މިހާރު މުޅި ދުނިޔޭގެ ސަމާލުކަން ހުއްޓިފައި އޮތީ މޫސުމީ ބަދަލުތަކާއެކު ދުނިޔެއަށް ކުރިމަތިވެފައިވާ ބިރުވެރިކަމުން ސަލާމަތްވުމަށް ސްކޮޓްލެންޑްގެ ގްލާސްގޯގައި ބާއްވާ ކޮޕް26 އަށެވެ. މިސަމިޓަކީ މޫސުމީ ބަދަލުތަކުގެ ސަބަބުން ދުނިޔެއަށް ދިމާވެފައިވާ ގޮންޖެހުންތަކުން އަރައިގަތުމަށް ލިބޭނެ ރަނުގެ ފުރުސަތެކެވެ.
ކޮޕް26 އެންމެ ފުރަތަމަ ބާއްވަން ހަމަޖެހިފައި އޮތީ މިދިޔަ އަހަރުއެވެ. އެހެންނަމަވެސް ކޮވިޑް-19ގެ ސަބަބުން މިސަމިޓް ވަނީ މި އަހަރަށް ފަސްކުރެވިފައެވެ. މިސަމިޓްގެ އެންމެ ބޮޑު އެއް އަމާޒަކީ ޖައްވު ހޫނުވުމުގެ މައްސަލައަށް ޙައްލެއް ގެނައުމުގެ ގޮތުން ޖައްވުގެ ހޫނުމިން 1.5 ޑިގްރީ ސެލްޝިއަސްއަށްވުރެ މަތިވިޔަ ނުދީ ހިފެހެއްޓުމެވެ.
ދުނިޔޭގެ ގިނަ އަދަދެއްގެ ގައުމުތަކުން ބައިވެރިވާ މިސަޓާ ގުޅިގެން ކޮޕް26ގެ ރައީސް އަލޯކް ޝަރްމާ ވިދާޅުވީ މިސަމިޓް ނިންމާލަން ވާނީ 1.5 ރޭޓުގައި ޖައްވުގެ ހޫނުމިން ބެހެއްޓޭނެ ކަމުގެ ޖަގީންކަމާއެކު ކަމަށެވެ.
މިހާރު ޖައްވުގެ ހޫނުމިން ހުރީ 1.1 ޑިގްރީ ސެލްޝިއަސްގައި. 1.5 ޑިގްރީ ސެލްޝިއަސްއަށްވުރެ ހޫނުމިން މަތިވެއްޖެ ނަމަ ކަނޑުއަޑީގައި ވާނެ ގައުމުތަކެއް އެބަހުރި. އެހެންވެ ކުރިއަށް އޮތް 10 އަހަރު ދުވަހު މޫސުމީ ބަދަލުތަކާމެދު އަމަލުކުރާނެ ގޮތްތަކެއް ކަނޑައެޅުން މުހިންމުވަނީއަލޯކް ޝަރްމާ - ކޮޕް26ގެ ރައީސް
ފްރާންސްގެ ޕެރިސްގައި 2015 ވަނަ އަހަރު ބޭއްވުނު ބައްދަލުވުމުގައި އަމާޒަކަށް ހަދާފައިވަނި ޖައްވުގެ ހޫނުމިން 1.5 ޑިގްރީއަށްވުރެ މައްޗަށް ދިޔަނުދިނުމަށެވެ. ގާތް ގަނޑަކަށް 200 ގައުމަކުން ސޮއިކޮށް 2015 ގައި ހަދާފައިވާ އެއްބަސްވުން އިސްލާޙު ކުރުމުގެ އިތުރުން އެކަންތައްތައް ތަންފީޒު ކުރަން ފެށުމަށް މިފަހަރުގެ ސަމިޓުގައި ޚާއްސަ ސަމާލުލަމެއް ދޭނެއެވެ.
އެކަމަކު މިކަންތައްތައް ކުރުމަށްޓަކައި ގިނަ މަސައްކަތްތަކެއް ކުރަން އެބަހުއްޓެވެ.
