މޫސުމަށް އަންނަ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް އިސްކަންދީގެން ފަންޑު ދިނުމަށް ޞަބްރާ ގޮވާލައްވައިފި
ރާއްޖެފަދަ މޫސުމީ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް ފައިސާ ހޯދުމަކީ އެންމެ އުނދަގޫކަންތައް
ކޮޕް26 ކޮންފަރެންސްގެ ހަވާސާ ބައްދަލުވުމެއްގައި ސްޕެޝަލް އެންވޯއީ ފޮރ ކްލައިމެޓް ޗޭންޖް ޞަބްރާ އާއި ސްޓޭޓް މިނިސްޓަރ ޚަދީޖާ ނަސީމް
މޫސުމަށް އަންނަ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް އިސްކަންދީގެން އެކަމަށް ޚާއްސަކޮށްފައިވާ ފަންޑު ދޫކުރުމަށް ސްޕެޝަލް އެންވޯއީ ފޮރ ކްލައިމެޓް ޗޭންޖް ޞަބްރާ އިބްރާހީމް ނޫރައްދީން ގޮވާލައްވައިފިއެވެ.
މިހާރު ކުރިޔަށްދާ ކޮޕް-26 ކޮންފަރެންސްގައި ހައި ލެވެލް މިނިސްޓީރިއަލް ޑައިލޮގްގައި ޞަބްރާ ވަނީ މިކަމުގައި ރާއްޖެއިން ދެކޭގޮތް ހާމަކުރައްވާފައެވެ. އެގޮތުން ޕެރިސް އެގްރިމެންޓްގައި ކަނޑައަޅާފައިވާ ކަންކަން ހާސިލުވަމުންނުދާތީ އެކަމުގެ ކަންބޮޑުވުން ވަނީ ފާޅުކުރައްވާފައެވެ. ޚާއްސަކޮށް ރާއްޖެފަދަ މޫސުމީ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް މިކަމުގެ ސަބަބުން ވަމުންދާ ގެއްލުންތައް ފާހަގަކުރެއްވިއެވެ.
ނަމަވެސް ޞަބްރާ ވަނީ 2025 ވަނަ އަހަރާ ހަމައަށް މުއްސަނދި ގައުމުތަކުން 500 ބިލިއަން ޑޮލަރު ފޯރުކޮށްދޭނެކަމަށް ގަބޫލުކުރައްވާކަމަށް ވިދާޅުވެފައެވެ. ވަކިން ޚާއްސަކޮށް މޫސުމީ ބަދަލުތަކުގެ އަސަރު އެންމެ ބޮޑަށްކުރާ ރާއްޖެފަދަ ގައުމުތަކަށް މިއެހީ ލިބޭނެކަމުގެ އުންމީދުވަނީ ފާޅުކުރައްވާފައެވެ.
މީގެއިތުރުން ކުދި ބިންތިރި ގައުމުތަކަށް ލިބެންވާ ފައިސާ ލިބުމުގައި ދަތިތައް ދިމާވަމުންދާ މައިގަނޑު ސަބަބުތަކުގެ ތެރޭގައި ފުރިހަމަކުރަންޖެހޭ އެތައް ކަމެއް ފުރިހަމަކޮށް، ބިޔުރޯކްރަސީ މާބޮޑަށް އޮތުން ހިމެނޭތީ އެކަންކަން ހުއްޓުމަކަށް ގެނައުމަށް ވެސް ޞަބްރާ ވަނީ ގޮވާލައްވާފައެވެ. އަދި ބިޔުރޯކްރަސީގެ ސަބަބުން ރާއްޖެއަށް ޕްރޮޖެކްޓްތައް ލިބުމުގައި އެތައް ދުވަހެއް ނަގާކަން ޞަބްރާ ފާހަގަކުރެއްވިއެވެ. ނަމަވެސް ޕްރޮޖެކްޓަކަށް އާނ ބަސްބުނެ، ޕްރޮޖެކްޓެއްގެ މަސައްކަތް ފެށޭ ހިސާބުން އޮންނަނީ އެ ޕްރޮޖެކްޓަށް އެދުނުއިރުގެ ހާލަތު ބަދަލުވެފައިކަމަށް ޞަބްރާ ވިދާޅުވިއެވެ.
