އިބްރަހިމޮވިޗުގެ ލަނޑާއެކު މިލާން އެއްވަނައަށް

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ބޮލޯނިއާ ބަލިކޮށް ތާވަލުގެ އެއްވަނައަށް އޭސީ މިލާން ޖެހިލައިފިއެވެ.

ރަށުން ބޭރުގައި ކުޅުނު މެޗުން މިލާން މޮޅުވީ 4-2 ގެ ނަތީޖާއަކުންނެވެ.

މި މެޗު ފަށައިގެން 16 ވަނަ މިނެޓުގައި މިލާނުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ރަފައެލް ލެއާއޯއެވެ. އަދި އޭގެ ހަތަރު މިނެޓު ފަހުން ބޮލޯނިއާއަށް މައްސަލަތަކެއް ކުރިމަތިވީ އެ ޓީމުގެ އަޑަމާ ސޫމާރޯއަށް ސީދާ ރަތް ކާޑެއް ދެއްކުމުންނެވެ. ރެފުރީ އޭނާއަށް ރަތް ކާޑެއް ދެއްކީ މިލާނުގެ ރާޑް ކްރުނިޗަށް ކުރި ފައުލަކާ ގުޅިގެންނެވެ.

އެއާއެކު ބޮލޯނިއާގެ އެއް ކުޅުންތެރިއަކު މަދުވުމުގެ ފައިދާނަގައި މެޗުގެ 35 ވަނަ މިނެޓުގައި މިލާނުން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ޑޭވިޑޭ ކަލާބްރިއާއެވެ.

މި މެޗުގެ ފުރަތަމަ ހާފުގައި އެއް ކުޅުންތެރިއަކު މަދުވި ނަމަވެސް، ދެވަނަ ހާފުގެ ކުރީކޮޅު ބޮލޯނިއާއިން ވަނީ މޮޅު ކުޅުމެއް ދައްކައި، ނަތީޖާ އެއްވަރުކޮށްފައެވެ. އެގޮތުން ދެވަނަ ހާފު ފަށައިގެން ހަތަރުވަނަ މިނެޓުގައި ބޮލޯނިއާއިން ފަރަގު ކުޑަކުރިއިރު، މިއީ މިލާނުގެ ޒްލަޓާން އިބްރަހިމޮވިޗް އަތުން ބައިކޮޅަށް ވަން ލަނޑެކެވެ. އަދި އޭގެ ތިން މިނެޓު ފަހުން މޫސާ ބަރޯ ވަނީ ބޮލޯނިއާއަށް ނަތީޖާ އެއްވަރުކޮށްދީފައެވެ.

ބޮލޯނިއާއިން މި މެޗުގައި ނަތީޖާ ހަމަހަމަކުރިތާ ހަ މިނެޓު ފަހުން އަނެއްކާވެސް އެ ޓީމުގެ ކުޅުންތެރިއަކަށް ވަނީ ސީދާ ރަތް ކާޑެއް ދައްކާފައެވެ. އެގޮތުން ބޮލޯނިއާގެ ރޮބާޓޯ ސޮރިއާނޯއަށް ރަތް ކާޑު ދެއްކީ މިލާނުގެ ފޮޑޭ ބާލޯ-ޓޯރޭއަށް ކުރި ނުރައްކާތެރި ފައުލަކާ ގުޅިގެން، ވީޑިއޯ އެސިސްޓަންޓް ރެފުރީ (ވީއޭއާރް) ގެ އެހީ ހޯދުމަށްފަހުއެވެ.

އެއާއެކު މެޗު ނިމެން ހަ މިނެޓަށް ވެފައި ވަނިކޮށް މިލާނުން ވަނީ މި މެޗުގައި އަލުން ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީއިސްމައެލް ބެނަސާއެވެ. އަދި މެޗުގެ ފަހު މިނެޓުގައި އިބްރަހިމޮވިޗް ވަނީ ލަނޑެއް ޖަހައި، މިލާނުގެ ލީޑު ފުޅާކޮށްދީފައެވެ.

މި މޮޅާއެކު ތާވަލުގެ އެއްވަނައަށް މިލާން ޖެހިލީ ކުޅުނު ނުވަ މެޗުން 25 ޕޮއިންޓް ހޯދައިގެންނެވެ. ދެވަނައިގައި އޮތް ނާޕޮލީއަށް އަށް މެޗުން ލިބިފައިވަނީ 24 ޕޮއިންޓެވެ. އެހެންކަމުން ލީގުގައި ލީގުގައި އާދީއްތަ ދުވަހުގެރޭ ރޯމާއާ ދެކޮޅަށް ކުޅޭ މެޗުން މޮޅުވެއްޖެނަމަ، ނާޕޮލީއަށް އަލުން އެއްވަނައަށް އެރޭނެއެވެ.