ފަހި އެމް.އެން.ޔޫ ސިލްސިލާ ޕްރޮގްރާމް ފަށައިފި
މި ސިލްސިލާ ޕްރޮގްރާމްގައި ގްރޭޓަރ މާލެ އޭރިޔާގައި އޭ-ލެވެލްއަށް ކިޔަވާ ހުރިހާ ސްކޫލް ދަރިވަރުން (ޕްރައިވެޓް ސްކޫލްސް ވެސް ހިމަނައިގެން) ޔުނިވަރސިޓީއަށް ޒިޔާރަތް ކުރާނެ
ފުރަތަމަ ޕްރޮގްރާމްގައި ބައިވެރިވީ ސީއެޗްއެސްއީގެ ދަރިވަރުން
ދިވެހިރާއްޖޭގެ ޤައުމީ ޔުނިވަރސިޓީންފަހި އެމް.އެން.ޔޫނުވަތަ ގެޓިންގް ޓު ނޯ އެމް.އެން.ޔޫގެ ނަމުގައި ސިލްސިލާ ޕްރޮގްރާމެއް ފަށައިފިއެވެ.
މި ނޮވެމްބަރު 2ވީ އަންގާރަ ދުވަހު ޔުނިވަރސިޓީގެ މައިމަރުކަޒުގައި ފެށި މިޕްރޮގްރާމްގެ މަގުސަދަކީ ޕަބްލިކަށް, އަދި ޚާއްސަކޮށް މާދަމާގެ ލީޑަރުން ކަމުގައިވާ ސްކޫލްތަކުގެދަރިވަރުންނަށް ދިވެހިރާއްޖޭގެ ޤައުމީ ޔުނިވަރސިޓީ އެމް.އެން.ޔޫގެ ތަޞައްވުރާއި ޔުނިވަރސިޓީން ދެވޭ ޚިދުމަތްތަކާއި ފުރުސަތުތަކާއި ހުރި ވަސީލަތްތަކާއި ދަރިވަރުންނަށް އުފާވެރި މާހައުލެއް ގާއިމުކޮށްދޭން ޔުނިވަރސިޓީން ކުރާ މަސައްކަތްތައް ތައާރަފުކޮށްދިނުމެވެ. އަދި ސްކޫލް ދަރިވަރުންނަށް ކެރިއަރ ގައިޑަންސް ދިނުމެވެ.
އެގޮތުން ފުރަތަމަ ޕްރޮގްރާމްގައި ބައިވެރިވީ ސީ.އެޗް.އެސް.އީގެ ދަރިވަރުންނެވެ. މި އިވެންޓު ގައި ހުރިހާ ފެކަލްޓީ/ސެންޓަރުތަކުން މަޢުލޫމާތު ފޯރުކޮށްދީ، ދަރިވަރުން ގެ ހިތުގައި އުފެދުނު ސުވާލު ތަކަށް ޖަވާބު ދީ، ކުރިމަގުގައި އިތުރަށް ކިޔެވުމަށް އިޚްތިޔާރުކުރާނޭ ރޮނގެއް އަންގައި އެކުދިންނަށް އެމް.އެން.ޔޫގެ މައުލޫމާތު ހިއްސާ ކުރެވުނެވެ. މިއިވެންޓް ކޮންމެ ހަފްތާއެއްގައި ސިލްސިލާކޮށް ކުރިއަށް ގެންދިޔުމަށް ޔުނިވސިޓީން ވިސްނާފައިވެއެވެ. މި އިވެންޓުގެ ތެރޭގައި، ދަރިވަރުންނަށް ޔުނިވަރސިޓީގެ އެކި އެކި ފެސިލިޓީސްތައް ދައްކާލުން ކުރިއަށް ގެންދެވުނެވެ.
އަންގާރަ ދުވަހަށް ޚާއްސަ މި ސިލްސިލާ ޕްރޮގްރާމްގައި ގްރޭޓަރ މާލެ އޭރިޔާގައި އޭ-ލެވެލްއަށް ކިޔަވާ ހުރިހާ ސްކޫލް ދަރިވަރުން (ޕްރައިވެޓް ސްކޫލްސް ވެސް ހިމަނައިގެން) ޔުނިވަރސިޓީއަށް ޒިޔާރަތްކުރާނެއެވެ. އަދި 9 ނޮވެމްބަރުގައި ގްރޭޓަރ މާލޭ އޭރިޔާގެ ސަރުކާރު 12 ސްކޫލެއްގެ ގްރޭޑް 8، 9، 10ގެ ދަރިވަރުންނަށް ޚާއްސަ ކެރިއަރ ގައިޑަންސް ޕްރޮގްރާމްއެއް އެއްފަހަރާ ހިންގުމަށް ޔުނިވަރސިޓީގެ 12 ޓީމެއް ހަރަކާތްތެރިވާނެއެވެ. މީގެ އިތުރުން އަތޮޅުތެރޭގެ އެކި ސަރަހައްދު ތަކަށް ޔުނިވަރސިޓީގެ ޓީމުތައް ޒިޔާރަތްކޮށްގެން "ފަހި އެމް.އެން.ޔޫ" ޕްރޮގޮރާމް މިއަހަރުތެރޭގައި ހިންގުމަށް ހަމަޖެހިފައިވެއެވެ.
"ފަހި އެމް.އެން.ޔޫ." ޕްރޮގްރާމަކީ ޔުނިވަރސިޓީގެ ތަސައްވުރާ އެއްގޮތަށް, ޔުނިވަރސިޓީން ނިކުންނަ ދަރިވަރުންނަކީ ފުޅާ ދާއިރާއެއްގައި ވިސްނާ, ސިކުނޑި ހުޅުވިފައިތިބި, ބިނާ ކުރުވަނިވި, ޚިދުމަތްތެރި، އަނެކުންނާ ދޭތެރޭ ވިސްނާ، އަމިއްލަ އަށް އިސްނަގައިގެން ގައުމު ބިނާކުރާނެ ޚިދުމަތަތެރި ދަރިންތަކެއް އުފެއްދުމުގެ އަމާޒުގައި ހިންގާ ޕްރޮގްރާމެކެވެ.
