ޓްރާންސިޓް ބަނދަރާއެކު ރާއްޖެއަށް ވަންނަ ބޭރުފައިސާ އިތުރުވާނެ: ކެޕްޓަން ޝަރީފް

ދިވެހިރާއްޖޭގައި ޓްރާންސިޓް ބަނދަރެއް ގާއިމްކުރެވިއްޖެނަމަ ރާއްޖެއަށް ބޭރު ފައިސާ ވަންނަ މިންވަރު އިތުރުވެގެންދާނެ ކަމަށް ކެޕްޓަން މުހައްމަދު ޝަރީފް (ސެންކޯ ޝަރީފް) ވިދާޅުވެއްޖެއެވެ.

ދިވެހިރާއްޖޭގެ ކަނޑު ދަތުރުފަތުރުގެ ދާއިރާގައި އެންމެ ތަޖުރިބާކާރު އެއް ކެޕްޓަންގެ ހައިސިއްޔަތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ކެޕްޓަން ޝަރީފް ވިދާޅުވީ ރާއްޖޭގައި ޓްރާންސިޓް ބަނދަރެއް ގާއިމްކުރުމުގެ މަޝްވަރާތައް މި ސަރުކާރު ވެރިކަމަށް އައިތާ ކުރީކޮޅު ސަރުކާރުގެ އިސްވެރިންނާއެކު ކޮށްފައިވާކަމަށެވެ.

އެގޮތުން ހއ. އިހަވަންދިއްޕޮޅުގައި ޓްރާންސިޓް ބަނދަރެއް ހެދުމާ ގުޅޭގޮތުން ވަރަށް ގިނަ ކަންތައްތަކެއް ދިރާސާކޮށްފައި ހުށަހެޅި ކަމަށާއި، މި ބަނދަރު ގާއިމްކުރުމަށް މި ސަރުކާރުން މަސައްކަތްތަކެއް ފެށިކަމަށް ޝަރީފް ވިދާޅުވިއެވެ. އެހެންނަމަވެސް ކޮވިޑާ ގުޅިގެން މި މަސައްކަތަށް ވެސް ހުއްޓުމެއް އައީ ކަމަށާއި، މި ސަރުކާރުން މި މަސައްކަތް ކުރާނެ ކަމަށް ކެޕްޓަން ޝަރީފް ވިދާޅުވިއެވެ. ހޯމަ ދުވަހު މަޖިލީހަށް ހުށަހެޅި ގަރާރުން ވެސް މި ސަރުކާރުން މިކަން ކުރާނެކަން ޔަގީންކުރެވޭކަމަށް ވިދާޅުވިއެވެ.

ޝަރީފް ވިދާޅުވީ ޓްރާންސިޓް ބަނދަރެއް އޮތުމަކީ އޭގެ ސަބަބުން ރާއްޖޭގައި ވަރަށް ގިނަ މަޝްރޫއުތަކެއް ހިނގާނެ ކަމެއް ކަމަށާއި، އިޤްތިޞާދީ ކުރިއެރުން ވެސް ގެނުވާނެ ކަމެއް ކަމަށެވެ. މިކަމުގެ ސަބަބުން ރާއްޖެއިން ފަތުރުވެރިކަމަށް ބަރޯސާވާ މިންވަރު ކުޑަކޮށް، އެހެނިހެން ގޮތްގޮތުން އާމްދަނީ ހޯދުމަށް މަގުފަހިވާނެ ކަމަށް އޭނާ ވިދާޅުވިއެވެ. މިކަން ފެށުމުގެ ކުރިން މިހާރުވެސް ކުރެވޭނެ ކަންކަން އެބަހުރި ކަމަށް އޭނާ ވިދާޅުވިއެވެ.

މިގޮތުން ގިނަ އަދަދެއްގެ ބޯޓު ފަހަރަކީ ރާއްޖެ ހުރަސްކޮށް ދަތުރުކުރާ ބޯޓުފަހަރަށް ވެފައި ގިނަ ބޯޓުފަހަރު ދަތުރުކުރަނީ އިހަވަންދިއްޕޮޅު ސަރަހައްދުން ކަމަށްވުމާއެކު، އެ ބޯޓުފަހަރަށް ބޭނުންވާ އެކި ޚިދުމަތްތައް ދީގެން ރާއްޖެއަށް ވަންނަ ބޭރު ފައިސާ އިތުރުކުރެވޭނެ ކަމަށް އޭނާ ވިދާޅުވިއެވެ. އެދޭތެރެއިން ދަތުރުކުރާ 40 ނުވަތަ 50 ބޯޓުގެ ތެރެއިން 25 އިންސައްތަ ބޯޓުފަހަރު އެ ސަރަހައްދަށް ކައިރި ކުރިޔަސް ވަރަށް ބޮޑު އާމްދަނީއެއް ދައުލަތަށް ލިބިގެންދާނެ ކަމަށް އޭނާ ވިދާޅުވިއެވެ.

