ދިވެހިންގެ އުފެއްދުންތައް ދާއިމީ ގޮތެއްގައި މާކެޓް ކުރެވޭނެ ނިޒާމެއް ހަމަޖައްސަންޖެހޭ ކަމަށް އެގްރޯ ނޭޝަނަލް ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރު ހާރޫން ރަޝީދު ވިދާޅުވެއްޖެއެވެ.
ހުކުރު ދުވަހު ކާބޯތަކެތީގެ މައުރަޒު ހުޅުވުމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ހާރޫން ވިދާޅުވީ, މި މައުރަޒުގެ ބޭނުމަކީ އަތޮޅުގައި ހައްދާ ބާވަތްތައް (ޚާއްސަކޮށް ދިވެހިން ހައްދާ ބާވަތްތައް) ދައްކާލުން ކަމަށެވެ. ސަރުކާރާއެކު މަސައްކަތް ކުރަމުންދަނީ 17 ބާވަތެއް މާކެޓްކޮށް، އެގްރޯނެޓުން ދަނޑުވެރިންނަށް ލިބެން ހުރި ފަސޭހަތަކުގެ މައުލޫމާތު ހިއްސާކުރުމަށް ކަމަށް ވެސް ހާރޫން ވިދާޅުވިއެވެ.
ކުރިން ނުފެންނަ ތަކެތި މި މައުރަޒުން ފެނިގެންދިޔަކަން ފާހަގަކުރައްވައި ހާރޫން ވިދާޅުވީ, ދަނޑުވެރިކަމުގެ ތެރެއިން ލިބޭ ތަކެތި މާކެޓަށް ނެރެ، ދިވެހިންގެ އުފެއްދުންތައް ކުރިއެރުވުމަށް އިތުރު މަސައްކަތަކެއް ކުރަންޖެހޭ ކަމަށެވެ.
ރާއްޖެއެމްވީއަށް މައުލޫމާތު ދެމުން ސްޓޯލްތަކުން ބުނީ މިކަހަލަ މައުރަޒުތަކުން ތަފާތު ތަކެތި އިޝްތިހާރު ކުރުމަށް ފުރުސަތު ހުޅުވިގެންދާ ކަމަށެވެ. އަދި ދިވެހިންގެ އުފެއްދުންތައް ޕްރޮމޯޓް ކުރުމަށް މިކަހަލަ އިތުރު ފުރުސަތުތައް ފަހިކޮށްދޭން ޖެހޭކަން ވަނީ ފާހަގަކޮށްފައެވެ.
ކަނޑޫދޫ ކައުންސިލުން އިސްނަގައިގެން މިނިސްޓްރީ އޮފް ފިޝަރީޒް، މެރިންރިސޯސަސް އެންޑް އެގްރިކަލްޗަރާ ގުޅިގެން މިމަހުގެ 15ން 16ށް ކަނޑޫދޫގައި ކުރިޔަށްގެންދާ ކާބޯތަކެތީގެ މައުރަޒަކީ ފާހަގަކޮށްލެވުނު މައުރަޒެކެވެ. މި މައުރަޒުގެ ބޭނުމަކީ ރާއްޖޭގައި އުފައްދާ ކާބޯތަކެތީގެ ބާވަތްތައް ޕްރޮމޯޓްކޮށް އިޝްތިހާރުކުރުމާއި އެތަކެތި އެއްތަނަކުން ފެންނަގޮތް ހެދުމާއި, އަދި ރާއްޖޭގެ ދަނޑުވެރިކަމުގެ އުފެއްދުންތަކުން ތައްޔާރުކުރާ ކާނާގެ ބާވަތްތައް ދައްކާލުމެވެ. މި މައުރަޒުގައި ތ. އަތޮޅުގެ ހަތަރު ރަށެއްގެ ސްޓޯލްތަކާއި އެގްރޯނެޓާއި ކަނޑޫދޫގެ ދެ ސްޓޯލެއް ވެސް ހުއްޓެވެ.
