއް ގެންނަން އެބަޖެހޭ. ކޮންމެ ގޮތެއް ވިޔަސް ގާނޫނު އަސާސީ މިއޮތް ތަރުތީބަކަށް ނޫން ބާރުތައް މިހާރު އޮތީއެއް. ރައްޔިތުންގެ ބާރުވެރިކަމެއް ނޫން ރާއްޖޭގައި އޮތީއެއް. ރައީސުލްޖުމްހޫރިއްޔާގެ ބާރު އޮތީ. ރައްޔިތުންގެ މަޖިލިސް ވަކި ބާރެއްގެ ގޮތުގައި ނޫން މަސައްކަތް ކުރަނީއެއް. ޝަރުއީ ނިޒާމު މިނިވަން އިންސާފުވެރިކަމާއެކު ނޫން ހިނގަނީއެއް. މިހާތަނަށް ކުރެވިފައި ހުރި ސަރވޭތަކުގައި ރައްޔިތުން އެތަންތަނާ ބެހޭ ގޮތުން ބުނެފައި ހުންނަ ވާހަކަތަކަށް ބަލާއިރު ވެސް އެބަ އެނގޭ ދެތިން ޕަސެންޓު މީހުން ވެސް އެތަންތަނަށް އިތުބާރެއް ނުކުރެވޭ. ރާއްޖޭގެ އިގްތިސާދު ވެސް މިދަނީ ރަނގަޅު ދިމާލަކަށް ނޫން.ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު
އިޖްތިމާއީ ފޭރާން ހަލާކުވަމުންދާކަން ފާހަގަކުރައްވައި ވަހީދު ވިދާޅުވީ، އިގްތިސާދު ދަށްވެ، ރައްޔިތުންގެ ދިިރިއުޅުން އިންތިހާއަށް ދަތިވަމުންދާ ކަމަށެވެ. ރައްޔިތުންގެ ނަފްސާނީ ދުޅަހެޔޮ ކަމަށް އަސަރު ކުރަމުންދާ ކަމަށާއި، މުޖުތަމައު މީގެ ކުރިން އޮތް އުފާވެރިކަން ގެއްލި މަޑުމަޑުން ސްޓްރެސް ބޮޑު ރާއްޖެއަކަށް ފުރޮޅެމުންދާ ކަމަށް ވަހީދު ވިދާޅުވިއެވެ.
ވަހީދު ވިދާޅުވީ ރާއްޖޭގެ ހާލަތު ބަދަލު ކުރެވޭނީ ރައްޔިތުން ނުކުމެގެން ކަމަށާއި، ފެހި ގާނޫނު އަސާސީން ލިބިދީފައިވާ މިނިވަންކަމާއެކު، ރައްޔިތުން ނުކުމެ މަޝްވަރާކޮށް، ބަދަލު ގެންނަންޖެހޭ ކަމަށެވެ.
