އިންޓަ ފުރަތަމަ ފަހަރަށް ބަލިވިއިރު، މިލާން އެއްވަނައަށް

މި ސީޒަނުގެ އިޓާލިއަން ލީގުގައި ފުރަތަމަ ފަހަރަށް އެންމެ ފަހުގެ ޗެމްޕިއަން އިންޓަ މިލާން މެޗަކުން ބަލިވިއިރު، ވެރޯނާ ބަލިކޮށް ތާވަލުގެ އެއްވަނައަށް އޭސީ މިލާން ޖެހިލައިފިއެވެ.

ރަށުން ބޭރުގައި ކުޅުނު މެޗުން އިންޓަ ބަލިވީ 3-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ އިންޓައިންނެވެ. މެޗުގެ 12 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އީވާން ޕެރިސިޗެވެ. މިއީ އޭރިއާ ތެރެއިން އިންޓަގެ ނިކޯލޯ ބަރެއްލާއަށް ލާޒިއޯގެ ކުޅުންތެރިއަކު ކުރި ފައުލަކަށް ރެފުރީ ދިން ޕެނަލްޓީއެކެވެ.

އެކަމަކު ދެވަނަ ހާފުގައި ލިބުނު ޕެނަލްޓީއަކުން ޗީރޯ އިމޯބިލޭ ވަނީ ލާޒިއޯއަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން އިންޓަގެ އަލެސަންދްރޯ ބަސްތޯނީގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. އޭގެ ފަހުން މެޗު ނިމެން ނުވަ މިނެޓަށް ވެފައި ވަނިކޮށް ފެލިޕޭ އެންޑަސަން ވަނީ ލަނޑެއް ޖަހައި، ލާޒިއޯއަށް ލީޑު ނަގައިދީފައެވެ.

އަދި މެޗުގެ އިތުރު ވަގުތުގައި ލާޒިއޯއަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ ސަރްގޭ މިލަންކޮވިޗް-ސަވިޗެވެ. އެކަމަކު ލާޒިއޯއިން މި މެޗު ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގައި އެ ޓީމުގެ ރާމޯސް މާރްޗީއަށް ސީދާ ރަތް ކާޑެއް ދެއްކުމާ ގުޅިގެންނެވެ.

މި މެޗުން އިންޓަ ބަލިވިއިރު، އެ ޓީމާ ވާދަވެރި މިލާން ތާވަލުގެ އެއްވަނައަށް ޖެހިލީ ވެރޯނާ އަތުން ފަހަތުން އަރައި 3-2 ގެ ނަތީޖާއަކުން މޮޅުވެގެންނެވެ.

މިލާނުގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ވެރޯނާއިން ވަނީ ދެ ލަނޑުގެ ލީޑެއް ނަގާފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ ޖިއަންލޫކާ ކަޕްރާރީ އާއި އެންޓޮނިން ބަަރަކެވެ. އެކަމަކު ދެވަނަ ހާފު ފަށައިގެން 14 ވަނަ މިނެޓުގައި އޮލިވިއޭ ޖިރޫޑް ވަނީ ލަނޑެއް ޖަހައި، މިލާނަށް ފަރަގު ކުޑަކޮށްދީފައެވެ.

އަދި މެޗުގެ 76 ވަނަ މިނެޓުގައި ލިބުނު ޕެނަލްޓީއަކުން މިލާނަށް ނަތީޖާ އެއްވަރުކޮށްދިނީ ފްރޭންކް ކެސިއޭއެވެ. އަދި އޭގެ ދެ މިނެޓު ފަހުން މިލާނުން ލީޑު ނެގިއިރު، މި ލަނޑަކީ ވެރޯނާގެ ކޯރޭ ގަންޓާ އަތުން ބައިކޮޅަށް ވަން ލަނޑެކެވެ.

މި މޮޅާއެކު ތާވަލުގެ އެއްވަނައަށް މިލާން ޖެހިލީ ކުޅުނު އަށް މެޗުން ލިބުނު 22 ޕޮއިންޓާއެކުއެވެ. ދެވަނައިގައި އޮތް ނާޕޮލީއަށް ހަތް މެޗުން 21 ޕޮއިންޓް ލިބިފައިވާއިރު، ލީގުގައި އާދީއްތަ ދުވަހުގެރޭ ޓޮރީނޯއާ ދެކޮޅަށް ކުޅޭ މެޗުން މޮޅުވެއްޖެނަމަ، ނާޕޮލީއަށް އަލުން އެއްވަނައަށް އެރޭނެއެވެ. މީގެ އިތުރުން ލާޒިއޯ އަތުން ބަލިވި އިންޓަ އޮތީ ތާވަލުގެ ތިންވަނައިގައި އަށް މެޗުން 17 ޕޮއިންޓާއެކުއެވެ.