މީގެއިތުރުން ގްރާންޓް ދިނުމުގައި ވެސް މޫސުމަށް އަންނަ ބަދަލުތަކުގެ ސަބަބުން ކުރާ އަސަރުގެ ކުޑަ ބޮޑުމިނަށް ބެލުމަށް ޞަބްރާ ވަނީ ބާރުއަޅުއްވާފައެވެ. ޞަބްރާ ވަނީ އެޑަޕްޓޭޝަނަށް އިންވެސްޓްކުރުމުގެ މުހިންމުކަމުގެ މައްޗަށް ވެސް އަލިއަޅުވާލައްވާފައެވެ. މިޓިގޭޝަނަށް ފައިސާ ހޯދަން ފަސޭހަކަމުގައިވީނަމަވެސް މޫސުމީ ބަދަލުތަކާ ގުޅިގެން ކުރާ އަސަރުތަކުން އެޑަޕްޓޭޝަނަށް ކުރާ ޚަރަދަކީ ފައިދާކުރަނިވި އިންވެސްޓްމެންޓެއްގެ ގޮތުގައި ފެންނަމުންނުދާކަމަށެވެ.
މީގެއިތުރުން ޞަބްރާ ވަނީ އެކްސްޕާޓް ގްރޫޕް މީޓިންގ އޮން ލޮސް އެންޑް ޑެމޭޖް ފޮރ ކްލައިމެޓް އިމްޕެކްޓްސް އިން ސިޑްސް ގައިވެސް ބައިވެރިވެވަޑައިގެން ވާހަކަދައްކަވާފައެވެ. މި ބައްދަލުވުމުގައި ވާހަކަދައްކަވަމުން ވެސް ޞަބްރާ ވަނީ ރާއްޖެފަދަ މޫސުމީ ބަދަލުތަކުގެ އަސަރު އެންމެ ބޮޑަށް ކުރާ ގައުމުތަކަށް ހޯދަންޖެހޭ ފައިނޭންސް ހޯދުމަކީ އެންމެ އުނދަގޫކަންތައް ކަމުގައި ވިދާޅުވެފައެވެ. ރާއްޖޭގެ ބަޖެޓުން ކޮންމެ އަހަރަކު އެޑަޕްޓޭޝަނަށް އެތައް ހޭދައެއްކުރަމުންދާކަމަށް ޞަބްރާ ވިދާޅުވިއެވެ. އޭގެތެރޭގައި ގޮނޑުދޮށް ހިމާޔަތްކުރުމާއި ސާފުފެން ފޯރުކޮށްދިނުން ފަދަ ކަންކަން ހިމެނޭކަމަށް ޞަބްރާ ވިދާޅުވިއެވެ.
ވީއެންމެ އަވަހަކަށް މިކަންކަން ފުރިހަމަކުރުމަށް ގޮވާލަމުންދަނީ ދިގުމުއްދަތަކަށް އެކަންކަމަށް އިންވެސްޓްކުރުމުގެ ގާބިލުކަންނެތުމުގެ ސަބަބުންކަމަށް ޞަބްރާ ވިދާޅުވިއެވެ. އަދި މޫސުމީ ބަދަލުތަކުގެ ސަބަބުން ކުރާ އަސަރު ވީހާވެސް ކުޑަކުރަންޖެހޭކަމަށް ޞަބްރާ ވިދާޅުވިއެވެ.
މީގެއިތުރުން ކޮޕް26 ކޮންފަރެންސްގެ ތެރެއިން ގައުމުތަކަށް ފައިސާ ހަމަޖެއްސުމުގެ ކަންކަމުގައި މިހާރަށްވުރެ ޚަރުދަނާ ގޮތްތަކެއް އެކަށައެޅުމަށް ވަނީ ގޮވާލައްވާފައެވެ. ކުދި ޖަޒީރާ ގައުމުތަކުގެ ރައްޔިތުންގެ ދިރިހުރުމަށް އެންމެ ރަނގަޅު ވަގުތުގައި އެކަމަށް އެކަށޭނެ އެހީތެރިކަން ބޭނުންވާކަމަށާއި، އެކަން އެގޮތަށްވާކަން ޔަގީންކުރަންޖެހޭކަމަށް ޞަބްރާ ވިދާޅުވިއެވެ.
