ޕާކިސްތާން ސެމީއާ ގާތަށް، ވެސްޓް އިންޑީޒަށް ފުރަތަމަ މޮޅު

މިހާރު ކުރިއަށްދާ ޓީ20 ވޯލްޑް ކަޕުގައި ހުކުރު ދުވަހު ކުޅުނު މެޗުތަކުން އަފްޣާނިސްތާން އަތުން މޮޅުވެ ސެމީފައިނަލާ ގާތަށް ޕާކިސްތާން ޖެހިލިއިރު، ބަންގްލަދޭޝް އަތުން އެންމެ ފަހުގެ ޗެމްޕިއަން ވެސްޓް އިންޑީޒް ފުރަތަމަ މޮޅު ހޯދައިފިއެވެ.

ގްރޫޕް ދޭއްގައި ހިމެނޭ ޕާކިސްތާނުން މި މުބާރާތުގައި ކުޅުނު ތިންވަނަ މެޗުން މޮޅުވީ އަފްޣާނިސްތާން އަތުން ފަސް ވިކެޓުންނެވެ.

ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅުނު މެޗުގެ ޓޮސް ދިމާވުމުން އަފްޣާނިސްތާން އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަ ކުޅުންތެރިން ނުބައިވެގެން ހެދުނީ 147 ލަނޑެވެ. އެ ގައުމުން އެންމެ ރަނގަޅަށް ކުޅުނީ 25 ބޯޅައިން 35 ލަނޑު ހެދި ގުލްބަދީން ނައިބު އާއި 32 ބޯޅައިން 35 ލަނޑު ހަމަކުރި މުޙައްމަދު ނަބީއެވެ.

ޖަވާބުގައި ޕާކިސްތާން ކުޅެން އަރައި 19 އޯވަރުގެ ތެރޭގައި ފަސް ކުޅުންތެރިން ނުބައިވެގެން ވަނީ 148 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 47 ބޯޅައިން 51 ލަނޑު ހެދި ބަބަރް އައްޒާމެވެ. ދެން މި މެޗުގައި ވިދާލި އަނެއް ކުޅުންތެރިއަކީ އެންމެ ހަތް ބޯޅައިން 25 ލަނޑު ހަމަކުރި ޕާކިސްތާނުގެ އާސިފް އަލީއެވެ.

މި މެޗުން މޮޅުވެ ގްރޫޕް ދޭއްގެ އެއްވަނައިގައި ޕާކިސްތާން އޮތްއިރު، އެ ޓީމުން ވަނީ މި މުބާރާތުގައި މިހާތަނަށް ކުޅުނު ތިން މެޗުންވެސް މޮޅުވެފައެވެ. އެއާއެކު ޕާކިސްތާނަށް ހަ ޕޮއިންޓް ލިބިފައިވާއިރު، ދެވަނައިގައި އޮތް އަފްޣާނިސްތާނާއި ތިންވަނައިގައި އޮތް ނެމިބިއާއަށް ލިބިފައިވަނީ ދެ ޕޮއިންޓެވެ.

މީގެ އިތުރުން ހުކުރު ދުވަހު ކުޅުނު މެޗުން މި ފަހަރުގެ މުބާރާތުގެ ގްރޫޕް އެކެއްގައި ހިމެނޭ އެންމެ ފަހުގެ ޗެމްޕިއަން ވެސްޓް އިންޑީޒް މޮޅުވީ ބަންގްލަދޭޝް އަތުން ތިން ލަނޑުންނެވެ.

މި މެޗުގެ ޓޮސް ދިމާވުމުން ބަންގްލަދޭޝްއިން ނިންމީ ހޮވުމަށެވެ. އެއާއެކު ވެސްޓް އިންޑީޒް އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ވަނީ 142 ލަނޑު ހަދާފައެވެ. އެ ގައުމުން އެންމެ ރަނގަޅަށް ކުޅުނީ 22 ބޯޅައިން 40 ލަނޑު ހެދި ނިކޮލަސް ޕޫރަން އާއި 46 ބޯޅައިން 39 ލަނޑު ހަމަކުރި ރޮސްޓޮން ޗޭސްއެވެ.

ޖަވާބުގައި ބަންގްލަދޭޝް ކުޅެން އަރައި 20 އޯވަރު ހަމަވިއިރު، ފަސް ކުޅުންތެރިއަކު ނުބައިވެގެން ހެދުނީ 139 ލަނޑެވެ. އެ ގައުމުން އެންމެ ރަނގަޅަށް ކުޅުނީ 43 ބޯޅައިން 44 ލަނޑު ހެދި ލިޓޮން ދާސް އާއި 24 ބޯޅައިން 31 ލަނޑު ހަމަކުރި މުޙައްމަދުﷲ އެވެ.

މި މެޗުން ވެސްޓް އިންޑީޒް މޮޅުވިއިރު، މީގެ ކުރިން ކުޅުނު ދެ މެޗުންވެސް އެ ޓީމު ވަނީ ބަލިވެފައެވެ. އެއާއެކު ތާވަލުގެ ފުލުން ދެވަނައިގައި އޮތް ވެސްޓް އިންޑީޒަށް ލިބިފައިވަނީ ދެ ޕޮއިންޓެވެ. އަދި ފުލުގައި އޮތް ބަންގްލަދޭޝަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.