އިހަވަންދިއްޕޮޅުގައި އާގު ބޯޓުފަހަރަށް ޚިދުމަތް ދެވޭނެ މަގު ތަނަވަސްކޮށްދިނުމަށް އެދި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމް ވަނީ މަޖިލީހަށް ގަރާރެއް ހުށަހަޅުއްވާފައެވެ. މި ގަރާރުގައި ވަނީ ރާއްޖެއަކީ ހުޅަނގާއި އިރުން މުދާ ހިފައިގެންދާ އާގު ބޯޓު ފަހަރު، ދަތުރުކުރާ މަގުގައި އޮތް ގައުމަކަށްވެފައި، ޚާއްސަކޮށް ރާއްޖޭގެ އުތުރުގައި އޮތް 8 ޑިގްރީ ޗެނަލަކީ ކާގޯ ބޯޓުފަހަރު ހުރަސްކުރާ ޗެނަލަކަށްވާތީ، މިކަމުން ހޯދެން އޮތް ނަފާއެއް ހޯދުމަކީ، މި ސަރަހައްދުގެ އެހެން ގައުމުތަކެކޭ އެއްގޮތަށް އަމާޒު ހިފިދާނެ ސިނާއަތެއް ކަމަށެވެ. ބޭރުގެ އާގުބޯޓުފަހަރަށް ޚިދުމަތް ދިނުމުގެ ސިނާޢަތެއް މިހިނދުން މިހިނދަށް ގާއިމުކުރުމަކީ، ބޭނުންތެރިކަމެއް ކަމަށް ގަރާރުގައި ފާހަގަކޮށްފައިވެއެވެ.

ރާއްޖެ ހުރަސްކޮށް ގައުމުތަކަށް ގެންދާ މުދަލުގެ އަގު އިތުރުވެފައިވާ ކަމަށާއި، ރާއްޖެ ހުރަސްކޮށްދާ ބޯޓުފަހަރު ކޮންމެ އަހަރަކު ހާހުން އިތުރުވަމުން އަންނަކަން ފާހަގަކޮށް ސަލީމް ވިދާޅުވީ، އެ ބޯޓުފަހަރުން ގެންދާ މުދަލުގެ އަގު ބިލިއަނުން ގުނާލެވޭ ކަމަށެވެ. އެހެންކަމުން އެ ސިނާއަތުގެ މަންފާ ހޯދުން މުހިއްމު ކަމަށެވެ. އެ މަންފާ ލިބޭނެ ޓްރާންސްޝިޕްމެންޓް ޕޯޓެއް، މިދިޔަ ދިގު މާޒީގައި ގާއިމުވެފައި ނެތް ކަމަށާއި، ރާއްޖެއަކީ މި ސިނާޢަތުން އެންމެ ފައިދާ ވާނެ ގައުމު ކަމުގައި ސަލީމް ވިދާޅުވިއެވެ. މިއީ އައު ވިސްނުމެއް ނޫން ކަމަށާއި، ކޮންމެވެސް ސަބަބަކާހެދި އެއަށް އަމަލީ ސިފައެއް މިހާތަނަށް ގެނެވިފައި ނުވާ ކަމަށެވެ.

މިފަދަ ބަނދަރެއް ގާއިމުކުރުމަށް ބިލިއަނުން އިންވެސްޓްމެންޓް ބޭނުންވާނެކަން ގަބޫލުފުޅުކުރެއްވޭ ކަމަށާއި، އެހެންނަމަވެސް އެވަރުގެ ފައިނޭންސާ ނުލައި ވެސް މިހާރުވެސް ކުރެވިދާނެ ކަންކަން އެބަހުރި ކަމަށް ސަލީމް ވިދާޅުވިއެވެ. ބޯޓުތައް ބަނދަރުކުރެވި، ކޮންޓެއިނަރުތައް ބާލައި، ކަންކަން ނުކުރެވުނަސް، އިހަވަންދިއްޕޮޅަކީ، ފަޅުވެރިންނަށް ޚިދުމަތްދެވޭނެ ޕޮއިންޓަކަށް ހެދިދާނެ ކަމަށް ސަލީމް ވިދާޅުވިއެވެ.