އެސްޓީއޯ މާލޭ ލީގުގައި ޔުނައިޓެޑް ވިކްޓްރީ ބަލިކުރުމަށްފަހު ޓީސީ ސްޕޯޓްސް ކްލަބް ޕޮއިންޓް ތާވަލުގެ އެއްވަނައަށް ޖެހިލައިފިއެވެ.

ހުކުރު ދުވަހު ހަވީރު ކުޅުނު މެޗު ޔޫވީއާ ވާދަކޮށް ޓީސީން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

ގަލޮޅު ރަސްމީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅެފައިވަނީވެސް ޓީސީންނެވެ. ފުރަތަމަ ފަހަރަށް މެޗުގައި ހަމަލާ އުފެއްދީވެސް އެޓީމުންނެވެ. އެގޮތުން ނުވަ ވަނަ މިނެޓުގައި ހަސަން ނާއިޒް (ދާދު) ފޮނުވާލި ބޯޅަ ދިޔައީ ގޯލު ދަނޑިކައިރިން ބޭރަށެވެ.

މީގެއިތުރުން 27 ވަނަ މިނެޓުގައި ޓީސީގެ އިބްރާހިމް މަހުދީ އަދި 38 ވަނަ މިނެޓުގައި އެޓީމުގެ ބިދޭސީ ކުޅުންތެރިޔާ ސްޓެވާޓްއަށްވެސް ވަނީ ލީޑު ނެގުމަށް ހުސް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފްގައި ޓީސީގެ ފަރާތުން މޮޅު ކުޅުމެއް ފެނިގެންދިޔަ ނަމަވެސް ޔޫވީގެ ފަރާތުން ފެނިގެންދިޔައީ ލަސް ކުޅުމެކެވެ. ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފަށް ޓީސީ ނިކުތީ ޝަމްވީލް ގާސިމް (ބޮންޑާ) އަދި ޔާމީން އިބްރާހިމް (ޔާމްބެ)އާ އެކުގައެވެ. އެގޮތުން ދެވަނަ ހާފްގައި ޓީސީގެ ފަރާތުން އެޓޭކިން ފުޓުބޯޅައެއް ފެނިގެންގޮސްފައިވާއިރު، 54 ވަނަ މިނެޓުގައި އަލީ ނާފިއު (ކަޅޭ) އަށް ވަނީ ލީޑު ނެގުމަށް ފުރުސަތެއް ލިބި ބޭކާރުވެފައެވެ. މި ބޯޅަ ދިޔައީ ގޯލާ ދުރުން ބޭރަށެވެ.

ޓީސީން މެޗުގެ ލީޑު ނެގީ 66 ވަނަ މިނެޓުގައި ކަޅޭ ކާމިޔާބުކުރި ލަނޑުންނެވެ. މި ލަނޑު އޭނާ ކާމިޔާބުކުރީ ސްޓެވާޓް ނަގައިދިން ހުރަސް އިބްރާހިމް މަހުދީ (އިއްބެ) ބޮލުން ކުރިޔަށް ފޮނުވާލަން އުޅެނިކޮށް ކީޕަރު އަތުން ސާފްކޮށްލަން އުޅެނިކޮށް ލިބުނީ މުޅިން ހުހަށް ކަޅޭ އަށެވެ. އެގޮތުން އޭނާ ވަނީ ޔޫވީ ކުޅުންތެރިޔާ ކައިރިން ނައްޓާލުމަށްފަހު ގޯލަށް ބޯޅަ ފޮނުވާލާފައެވެ.

މި ލަނޑަށްފަހުވެސް ޓީސީގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، 71 ވަނަ މިނެޓުގައި ލީޑު ފުޅާކުރުމަށް އިއްބެއަށް ވަނީ މުޅިން ހުސްކޮށް ފުރުސަތެއް ލިބިފައެވެ. އެހެންނަމަވެސް ޔޫވީގެ ބިދޭސީ ކީޕަރު ވަނީ ބޯޅަ ދިފާއުކޮށްފައެވެ. މީގެއިތުރުން 72 ވަނަ މިނެޓުގައި ސްޓެވާޓްއަށް ވެސް ވަނީ ހުސް ފުރުސަތެއް ލިބި ބޭކާރުވެފައެވެ.

މެޗުގައި ޔޫވީގެ ޝަފްރާޒް އަށް 77 ވަނަ މިނެޓުގައި ލަނޑު ޖަހަން ފުރުސަތެއް ލިބުނެވެ. އޭނާ ފޮނުވާލި ބޯޅަ ދިޔައީ ގޯލު މަތީ ދަނޑީގައި ޖެހިފައި ބޭރަށެވެ. ޓީސީ އަށް މެޗުގެ 83 ވަނަ މިނެޓުގައި ޕެނަލްޓީއެއް ލިބިފައިވާއިރު، ކަޅޭ ފޮނުވާލި ޕެނަލްޓީ ދިޔައީ ގޯލު ދަނޑީގައި ޖެހިފައި ބޭރަށެވެ.

މެޗުގެ 89 ވަނަ މިނެޓުގައި ޓީސީގެ އިއްބެ ނަގައިދިން ހުރަސް ކަޅޭ އަށް ހުހަށް ލިބިފައިވާއިރު، އޭނާ ފޮނުވާލީ ބޯޅަ ގޯލާ ދުރުން ބޭރަށެވެ. މީގެއިތުރުން މެޗުގެ އިތުރު ވަގުތުގައި ޔޫވީ އަށްވެސް ވަނީ ހުސް ފުރުސަތެއް ލިބި ބޭކާރުވެފައެވެ.

ޓީސީން މެޗުގެ ލީޑު ފުޅާކުރީ އިތުރުވަގުތުގައި ބަދަލުކުޅުންތެރިޔާ އަލީ ނަސޫހު ރަޝީދު ކާމިޔާބުކޮށްދިން ލަނޑުންނެވެ.