ސޫދާންގެ އަސްކަރިއްޔާއިން ބަޣާވާތްކޮށް އެގައުމުގެ ބޮޑުވަޒީރު އަބްދުﷲ ހަމްދޫކް ގޭބަންދުކޮށްފިއެވެ.
ސޫދާންގެ އަސްކަރިއްޔާއިން ހަމްދޫކްއާއެކު އެގައުމުގެ އިތުރު މިނިސްޓަރުންތަކެއް ވެސް ހައްޔަރުކޮށްފައިވާ ކަމަށް ރިޕޯޓުތައް ބުނެއެވެ. މީގެ ތެރޭގައި ހިމެނެނީ އިންޑަސްޓްރީ މިނިސްޓަރ އިބްރާހިމް އަލް-ޝެއިޚް، އިންފޮމޭޝަން މިނިސްޓަރ ހަމްޒާ ބަލޫލްގެ އިތުރުން ހަމްދޫކްގެ މީޑިއާ އެޑްވައިޒަރ ފައިސަލް މުޙައްމަދު ޞާލިޙްއެވެ. އަދި ސްޕޯކްސް ޕާރސަން މުޙައްމަދު އަލް-ފިކްރީ ސުލައިމާން އާއި ގަވަރުނަރ އައިމަން ޚާލިދް ވެސް ވަނީ ހައްޔަރުކޮށްފައެވެ.
ހަމްދޫކް ހައްޔަރުކުރުމުގެ ކުރިން މިދިޔަ ހޯމަ ދުވަހު ސުދާންގެ މިލިޓަރީން ވަނީ ހަމްދޫކް ދިރިއުޅުއްވާ ގެ ވަށާލާފައެވެ. މީގެ ކުރިން ހަމްދޫކް ވަނީ ގައުމުގައި އުފެދިފައިވާ ބައިބައިވުމަކީ އެންމެ ނުރައްކާތެރި ބަދަލުގެ ގޮތުގައި ފާހަގަކުރައްވާފައެވެ.
މިކަމާ ގުޅިގެން ސޫދާންގެ މިލިޓަރީން މިހާތަނަށް އެއްވެސް ބަހެއް ނުބުނެއެވެ. އެކަމަކު ސޫދާންގެ ސޮވެރެއިން ކައުންސިލްގެ ހެޑް އަބުލް ފައްތާހުލް ބުރްހާން މިކަމާ ގުޅޭގޮތުން މިއަދު ވާހަކަ ދައްކަވާނެ ކަމަށް ބެލެވެއެވެ.
ޚާތޫމް ސިޓީއަށް ދެވޭ އެގައުމުގެ ގިނަ މަގުތަކަކާއި ބްރިޖްތައް ސޫދާންގެ އަސްކަރިއްޔާއިން މިހާރު ވަނީ ބަންދުކޮށްފައެވެ. ސޫދާންގެ ރައީސް އޮފީހުގެ އިތުރުން ބޮޑުވަޒީރުގެ އޮފީސް ފަދަ މުހިންމު ގިނަ އިދާރާތަކެއް ހުންނަނީ ޚާތޫމް ސިޓީގައެވެ. އެހެންކަމުން މިސިޓީއަށް ދެވެން ހުރި މަގުތައް ބަންދު ކުރުމާއެކު ގިނަ ބަޔަކު އަންނަނީ މިކަމާ ކަންބޮޑުވުން ފާޅުކުރަމުންނެވެ.
