ޓޫރިޒަމް މިނިސްޓްރީ އާއި މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) ގުޅިގެން އައްޑޫ ސިޓީގައި ބާއްވަން ހަމަޖެއްސި "އައްޑޫ އިންވެސްޓާސް" ފޯރަމް މި އޭޕްރިލް މަހުގެ 22 ވަނަ ދުވަހު ބާއްވަން ނިންމައިފި އެވެ.
މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަންގެ އިސް އޮފިޝަލަކު ވިދާޅުވީ، ފޯރަމް ތަފާތު އެކި ފަހަރު މަތިން ފަސްކުރެވިފައިވާ ކަމަށާއި އެހެން ނަމަވެސް މިހާރު މި ފޯރަމް އަންނަ ހޮނިހިރު ދުވަހު ބޭއްވުމަށް ވާން ޖެހޭ އެންމެ ފަހުގެ ތައްޔާރީތައް ވަމުންދާ ކަމަށެވެ.
އައްޑޫ އިންވެސްޓާސް ފޯރަމަކީ އިންޓަގްރޭޓެޑް ޓޫރިޒަމްގެ ދަށުން އައްޑޫގެ މެދު ފަންތީގެ ޓޫރިޒަމަށް ބެޑް ކެޕޭސިޓީ އިތުރުކޮށް، ޓޫރިޒަމް ދާއިރާ ފުޅާކުރެވޭނެ ގޮތްތައް ފަހިކުރުން ކަމަށް އެމްއައިޓީޑީސީން މައުލޫމާތުދެއެވެ.
މި ފޯރަމްގައި ރާއްޖެ އާއި ރާއްޖޭން ބޭރުގެ އިންވެސްޓަރުން ބައިވެރިވާނެ އެވެ. އެގޮތުން 150 އިންވެސްޓަރުން މި ފޯރަމްގައި ބައިވެރިވާއިރު ފޯރަމް އޮންނާނީ އީކުއޭޓާރ ވިލެޖުގައެވެ.
އެގޮތުން ގެސްޓްހައުސް ހިންގާ ފަރާތްތަކާއި، ޓުއާ އޮޕަރޭޓަރުންނާއި ރާއްޖެ އާއި ރާއްޖެއިން ބޭރުގެ ބައެއް ބޭންކުތަކާއި ޓޫރިޒަމް ދާއިރާގައި ހަރަކާތްތެރިވާ މީހުން ހިމެނެ އެވެ.
އެމްއައިޓީޑީސީން ބުނީ އައްޑޫގައި 3000 ޓުއަރިސްޓު އެނދު އިތުރު ކުރުމަށް މިފޯރަމް އެހީތެރިވެގެންދާނެ ކަމަށެވެ.
