ހިތަދޫގައި އޮތީ ޕޯޓެއް ނޫން، ކޮންކްރީޓް ގަނޑެއް: ކެޕްޓަން ޝަރީފް

މިހާރު އައްޑޫ ސިޓީ ހިތަދޫގައި އޮތީ ޕޯޓެއް ނޫން ކަމަށާއި، އެއީ ކޮންކްރީޓް ގައު ގަނޑެއް ކަމަށް އެމްޕީއެލްގެ ޗެއަރމަން ކެޕްޓަން މުހައްމަދު ޝަރީފް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝަރީފް ވިދާޅުވީ ހިތަދޫގައި އޮތް ޕޯޓަކީ ރައީސް މައުމޫން އަބްދުލް ގައްޔޫމްގެ ސަރުކާރުގައި އަޅާފައި އޮތް ކޮންކްރީޓް ގައު ގަނޑެއް ކަމަށެވެ. އަދި އެއީ ބޯޓު ކައިރި ކުރެވޭ ގޮތަށް ހަދާފައި އޮތް ތަނެއް ނޫން ކަމަށެވެ. އެތަން ހަދާފައި އޮތީ ދަށަށް ފެން ވަންނަ ގޮތަކަށް ނޫން ކަމަށާއި، އެހެންކަމުން ބޯޓުގެ ވާތައް ކަނޑައިގެން ދިއުން ފަދަ ކަންކަމާ ކުރިމަތިލާންޖެހޭ ކަމަށެވެ.

މިކަންކަމަށް ހައްލު ގެނައުމަށް ހިތަދޫ ޕޯޓު ބޮޑުކުރުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްގެންދާކަން ޝަރީފް ފާހަގަކުރެއްވިއެވެ. މި މަސައްކަތުގެ އީއައިއޭ މަސައްކަތްތައް މިހާރު ކުރިއަށްދާއިރު ވަރަށް އަވަހަށް ޕޯޓު ހެދުމުގެ މަސައްކަތް ފަށާނެ ކަމަށް ޝަރީފް ވިދާޅުވިއެވެ. މި މަސައްކަތް ނިމުމުން 50 ޓަނުގެ ބޯޓުފަހަރު ޕޯޓަށް ވައްދާ ޚިދުމަތް ދެވޭނެ ކަމަށް ބެލެވޭ ކަމަށް ޝަރީފް ވިދާޅުވިއެވެ.

ހިތަދޫ ޕޯޓު މިހާރު ހަދާފައު އޮތް ގޮތުން އެ ޕޯޓުގެ ކީވޯލް އިންނަނީ ގަމު ކަނޑާއި ވިލިނގިލި ކަނޑާ ދިމާ މެދަށެވެ. އެތަނުގެ ބާނި އޮންނަ ގޮތުގެ ސަބަބުން އެތަނާ ކައިރިކޮށްފައި އޮންނަ ބޯޓުތައް ވަރަށް ބޮޑަށް ހަލާކުވާ ކަމަށް މީގެ ކުރިން އެމްޕީއެލްއިން ބުނެފައިވެއެވެ. އަދި ރައްކާތެރިކަމާއެކު މުދާ ބޭލުމުގައި ދަތިތަކެއް ކުރިމަތިވެއެވެ.

ކަމުގެ މާހިރުންނާ ގުޅިގެން އެމްޕީއެލްއިން ވަނީ ހިތަދޫ ޕޯޓުގެ މާސްޓަރ ޕްލޭން ތައްޔާރުކޮށްފައެވެ. އަދި އަލަށް ހަދާ ޕޯޓުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްގެންދާއިރު، މި ބަނދަރު ޑިޒައިންކޮށްފައިވަނީ ޕޯޓުގެ އެތެރެއަށް ވަދެވޭގޮތަށް ރައްކާތެރި ބަނދަރެއްގެ ގޮތުގައެވެ.

މާލޭގެ އިތުރުން ކުޅުދުއްފުށި ޕޯޓާއި، އައްޑޫ ހިތަދޫ ޕޯޓަކީ ބޭރުގެ ބައެއް ބޯޓުތަކުން ވެސް މުދަލާއެކު ޖައްސާ ޕޯޓުތަކެކެވެ.

އައްޑޫ ޕޯޓުގެ އިތުރުން ފުވައްމުލައް އަދި ކުޅުދުއްފުށި ސިޓީގައި ދަނީ ޕޯޓުތައް ގާއިމްކުރުމުގެ މަސައްކަތް ކުރަމުންނެވެ. މިޕޯޓުތަކާ ގުޅޭގޮތުން މީގެ ކުރިން ރާއްޖެޓީވީގެ ފަލަސުރުޚީ ޕްރޮގްރާމެއްގައި ވާހަކަފުޅު ދައްކަވަމުން ޝަރީފް ވިދާޅުވީ, އެމްޕީއެލްގެ ދަށުން ޕޯޓުތައް ހިންގި ނަމަވެސް އެޕޯޓުތައް ހިންގަމުންދާނީ އެ ރީޖަންއަށް ފައިދާވާގޮތަށް ކަމަށާއި، ވަކި ކުންފުންޏެއްގެ ދަށުން ކަމަށެވެ. އަދި ކުންފުނީގެ ބޯޑެއް އުފައްދައި، ޗެއަރމަނުންނާއި، ބޯޑު މެމްބަރުންނާއި، ކުންފުނީގެ ސީއީއޯ އަދި ޑެޕިއުޓީ ސީއީއޯއެއް އައްޔަންކުރާނެކަމަށެވެ.

ރައްޔިތުންނަށް ޚިދުމަތް ދިނުމުގައި ލުއި ގޮތްތައް ހަމަޖައްސާނެކަން ފާހަގަކުރައްވައި ޝަރީފް ވިދާޅުވީ, ރީޖަންތަކުގެ ޕޯޓުތައް މާލޭގެ ޕޯޓާ ވަރަށް ތަފާތުވާނެ ކަމަށާއި، ޖާގައިގެ ދަތިކަމެއް ކުރިމަތިވާނެކަމަށް ނުބެލެވޭ ކަމަށެވެ. އަދި މިހާރު ކައުންސިލްތަކަށް ލިބިދީފައިވާ ބާރުގެ ދަށުން, މިފަދަ ޕޯޓުތައް ހިންގުމުގައި ކައުންސިލްތަކުގެ އެއްބާރުލުން ލިބޭނެކަމަށް އުންމީދުކުރައްވާ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ ޕޯޓުތައް ތަރައްޤީ ކުރެވި އޮޕަރޭޓް ކުރެވެން ފެށުމާއެކު، ވިޔަފާރިވެރިންނާއި ރައްޔިތުންނަށް ބޮޑެތި ލުއިފަސޭހަތަކެއް ލިބޭނެ ކަމަށެވެ. އަދި މުދަލުގެ އަގު ހެޔޮވެ އިގުތިސާދަށް އޭގެ ހެޔޮ ބަދަލު އަންނާނެ ކަމަށް ޝަރީފް ވިދާޅުވިއެވެ.