ހިލޭސާބަހަށް ބާސާއަށް ކުޅެދޭން އެއްވެސް މީހަކު އެދިފައެއް ނެތް: މެސީ
ބާސާގެ ޓެކްނިކަލް ސެކްރެޓަރީގެ މަގާމު ބޭނުންވޭ
ބާސާގެ ވަދާއީ ނޫސްވެރިންގެ ބައްދަލުވުމުގެ ތެރެއިން އާޖެންޓީނާގެ ތަރި ލިއޮނެލް މެސީ
ބާސެލޯނާ ދޫކޮށްލުމުގެ ބަދަލުގައި އެ ޓީމަށް ހިލޭސާބަހަށް ބާސާއަށް ކުޅެދޭން އެއްވެސް މީހަކު އެދިފައިނުވާ ކަމަށް އާޖެންޓީނާގެ ތަރި ލިއޮނަލް މެސީ ބުނެފިއެވެ.
މި އަހަރުގެ ޖޫން މަހުގެ 30 ވަނަ ދުވަހު ބާސާއާއެކު އުމުރުން 34 އަހަރުގެ މެސީ ހަދާފައި އޮތް އެއްބަސްވުން ހަމަވިއެވެ. އެކަމަކު މުސާރަ ކުޑަކޮށް އައު އެއްބަސްވުމެއްގައި ސޮއިކުރަން މެސީ މީގެ ކުރިން ނިންމި ކަމަށް ސްޕެއިނުގެ މީޑިއާތަކުން ރިޕޯޓުކުރިއެވެ. އަދި 2026 ވަނަ އަހަރުގެ ނިޔަލަށް ބާސާގައި މެސީ މަޑުކުރާނެ ކަމަށްވެސް އޭރު ރިޕޯޓުކުރިއެވެ.
އެކަމަކު އޭގެ ފަހުން ބާސާއިން ނެރުނު ބަޔާނެއްގައި ވަނީ އެއްބަސްވުން އާނުކުރެވުމާ ގުޅިގެން އެންމެ ފަހުން މެސީ ދޫކޮށްލަން ނިންމާފައިވާ ކަމަށް ބުނެފައެވެ. އެ ބަޔާނުގައި ބުނެފައިވާ ގޮތުން އެއްބަސްވުމުގައި ސޮއިކުރުމުގެ ހުރިހާ ކަމެއް ހަމަޖެހިފައި ވަނިކޮށް މައްސަލަތަކެއް ކުރިމަތިވީ ސްޕެނިޝް ލީގުގެ މާލީ ގަވާއިދުތަކުގެ ސަބަބުން ކަމަށެވެ. އެހެންކަމުން މެސީ ދޫކޮށްލުން ނޫން އެހެން ގޮތެއް މި ވަގުތު ނެތް ކަމަށްވެސް އެ ބަޔާނުގައި ވަނީ ބުނެފައެވެ.
މިދިޔަ އޮކްޓޯބަރު މަހުގެ ތެރޭގައި ދެއްވި އިންޓަވިއުއެއްގައި ބާސާގެ ރައީސް ޖޮއާން ލަޕޯޓާ ވިދާޅުވީ މެސީވެސް ބާސާގައި މަޑުކުރަން ބޭނުންވި ކަމަށާއި، އެކަމަކު އޭނާ ޓީމު ދޫކޮށްލަން ނިންމީ ޕީއެސްޖީން ލިބިފައި އޮތް ހުށަހެޅުމުގެ ޕްރެޝަރުގެ އިތުރުން ބާސާ އިތުރު މާލީ އަދަވަޅަކަށް ވައްޓާލަން ބޭނުންނުވާތީ ކަމަށެވެ. އެކަމަކުވެސް މެސީގެ ނިންމުން ބަދަލުކޮށް ބާސާއަށް ހިލޭ ކުޅެދޭން މަޑުކުރާނެ ކަމަށް އުއްމީދުކުރި ކަމަށްވެސް ވަނީ ބުނެފައެވެ.
އެ ވާހަކަތަކަށް ރައްދުދެމުން ދާދި ފަހުން ދިން އިންޓަވިއުއެއްގައި މެސީ ބުނީ ހިލޭސާބަހަށް ބާސާއަށް ކުޅެދޭން އެއްވެސް މީހަކު އޭނާގެ ގާތުގައި އެދިފައިނުވާ ކަމަށެވެ. އެގޮތުން މުސާރާއިގެ 50 އިންސައްތަ ކުޑަކުރަން އެދުމުން އެކަމަށް އެއްބަސްވި ކަމަށާއި، އެގޮތަށް އަމަލުކޮށްފައި ވަނިކޮށް ބާސާގެ ރައީސް އެ މޭރުމުން ވާހަކަ ދެއްކުމުން ދެރަވި ކަމަށްވެސް މެސީ ވަނީ ބުނެފައެވެ.
މި އިންޓަވިއުގައި ކުރިމަގާ ބެހޭ ގޮތުން މެސީ ބުނީ މިހާރު ޕީއެސްޖީއަށް ކުޅުނު ނަމަވެސް ކެރިއަރުގެ ކޮންމެވެސް ހިސާބެއްގައި އަދިވެސް ބާސާއަށް ޚިދުމަތްކޮށްދޭން ބޭނުންވާ ކަމަށެވެ. އަދި ބޭނުންވަނީ ކުލަބުގެ ޓެކްނިކަލް ސެކްރެޓަރީ ފަދަ މަގާމެއް ކަމަށްވެސް ވަނީ ބުނެފައެވެ.
ބާސާގައި 21 އަހަރު ހޭދަކުރުމަށްފަހު މެސީ ޕީއެސްޖީއަށް ބަދަލުވިއިރު، އޭނާ ވަނީ ޕީއެސްޖީއާއެކު ދެ އަހަރުގެ އެއްބަސްވުމެއް ހަދާފައެވެ. އެހެންކަމުން އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ. އަދި މި އެއްބަސްވުމުގެ ދަށުން ޕީއެސްޖީން ބޭނުންނަމަ މެސީ އިތުރު އެއް އަހަރަށް އެ ޓީމުގައި މަޑުކުރުވޭނެއެވެ. ރިޕޯޓުތައް ބުނާ ގޮތުން ޕީއެސްޖީއާއެކު މެސީ ހަދާފައިވާ އެއްބަސްވުމުގެ ދަށުން އޭނާއަށް އަހަރެއްގެ މައްޗަށް 35 މިލިޔަން ޔޫރޯގެ މުސާރާއެއް ލިބެއެވެ.