އިޓަލީގެ ރޯމްގައި، ދުނިޔޭގެ ބޮޑު 20 އިޤްތިޞާދުތަކުން މިދިޔަ އާދީއްތަ ދުވަހު ބޭއްވި ބައްދަލުވުމުގައި ނިންމާފައިވަނީ 1.5 ޑިގްރީއަށްވުރެ މަތިނުވާގޮތަށް ޖައްވުގެ ހޫނުމިން ބެހެއްޓުމަށް ގިނަ މަސައްކަތްތަކެއް ކުރުމަށެވެ. އަދި މިކަމަށް ޚާއްސަ ސަމާލުކަމެއް ދިނުމަށް ވެސް އެގައުމުތަކުން ވަނީ އެއްބަސްވެފައެވެ.
ޖީ20ގެ ގައުމުތަކުން މި އެއްބަސްވުން ހެދިއިރު، މިގައުމުތަކުގެ ތެރޭގައި ބްރެޒިލް، ޗައިނާ، އިންޑިއާ އަދި އެމެރިކާ ހިމެނެއެވެ. ދުނިޔޭގެ ނިސްބަތުން ބަލާނަމަ ޖައްވަށް ދޫކުރާ ވިހަ މާއްދާތަކުގެ ތެރެއިން 80 އިންސައްތައަކީ މިގައުމުތަކުން ޖައްވަށް ދޫކުރާ ވިހަ ގޭހެވެ.
ދުނިޔޭގެ އެންމެ ބޮޑު އިޤްތިޞާދު ކަމުގައިވާ އެމެރިކާއިން މޫސުމީ ބަދަލުތަކާ ގުޅިގެން އދ.ން ބާއްވާ ބައްދަލުވުމެއްގައި ބައިވެރިނުވާތާ ގިނަ ދުވަސްތަކަކަށްފަހު މިސަމިޓުގައި ބައިވެރިވުމަކީ މި މަސައްކަތަށް ލިބޭނެ ވަރަށް ބޮޑު ހިތްވަރެކެވެ. ޑޮނަލްޑް ޓްރަމްޕުގެ ވެރިކަމުގައި ފާއިތުވި ހަތަރު އަހަރު އެމެރިކާއިން މިފަދަ ބައްދަލުވުމެއްގައި ބައިވެރިވެފައެއްނުވެއެވެ.
މި ފަހަރުގެ ސަމިޓުގައި އެމެރިކާގެ ރައީސް ޖޯ ބައިޑެން ބައިވެރިވެ މޫސުމީ ބަދަލުތަކާ އެކަމުން އަރައިގަތުމަށް ފައިސާ ޚަރަދު ކުިރާނެ ގޮތްތަކާއި މެދު މަޝްވަރާ ކުރައްވާނެއެވެ. އަދި އެމެރިކާގެ ކުންފުނިތަކުން ޖައްވަށް ދޫކުރާ ވިހަ ގޭހުގެ މިންވަރު މަދުކުރެވޭނެ މިންވަރާއި މެދުވެސް މަޝްވަރާ ކުރައްވާނެއެވެ.
މި ފަހަރުގެ ސަމިޓުގައި އެކި ގައުމުތަކާއި، ކުންފުނިތަކާއި، ޖަމިއްޔާތަކުން ޖުމްލަ 25،000 މަންދޫބުން ބައިވެރިވާނެއެވެ.
އެކި ފަންތީގެ ގައުމުތަކުން މިސަމިޓުގައި ބައިވެރިވާއިރު، އެންމެ ބޮޑަށް ދެކެވޭ އެއްވާހަކައަކީ ކުދި ގައުމުތަކުގެ އަޑު މިފަދަ ފޯރަމްތަކުގައި މަޑުވުމެވެ. ބައެއް ކުދި ގައުމުތަކަކީ ޖައްވު ހޫނުވުމުގެ ސަބަބުން އެންމެ ބޮޑަށް އަސަރު ކުރާ ގައުމުތަކަށް ވާއިރު، އެގައުމުތަކުގެ އަޑު މިފޯރަމުން އިއްވިދާނެތޯ ގިނަ ބަޔަކު އަންނަނީ ސުވާލު އުފައްދަމުންނެވެ.
