ކުލަބު މޯލްޑިވްސް ކަޕުގެ ގުރު ނަގައިފި

ސަރުކާރު އޮފީސްތަކާއި ކުންފުނިތަކަށް އަމާޒުކޮށްގެން ބާއްވަމުން އަންނަ ކުލަބު މޯލްޑިވްސް ކަޕުގެ ގުރު ނަގައިފިއެވެ.

މެދުކެނޑުމަކަށްފަހު ކުލަބު މޯލްޑިވްސް ކަޕް މި އަހަރު ބާއްވާއިރު، މި މުބާރާތުގެ ކުޅުން ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހެވެ. މި މުބާރާތުގެ ފިރިހެން ބައިގައި މި ފަހަރުވެސް 32 ޓީމު ބައިވެރިވެފައިވާއިރު، މުބާރާތް ކުރިއަށް ގެންދިޔުމަށް ހަމަޖެހިފައިވަނީ އަށް ގްރޫޕަކަށް ބަހާލައިގެންނެވެ.

މި މުބާރާތުގެ ގުރުލުން ހޯމަ ދުވަހުގެރޭ ބޭއްވިއިރު، އެންމެ ފަހުގެ ޗެމްޕިއަން ބީއެމްއެލް ހިމެނިފައިވަނީ ގްރޫޕް ޑީގައެވެ. އެ ގްރޫޕުގައި ދެން ހިމެނެނީ ކުލަބު އެޗްޑީސީ އާއި އާރްޑީސީގެ އިތުރުން ފެން ކުލަބެވެ. އަދި އެންމެ ފަހުގެ ރަނަަރަޕް ޓީމު ކަމަށްވާ ކުލަބު ވެމްކޯ ހިމެނުނީ ސްޓެލްކޯ އާއި ކުޅިވަރާ ބެހޭ ވުޒާރާ އަދި ސިޓީ ކައުންސިލާއެކު ގްރޫޕް ސީގައެވެ.

ދެން މި މުބާރާތުގައި ގްރޫޕް އޭގައި ހިމެނުނީ އުރީދޫ އާއި، ކަސްޓަމްސް އާއި، މީޑިއާނެޓް އަދި އެމްއޭސީއެލްއެވެ. އަދި ގްރޫޕް ބީގައި ޕޮލިސް ކުލަބާއި، އެލައިޑާއި، ޓްރޭޑް ކުލަބު އަދި އެޗްއާރްސީ ހިމެނުނުއިރު، ގްރޫޕް އީގައި ހިމެނުނީ އިމިގްރޭޝަނާއި، ދިރާގާއި، އެފްއެސްއެމް އަދި ޓީމް އެމްއެންޕީއެޗްއައިއެވެ.

މި މުބާރާތުގެ ގްރޫޕް އެފްގައި ޕްރިޒަންސް ކުލަބާއި، އޭވިއޭޝަން ސެކިއުރިޓީ އާއި، ޓީމު ފެނަކަ، އަދި އާރްއޯއެލް ހިމެނުނުއިރު، ގްރޫޕް ޖީގައި ހިމެނުނީ އެމްޕީއެލް އާއި، ދިވެހި ސިފައިންގެ ކުލަބާއި، ސިވިލް ކޯޓު އަދި ކްލަބް 220 އެވެ. ދެން މި މުބާރާތުގައި ހިމެނޭ ގްރޫޕް އެޗްގައި ވާދަކުރާނެ ޓީމުތަކަކީ އެސްޓީއޯ އާއި، އެމްޓީސީސީ އާއި، އެމްއެމްއޭ ސޯޝަލް ކުލަބު މޯލްޑިވް ގޭސްއެވެ.

މީގެ އިތުރުން މި ފަހަރުގެ ކުލަބު މޯލްޑިވްސް ކަޕުގެ އަންހެން ޑިވިޝަން "ވިމެންސް ފުޓްސަލް ފިއެސްޓާ" ގައި ބައިވެރިވެފައިވަނީ އަށް ޓީމެވެ. އެއާއެކު ދެ ގްރޫޕަކަށް ބަހާލައިގެން އަންހެން ޑިވިޝަން ކުރިއަށްގެންދާއިރު، އެންމެ ފަހުގެ ޗެމްޕިއަން އެމްޕީއެލް ހިމެނިފައިވަނީ ގްރޫޕް ބީގައެވެ. އެ ގްރޫޕުގައި ދެން އޮތީ ޓީމް ފެނަކަ އާއި، ކުޅިވަރާ ބެހޭ ވުޒާރާ އަދި ކުލަބު ވެމްކޯއެވެ. އަދި ގްރޫޕް އޭގައި ހިމެނެނީ ޕޮލިސް ކުލަބާއި، ދިވެހި ސިފައިންގެ ކުލަބާއި، ސިޓީ ކައުންސިލް އަދި ޓްރޭޑް ކުލަބެވެ.

މި މަހުގެ 20 ވަނަ ދުވަހު ކުލަބު މޯލްޑިވްސް ކަޕް ފަށާއިރު، މި އަހަރުގެ މުބާރާތް އެންމެ ފުރަތަމަ ތާވަލުކުރީ މެއި މަހަށެވެ. އެކަމަކު ކޮވިޑް-19 ގެ ހާލަތާ ގުޅިގެން އެ ފަހަރު މުބާރާތް ފަސްކުރަން ޖެހުނެވެ. އަދި މިދިޔަ އަހަރު ރާއްޖޭގެ ކޮވިޑުގެ ހާލަތު ގޯސްވެ، މި މުބާރާތް އެ އަހަރު ބާއްވާފައެއް ނުވެއެވެ.