އިންވެސްޓްމަންޓް ފޯރަމް ފެށެން 3 ދުވަސް – އަޑެއް ބަޑެއް ނީވޭ!

ރައީސް ޔާމީން ވެރިކަމަށް ވަޑައިގެންނެވިފަހުން ސިލްސިލާކޮށް ކޮންމެ އަހަރަކު ބާއްވަމުން އަންނަ އިންވެސްޓްމަންޓް ފޯރަމްތަކުގެ ތެރެއިން މިއަހަރު ޑުބާއީގައި ބާއްވާ ފޯރަން ފެށެން 3 ދުވަހަށް ވެފައިވާއިރު، މިފޯރަމަށް އެކަށީގެންވާ ވަރުގެ ތަރުހީބެއް ލިބެމުން ނުދާކަމަށް ބައެއް ފަރާތްތަކުން ބުނަން ފަށައިފިއެވެ.

މިމަހުގެ 18ވަނަ ދުވަހުގެ ޑުބާއީގެ އިންޓަނޭޝަނަލް ކޮންވެންޝަން އެންޑް އެގްޒިބިޝަން ސެންޓަރގެ ޝެއިޚް މަޚްތޫމް ހޯލްގައި ބާއްވާ އިންވެސްޓްމަންޓް ފޯރަމްގައި 350 ފަރާތަކުން ބައިވެރިވާކަމަށް ސަރުކާރާއި ހަވާލާދީ ބައެއް މީޑިއާތަކުގައި ރިޕޯޓްކޮށްފައިވެއެވެ. މީގެ ތެރެއިން 70 ފަރާތަކީ ރާއްޖޭގެ އެކި ފަރާތްތަކެވެ. ޤަތަރުގައި ބޭއްވުމަށް ކުރިން ނިންމި ނަމަވެސް، މިއަހަރުގެ އިންވެސްޓްމަންޓް ފޯރަމް ޑުބާއީގައި ބާއްވާ ގޮތަށް ހަމަޖެއްސީ ޤަތަރާއި އެކު އޮންނަ ސިޔާސީ ގުޅުން ކަނޑާލަން ދިވެހި ސަރުކާރުން ނިންމުމާއި ގުޅިގެންނެވެ.

އިންވެސްޓްމަންޓް ފޯރަމްގެ ދައުވަތު

މިއަހަރުގެ ފޯރަމްގައި ރާއްޖޭގައި އިންވެސްޓްކޮށްފައިވާ، ރައީސް ޔާމީންގެ ސަރުކާރާއި އަރިސް ބައެއް ބޭފުޅުން ވާހަކަ ދައްކަވާ ގޮތަށް ވަނީ ހަމަޖެހިފައެވެ.

ފޯރަމް ފެށެން 3 ދުވަހަށްވެފައިވާއިރު، ޑުބާއީގެ މީޑިއާގައިވެސް އަދި އެހެން ގޮތްގޮތުންވެސް މިފޯރަމްގެ ވާހަކައެއް މާބޮޑަކަށް ނުދެކެވެއެވެ. މީގެ ކުރިންވެސް ސިންގަޕޯރ، އިންޑިއާ އަދި ޗައިނާގައި އިންވެސްޓްމަންޓް ފޯރަމްތައް ބާއްވާފައިވާއިރު، މިއިން އެއްވެސް ފޯރަމެއް މެދުވެރިކޮށް ދިވެހިރާއްޖޭގައި އިންވެސްޓްކުރަން އިންވެސްޓަރުން އައިސްފައެއް ނުވެއެވެ. އެހެން ނަމަވެސް ކޮންމެ އިންވެސްޓްމަންޓް ފޯރަމަކާއި ދިމާކޮށް، ރާއްޖެއަށް ސިއްސައިގެން ދާވަރުގެ އިންވެސްޓްމަންޓްތައް އަންނާނެކަމަށް ބުނެ، ސަރުކާރަށް ނިސްބަތްވާ މަޖިލިސް މެމްބަރުންނާއި ވަޒީރުން ވާހަކަ ދައްކަވައެވެ.