ބިޒްނަސް ސެންޓަ ކޯޕަރޭޝަން ލިމިޓެޑް (ބީސީސީ) ރަޖިސްޓްރީކޮށް، އެ ކުންފުނީގެ ބޯޑު އިއުލާނުކޮށްފި އެވެ.

ޕްރައިވެޓައިޒޭޝަން ބޯޑްގެ ރައީސް މުހައްމަދު ނިޒާރު ކުރެއްވި ޓްވީޓެއްގައި ވިދާޅުވެފައިވާ ގޮތުގައި، ބިޒްނަސް ސެންޓަ ކޯޕަރޭޝަންގެ ޗެއާމަނަކަށް އައްޔަން ކުރައްވާފައި ވަނީ ހދ. ކުޅުދުއްފުށީ އިނގުރުމާގޭ ސޯލިހް ހުސައިން އެވެ. އަދި ކުންފުނީގެ މެނޭޖިން ޑިރެކްޓަރަކަށް ކަނޑައަޅާފައިވަނީ އަހްމަދު މުންތާޒެވެ. ޑިރެކްޓަރުންގެ ގޮތުގައި ކަނޑައަޅާފައިވާ ތިން ބޭފުޅުންނަކީ މއ. މާފުނަ، ހަސަން މިރާސް އާއި، މ. ބުރަދަމާގޭ ސާދާ މުހައްމަދު އަދި ގދ. ފިޔޯރީ، ދަނޑިކޮށީގޭ އަލީ ނާޝިދެވެ.

ނިޒާރު ވިދާޅުވި ގޮތުގައި ބީސީސީ ރަސްމީކޮށް ރަޖިސްޓްރީކޮށްފައި ވަނީ މިދިޔަ ބުރާސްފަތި ދުވަހު ކަމަށެވެ.

ބީސީސީގެ ޗެއާމަން އާއި މެނޭޖިން ޑިރެކްޓަރު މިހާތަނަށް އުޅުއްވީ އިކޮނޮމިކް ޑިވޮލެޕްމެންޓް މިނިސްޓްރީގައި ކަމަށް ވެސް ނިޒާރު ވިދާޅުވި އެވެ.

ރައީސްގެ ގަރާރަކުން ބީސީސީ އުފެއްދުމަށް މާޗް މަހު ނިންމެވީ، ކުދި އަދި މެދުފަންތީގެ ވިޔަފާރިތައް ތަރައްގީ ކުރުމަށް އެހީތެރިވުމަށެވެ. ސަތޭކަ ޕަސެންޓް ސަރުކާރު ހިއްސާ އޮންނަ މި ކުންފުނީގެ ރައުސުލްމާލަކީ 500،000 ރުފިޔާ އެވެ.