ބޮޑެތި ވިޔަފާރިތަކަކާއެކު އެމްއެންޔޫއެސްޔޫ-ބީއެސްއެސްއޭ ބިޒްނަސް ފޯރަމް މާދަމާ ފަށަނީ

ބޮޑެތި ވިޔަފާރިތަކެއްގެ ބައިވެރިވުމާއެކު ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) ގެ ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީއެސްއެސްއޭ) އިން މާދަމާ ބިޒްނަސް ފޯރަމެއް ފަށާނެއެވެ.

އެމްއެންޔޫއެސްޔޫ-ބީއެސްއެސްއޭ ބިޒްނަސް ފޯރަމް ކުރިއަށް ގެންދިއުމަށް ހަމަޖެހިފައި ވަނީ މިމަހުގެ 29ން 30ށް އެމްއެންޔޫ ބިޒްނަސް ސްކޫލުގައެވެ. ހުކުރު ދުވަހު މިފޯރަމް އޮންނާނީ ހަވީރު 16:00ން 22:00ށް އެވެ. އަދި ހޮނިހިރު ދުވަހު 09:00ން 22:00ށް އެވެ.

މިފޯރަމްގައި ރާއްޖޭގެ ނަން ފަވާލެވޭ އެކި ދާއިރާތަކުގެ ބޮޑެތި ވިޔަފާރިތަކެއް ބައިވެރިވާނެއެވެ. އެގޮތުން އެމް ކިޔަން، ސޫޓީ ކަލެކްޝަން، ވަން ޝޮޓް އިވެންޓްސް، ނެކްސްޓް ސޮލޫޝަން، ޔުނިކް ލައިފްސްޓައިލްގެ އިތުރުން ބޭކްސް ބައި ފިރާ މިފޯރަމްގައި ބައިވެރިވުމަށް ވަނީ ހަމަޖެހިފައެވެ. އަދި ސްކޫޕްގެ ފުޑް ސްޓޯލެއް ވެސް މިފޯރަމްގައި ހުންނާނެއެވެ.

ރާއްޖޭގެ ވިޔަފާރިތަކާ ގުޅޭގޮތުން މައުލޫމާތު ދިނުމަށް ބާއްވާ މިފޯރަމްގައި ބައިވެރިވާ ކުންފުނިތަކުގެ ހިންގުމުގެ ވައްޓަފާޅިއާއި ކާމިޔާބީއަށް ވާސިލުވި ގޮތް މި ފޯރަމްގެ ބައިވެރިންނާއި ހިއްސާ ކުރެވިގެންދާނެއެވެ. އެހެންކަމުން މިއީ އަލަށް ވިޔަފާރިއެއް ފަށަން މަސައްކަތް ކުރާ ފަރާތްތަކަށް މުހިންމު ފޯރަމަކަށް ވެގެންދާނެއެވެ.

އާންމުންނަށް ހުޅުވާލައިގެން ކުރިއަށް ގެންދާ މިފޯރަމްގައި ސީއެޗްއެސްސީގެ އިތުރުން އަހްމަދިއްޔާ، ޣިޔާސުއްދީން، ކަލާފާނު، އިމާދުއްދީން އަދި ހިރިޔާ ސްކޫލުގެ ދަރިވަރުން ބައިވެރިވާނެއެވެ.