ރާއްޖޭގެ 23 އަހަރުން ދަށުގެ ގައުމީ ވޮލީބޯޅަ ޓީމަކީ މުސްތަގުބަލުގައި ނަތީޖާ ނެރޭނެ ޓީމެއް ކަމަށް އެ ޓީމުގެ ކޯޗުގެ މަގާމާ ހަވާލުވި ފަތުހުﷲ ވަހީދު (ފައްލޯ) ބުނެފިއެވެ.

ޒުވާން ޓީމާ ފައްލޯ ހަވާލުވިއިރު، އޭނާ ވަނީ މީގެ ކުރިން ގައުމީ ފެންވަރުގައި އެކި ކުލަބުތަކަށް ކޯޗުކަން ކޮށްދިނުމުގެ އިތުރުން، ގައުމީ އަންހެން ވޮލީބޯޅަ ޓީމުގައިވެސް ކޯޗެއްގެ ގޮތުންނާއި އެސިސްޓަންޓް ކޯޗެއްގެ ގޮތުގައި މަސައްކަތްކޮށްފައެވެ.

ޒުވާން ގައުމީ ޓީމަށް ޖާޒީ ހަވާލުކުރުމަށްޒުވާނުންގެ މަރުކަޒުގައި ހޯމަ ދުވަހުގެރޭ ބޭއްވި ރަސްމިއްޔާތަށްފަހު "ރާއްޖެ.އެމްވީ" އާ ވާހަކަ ދައްކަމުން ފައްލޯ ބުނީ މި ޓީމު އެކުލަވާލުމުގައި ބޮޑަށް ބެލީ ކުޅުންތެރިންގެ ހުނަރަށާއި، އިސްކޮޅުގެ އިތުރުން ފަރިތަކުރުންތަކުގައި ކުރި މަސައްކަތް ކަމަށެެވެ.

ފައްލޯ ބުނީ ޓީމަށް ކުޅުންތެރިން ނެގުންވީ ވަރަށް ބޮޑު ޗެލެންޖަކަށް ކަމަށާއި، ހާއްސަކޮށް ގިނަ ކުޅުންތެރިން އަތޮޅު ތެރޭގައި ތިބުމުން ކުދިންގެ މައިންބަފައިންނާ ވާހަކަ ދައްކައި، މާލެ ގެންނަން ޖެހުނު ކަމަށެވެ. އަދި ބައެއް ކުޅުންތެރިން ވަޒީފާގައި އުޅޭތީ އެކަމުގައިވެސް ދަތިތަކެއް ކުރިމަތިވި ކަމަވެސް ބުންޏެވެ.

ފައްލޯ އިތުރަށް ބުނީ ޒުވާން ޓީމުގެ ކުޅުންތެރިންނަށް ތަމްރީން ހެދުމުގެ ރަނގަޅު ފުރުސަތުތަކެއް ލިބިގެންދާނެ ކަމަށާއި، ހާއްސަކޮށް ސީނިއާ ގައުމީ ޓީމަށް ޒުވާން ޓީމުގެ ދެ ކުޅުންތެރިން އަރަން ލިބޭއިރު، އޭގެ ސަބަބުން ޒުވާން ޓީމުގެ ކުޅުންތެރިންނަށް ރަނގަޅު ތަޖުރިބާއެއް ލިބިގެންދާނެ ކަމަށެވެ.

އަދި ޒުވާން ގައުމީ ޓީމަކީ މުސްތަގުބަލުގައި ރާއްޖެއަށް ރަން ވަނަތަކެއް ގެންނާނެ ޓީމެއް ކަމަށާއި، އެ ޓީމަކީ ނަތީޖާ ނެރެވޭނެ ޓީމެއް ކަަމަށްވެސް ވަނީ ބުނެފައެވެ. މީގެ އިތުރުން މިހާރު އޮތް ސްކޮޑް އިތުރަށް ވަރުގަދަ ކުރުމުގެ މަސައްކަތް އަދިވެސް ކުރަމުން އަންނަ ކަމަށްވެސް ފައްލޯ ވަނީ ބުނެފައެވެ.

ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ޒުވާން ގައުމީ ޓީމު އެކުލަވާލާފައިވަނީ މި މަހުގެ ނުވަވަނަ ދުވަހުން ފެށިގެން ކުރިއަށްގެންދިޔަ ޓްރަޔަލްތަކުނެވެ. އެ ޓްރަޔަލްތަކުގައި 70 އަށްވުރެ ގިނަ ކުޅުންތެރިން ބައިވެރިވިއިރު، އޭގެ ތެރެއިން 30 ކުޅުންތެރިން ވަނީ ޒުވާން ގައުމީ ޓީމުގެ ސްކޮޑުގައި ހިމަނާފައެވެ.

މި ޓީމުގެ ކޯޗަކަށް ފައްލޯ ހަމަޖެއްސިއިރު، އެސިސްޓަންޓް ކޯޗަކަށް ހަމަޖެއްސީ 16 އަހަރު ވަންދެން ގައުމީ ޓީމަށް ކުޅުމަށްފަހު 2019 ވަނަ އަހަރު ކުޅުން ހުއްޓާލި، ރާއްޖޭގައި އުފެދުނު އެންމެ މޮޅު އެއް ވޮލީބޯޅަ ކުޅުންތެރިޔާ އަޙްމަދު އަބްދުލްކަރީމް (ލޯންގޭ) އެވެ. "ރާއްޖެ.އެމްވީ" އާ ވާހަކަ ދައްކަމުން ލޯންގޭ ބުނީ ޓީމު އެކުލަވާލަން ކުރިއަށްގެންދިޔަ ޓްރަޔަލްތަކުގައި ބައިވެރިވި ކުދިންގެ ހުނަރު އެބަހުރި ކަމަށާއި، އަދި އެ ކުޅުންތެރިންނާ މެދު ކުރެވޭ އުއްމީދުވެސް ބޮޑު ކަމަށެވެ.

ބޮޑު ޕްލޭނަކާއެކު ވީއޭއެމުން ޒުވާން ގައުމީ ވޮލީބޯޅަ ޓީމު އެކުލަވާލިއިރު، އަންނަ އަހަރު ގިނަ މުބާރާތްތަކެއްގައި ޒުވާން ގައުމީ ވޮލީބޯޅަ ޓީމު ވާދަކުރާނެއެވެ. އޭގެ ތެރޭގައި އަންނަ އަހަރު ޗައިނާގައި ބާއްވާ އޭޝިއަން ޔޫތު ގޭމްސް އާއި، އެ އަހަރުގެ އޮގަސްޓް މަހު ތުރުކީގައި ބާއްވާ އިސްލާމިކް ސޮލިޑާރިޓީ ގޭމްސް ހިމެނެއެވެ.