ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ކުޅުނު މެޗުން ގްރޫޕް އޭގައި ހިމެނޭ ޕީއެސްޖީ އާއި އާރްބީ ލައިޕްޒީގް އެއްވަރުވިއިރު، ކުލަބު ބްރޫޖް ބަލިކޮށް ތާވަލުގެ އެއްވަނައަށް މެންޗެސްޓާ ސިޓީ ޖެހިލައިފިއެވެ.
ލައިޕްޒީގުގެ ދަނޑުގައި ޕީއެސްޖީއާ ދެކޮޅަށް ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.
މި މެޗުގައި އަނިޔާގެ ސަބަބުން އާޖެންޓީނާގެ ތަރި ލިއޮނެލް މެސީ ކުޅެފައެއް ނުވެއެވެ. މި މެޗު ފަށައިގެން ލައިޕްޒީގުން ރަނގަޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން އަށްވަނަ މިނެޓުގައި އަންޑްރޭ ސިލްވާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ކްރިސްޓޯފް އެންކުންކޫއެވެ. އަދި އޭގެ ހަތަރު މިނެޓު ފަހުން ލީޑުފުޅާކުރަން ލައިޕްޒީގަށް ޕެނަލްޓީއެއް ލިބުނު ނަމަވެސް، އެ ޓީމުގެ ސިލްވާ ފޮނުވާލި ޕެނަލްޓީ ޕީއެސްޖީގެ ގޯލްކީޕަރު ޖިއަންލުއީޖީ ޑޮންނަރުންމާ ވަނީ މަތަކޮށްފައެވެ.
އެއާއެކު ފުރަތަމަ ހާފު ނިމުމުގެ ކުރިން ޕީއެސްޖީން ވަނީ ދެ ލަނޑު ޖަހައި، އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 21 ވަނަ މިނެޓުގައި ކީލިއަން އެމްބާޕޭ ދިން ބޯޅައަކުން ޖިއޮޖީނިއޯ ވައިނަލްޑަމް ވަނީ ލަނޑެއް ޖަހައި، ޕީއެސްޖީއަށް ނަތީޖާ އެއްވަރުކޮށްދީފައެވެ. އަދި ފުރަތަމަ ހާފު ނިމެން ހަ މިނެޓަސް ވެފައި ވަނިކޮށް ވައިނަލްޑަމް ވަނީ އިތުރު ލަނޑެއް ޖަހައި، އެ ޓީމަށް ލީޑު ނަގައިދީފައެވެ. މި މެޗުގައި ވައިނަލްޑަމް ދެ ލަނޑު ޖެހިއިރު، މި ލަނޑުތަކަކީ މި އަހަރުގެ ހޫނު މޫސުމުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގައި ލިވަޕޫލް ދޫކޮށް ޕީއެސްޖީއަށް ބަދަލުވި ފަހުން ވައިނަލްޑަމް ކާމިޔާބުކުރި ފުރަތަމަ ލަނޑުތަކެވެ.
މި މެޗުން ޕީއެސްޖީ މޮޅުވާން ދަނިކޮށް ލައިޕްޒީގުން ނަތީޖާ އެއްވަރުކޮށްފައިވަނީ މެޗުގެ އިތުރު ވަގުތުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޑޮމިނިކް ސޮބޯސްލާއިއެވެ. މިއީ އޭރިއާ ތެރެއިން ޕީއެސްޖީގެ ޕްރެސްނެލް ކިމްޕެމްބޭ ކުރި ފައުލަކަށް ރެފުރީ ދިން ޕެނަލްޓީއެކެވެ.
މި މެޗުން ޕީއެސްޖީ އެއްވަރުވިއިރު، އެ ޓީމާ އެއް ގްރޫޕެއްގައި ހިމެނޭ ސިޓީ މޮޅުވީ ބުދަ ދުވަހުގެރޭ ކުޅުނު މެޗުން ކުލަބު ބްރޫޖް އަތުން ފަސޭހަކަމާއެކު 4-1 ގެ ނަތީޖާއަކުންނެވެ.
ސިޓީގެ ދަނޑުގައި ކުޅުނު މި މެޗު ފަށައިގެން 15 ވަނަ މިނެޓުގައި ފިލް ފޯޑެން ވަނީ އެ ޓީމަށް ލީޑު ނަގައިދީފައެވެ. އެކަމަކު އޭގެ ދެ މިނެޓު ފަހުން ބްރޫޖުން ނަތީޖާ އެއްވަރުކުރިއިރު، މި ލަނޑަކީ ސިޓީގެ ޑިފެންޑަރު ޖޯން ސްޓޯންސް އަތުން ބައިކޮޅަށް ވަން ލަނޑެކެވެ.
ނަމަވެސް ދެވަނަ ހާފު ފަށައިގެން ނުވަވަނަ މިނެޓުގައި ރިޔާދު މާރޭޒް ވަނީ ލަނޑެއް ޖަހައި، ސިޓީއަށް އަލުން ލީޑު ނަގައިދީފައެވެ. އަދި މެޗުގެ 72 ވަނަ މިނެޓުގައި ރަހީމް ސްޓާލިން ސިޓީއަށް ލީޑު ފުޅާކޮށްދިންއިރު، އެ ޓީމުގެ ތިންވަނަ ލަނޑު މެޗުގެ އިތުރު ވަގުތުގައި ކާމިޔާބުކޮށްދިނީ ގަބްރިއެލް ޖެސޫސްއެވެ.
މި މޮޅާއެކު ގްރޫޕް އޭގެ އެއްވަަނައަށް ސިޓީ ޖެހިލިއިރު، އެ ޓީމަށް ވަނީ ކުޅުނު ހަތަރު މެޗުން ނުވަ ޕޮއިންޓް ލިބިފައެވެ. ތާވަލުގެ ދެވަނައިގައި ޕީއެސްޖީ އޮތީ ހަތަރު މެޗުން އަށް ޕޮއިންޓާއެކުއެެވެ. އަދި ތިންވަނައިގައި އޮތް ބްރޫޖަށް ހަތަރު މެޗުން ހަތަރު ޕޮއިންޓް ލިބިފައިވާއިރު، ފުލުގައި އޮތް ލައިޕްޒީގަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.
