ބާސާއަށް ފުރަތަމަ މޮޅާއެކު ހަމަޖެހުމެއް

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ޑީނަމޯ ކިއޭވް އަތުން މޮޅުވެ، ބާސެލޯނާއިން މި ފަހަރު ޗެމްޕިއަންސް ލީގުގައި ފުރަތަމަ މޮޅު ހޯދައިފިއެވެ.

ގްރޫޕް އީގައި ހިމެނޭ ބާސާ މޮޅުވީ އަމިއްލަ ދަނޑުގައި ކުޅެ ކިއޭވް އަތުން 1-0 ގެ ނަތީޖާއަކުންނެވެ. މި މެޗުގެ ކުރިން މި ފަހަރުގެ ޗެމްޕިއަންސް ލީގުގައި ބަސާއިން ކުޅުނު ފުރަތަމަ ދެ މެޗުން ވަނީ ބަޔާން މިއުނިކާއި ބެންފީކާ އަތުން 3-0 ގެ ނަތީޖާއަކުން ބަލިވެފައެވެ.

މި މެޗު ފަށައިގެން ދެވަނަ މިނެޓުގައި ބާސާގެ ސާޖީނިއޯ ޑެސްޓަށް ރަނގަޅު ފުރުސަތެއް ލިބުނު ނަމަވެސް، އޭނާ ބޮލުން ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އަދި އޭގެ ފަހުން މެޗުގެ 18 ވަނަ މިނެޓުގައި ބާސާގެ ލޫކް ޑި ޔޮން ބޮލުން ފޮނުވާލި ހަމަލާއެއްވެސް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގައި ފެނިގެންދިޔަ ހަމައެކަނި ލަނޑު ބާސާއިން ކާމިޔާބުކޮށްފައިވަނީ މެޗުގެ 36 ވަނަ މިނެޓުގައެވެ. އޭރިއާ ތެރެއަށް ޖޯޑީ އަލްބާ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ޖެރާޑް ޕީކޭއެވެ. އެއާއެކު ޕީކޭ ވެފައިވަނީ ޗެމްޕިއަންސް ލީގުގެ ތާރީޚުގައި އެންމެ ގިނަ ލަނޑު ޖެހި ޑިފެންޑަރަށެވެ. މިހާތަނަށް ޗެމްޕިއަންސް ލީގުގައި ޕީކޭ 16 ލަނޑު ޖަހާފައިވާއިރު، އޭނާއާއެކު މި ލިސްޓުގެ އެއްވަނަ ހިއްސާކުރަނީ ބްރެޒިލުގެ ލެޖެންޑް ރޮބާޓޯ ކާލޯސްއެވެ.

ޕީކޭގެ ލަނޑުން މި މެޗުގައި ބާސާއިން ލީޑު ނެގިއިރު، މި މެޗުގެ ދެވަނަ ހާފުގެ ކުރީކޮޅު ލީޑު ފުޅާކުރަން ބާސާގެ ޒުވާން ތަރި އަންސޫ ފަޓީއަށް ވަނީ ހުސް ފުރުސަތެއް ލިބިފައެވެ. އެކަމަކު އޭރިއާ ތެރެއިން އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

މި މެޗުން ބާސާ މޮޅުވިއިރު، މި ގްރޫޕްގެ އަނެއް މެޗުގައި ބުދަ ދުވަހުގެރޭ ބަޔާން މިއުނިކުން ވަނީ ރަށުން ބޭރުގައި ކުޅެ 4-0 ގެ ނަތީޖާއަކުން ބެންފީކާ ބަލިކޮށްފައެވެ. މި ނަތީޖާތަކާއެކު ގްރޫޕް އީގެ އެއްވަނައިގައި ބަޔާން އޮތީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. ދެވަނައިގައި އޮތް ބެންފީކާއަށް ތިން މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ބާސާއަށް ތިން މެޗުން ލިބިފައިވަނީ ތިން ޕޮއިންޓެވެ. އަދި ފުލުގައި އޮތް ކިއޭވްއަށް ތިން މެޗުން ލިބިފައިވަނީ އެންމެ ޕޮއިންޓެކެވެ.