މިހާރު މާ ސަޅި، އޯޑަރުކޮށްލުމުން ކޮކާކޯލާގެ އުފެއްދުންތައް ގެއަށް
މި އެޕްލިކޭޝަން ތައާރަފުކޮށްފައިވަނީ ހޮނިހިރު ދުވަހު ހަވީރު އާރޓް ގެލަރީގައި ބޭއްވި ޙާއްސަ ރަސްމިއްޔާތެއްގައި
ކޮކާ ކޯލާ ކުންފުނިން ތައާރަފުކޮށްފައިވާ އެޕްލިކޭޝަން ދައްކާލަނީ
މާލެ އެރޭޓެޑް ވޯޓަރ ކޮންޕެނީ އިން ހޮނިހިރު ދުވަހު ތައާރަފުކުރި "ކޯކްޓުހޯމް" އެޕްލިކޭޝަން މެދުވެރިކޮށް އޯޑަރު ދިނުމުން ކޮކާކޯލާގެ ބުއިންތައް ސީދާ ގެއަށް ހަމައަށް ގެންގޮސްދޭނެ ޙިދުމަތެއް އެ ކުންފުނިން ތައާރަފުކޮށްފިއެވެ.
މި ރަސްމިއްޔާތުގައި "ކޯކްޓުހޯމް" އެޕްލިކޭޝަން ލޯންޗުކޮށް ދެއްވީ ރަސްމިއްޔާތުގެ ޝަރަފުވެރި މެހެމާން މިނިސްޓްރީ އޮފް އިކޮނަމިކް ޑިވަލޮޕްމަންޓްގެ ޑެޕިއުޓީ އިކޮނަމިކް މިނިސްޓަރ އާދަމް ތައުފީޤް އެވެ.
މިނިސްޓަރ ތައުފީޤް ވިދާޅުވީ ކޮކާ ކޯލާ ކުންފުނިން މި ޙިދުމަތް ތައާރަފުކުރުމަކީ ވަރަށް މުހިންމު ކަމެއް ކަމަށާއި މިކަމުގެ ސަބަބުން ދިވެހިރާއްޖޭގެ ނާޒުކު ތިމާވެށީގައި ޕްލާސްޓިކް ފުޅި ގެންގުޅޭ މިންވަރު މަދުވެގެންދާނެ ކަމަށެވެ.
މި އެޕްލިކޭޝަންއާ ބެހޭގޮތުން މާލެ އެރޭޓަޑް ވޯޓަރ ކޮންޕެނީގެ ކަންޓްރީ މެނޭޖަރ އަބީޖިތް ލެހްރީ ވިދާޅުވީ ކުންފުނީގެ މަޤްސަދަކީ ކަސްޓަމަރުންނަށް ފަސޭހަ އަދި ފެންވަރު ރަގަޅު ޙިދުމަތްތަކެއް ފޯރުކޮށްދިނުން ކަމަށެވެ. އަދި ކަސްޓަމަރުންގެ އުންމީދުތަކާއި ހަމައަށް ވާސިލްވުމަށްތަކައި ކުންފުނިން ކުރެވެން ހުރި ހުރިހާ ކަމެއް ކުރާނެ ކަމުގައެވެ.
މާލެ އެރޭޓަޑް ވޯޓަރ ކޮންޕެނީގެ މެނޭޖިންގ ޑައިރެކްޓަރ ސަންޖޭ މަނިކު ވިދާޅުވީ ކުންފުނިން ބޭނުންވަނީ ކުންފުނީގެ ޑިސްޓްރިބިއުޝަން އާއި ކޮންސިއުމަ ޙިދުމަތް ވަގުތު ސަލާމަތްވާ ވަސީލަތްތައް ބޭނުންކޮށްގެން ރަގަޅުކުރަން ކަމުގައެވެ.
މި އެޕްލިކޭޝަން ބޭނުންކޮށްގެން އެއްފަހަރާއި ދެތިން ތަނަށް ކޯކް ޑެލިވަރީ ކުރުމަށް އޯޑަރު ދެވޭނެ އެވެ.
މި އެޕްލިކޭޝަން މިހާރު ގޫގުލް ޕްލޭ ސްޓޯރުންނާއި އެޕަލް ސްޓޯރުން ޑައުންލޯޑް ކުރެވޭނެ އެވެ.
