އިޓާލިއަން ލީގުގައި އާދީއްތަ ދުވަހު ކުޅުނު މެޗުތަކުން އޭސީ މިލާނާއި އެންމެ ފަހުގެ ޗެމްޕިއަން އިންޓަ މިލާނުން މުހިންމު މޮޅެއް ހޯދައިފިއެވެ.

ރަށުން ބޭރުގައި ކުޅުނު މެޗުން މިލާން މޮޅުވީ ރޯމާ އަތުން 2-1 ގެ ނަތީޖާއަކުންނެވެ.

އާދީއްތަ ދުވަހުގެރޭ ކުޅުނު މެޗު ފަށައިގެން މިލާނުން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 26 ވަނަ މިނެޓުގައި ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ޒްލަޓާން އިބްރަހިމޮވިޗެވެ. މިއީ އުމުރުން 40 އަހަރުގެ އިބްރަހިމޮވިޗް، އޭނާ މިހާތަނަށް ކުޅުނު ހުރިހާ ލީގެއް ހިމަނައިގެން ކާމިޔާބުކުރި 400 ވަނަ ލަނޑެވެ.

އިބްރަހިމޮވިޗްގެ ލަނޑުން މިލާނުން ލީޑު ނެގިއިރު، ދެވަނަ ހާފު ފަށައިގެން ފަސްވަނަ މިނެޓުގައި އޭނާ ވަނީ އިތުރު ލަނޑެއް ޖަހާފައެވެ. އެކަމަކު އެ ލަނޑު ޖެހުމުގެ ކުރިން އިބްރަހިމޮވިޗް އޮފްސައިޑުގައި ހުރުމުން، ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. އެކަމަކު އޭގެ ހަތް މިނެޓު ފަހުން ލިބުނު ޕެނަލްޓީއަކުން ފްރޭންކް ކެސިއޭ ވަނީ ލަނޑެއް ޖަހައި، މިލާނުގެ ލީޑު ފުޅާކޮށްދީފައެވެ. މިއީ އޭރިއާ ތެރެއިން މިލާނުގެ އިބްރަހިމޮވިޗަށް ކުރި ފައުލަކަށް ރެފުރީ ދިން ޕެނަލްޓީއެކެވެ.

އޭގެ ފަހުން މި މެޗުގައި މިލާނަށް މައްސަލަތަކެއް ކުރިމަތިވީ މެޗުގެ 66 ވަނަ މިނެޓުގައި އެ ޓީމުގެ ތެއޯ ހެނާންޑޭޒަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އެއާއެކު މިލާނުގެ ކުޅުންތެރިއަކު މަދުވުމުގެ ފައިދާނަގައި، މެޗުގެ އިތުރު ވަގުތުގައި ރޯމާއިން ވަނީ ފަރަގު ކުޑަކޮށްފައެވެ. އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އެލް ޝަރާވީއެވެ.

މި މެޗުން މިލާން މޮޅުވިއިރު، އާދީއްތަ ދުވަހުގެ ހަވީރު ކުޅުނު މެޗުން އިންޓަ މޮޅުވީ އުދިނޭޒީ އަތުން 2-0 ގެ ނަތީޖާއަކުންނެވެ.

އިންޓަގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން 15 ވަނަ މިނެޓުގައި އިންޓައިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހޮއަކީން ކޮރެއާއެވެ. އަދި އޭގެ އަށް މިނެޓު ފަހުން އިންޓައިން ލީޑު ފުޅާކުރިއިރު، ޑެންޒެލް ޑަމްފްރީސް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖެހި ކޮރެއާއެވެ.

މި މޮޅާއެކު އިންޓަ އޮތީ ތާވަލުގެ ތިންވަނައިގައި ކުޅުނު 11 މެޗުން ލިބުނު 24 ޕޮއިންޓާއެކުއެވެ. އެއްވަނައިގައި އޮތް ނާޕޮލީ އާއި ދެވަނައިގައި އޮތް މިލާނަށް 11 މެޗުން 31 ޕޮއިންޓް ލިބިފައިވާއިރު، ނާޕޮލީއަށް ކުރި ލިބެނީ ފައިދާ ލަނޑުގެ ތަފާތުންނެވެ.