ފަނޑިޔާރުންގެ އޯޑިއޯތަކުގެ ތަހުގީގު ލަސްވަނީ ފުލުހުންގެ އެނާލިސިސް ނުނިމޭތީ: ޖޭއެސްސީ
12 އޮކްޓޯބަރު 2021 | އަންގާރަ 06:44އޯޑިއޯތަކަކީ ސައްހަ އޯޑިއޯތަކެއް ނޫންކަމަށް ފަނޑިޔާރުން ވިދާޅުވި
ޖުޑީޝަލް ސަރވިސް ކޮމިޝަން (ޖޭއެސްސީ) ގެ ބައެއް މެމްބަރުން
ލީކުކޮށްލާފައިވާ އޯޑިއޯ ރެކޯޑިންތަކުގެ މައްސަލައިގެ ތަހުގީގު ލަސްވަނީ ފުލުހުންގެ އެނާލިސިސް ނުނިމޭތީކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނެފިއެވެ.
ލީކުކޮށްލާފައިވާ އޯޑިއޯ ރެކޯޑިންތަކުގެ މައްސަލައިގައި ކްރިމިނަލް ކޯޓުގެ ތިން ފަނޑިޔާރުންގެ އޯޑިއޯ ސާމްޕަލް ފުލުހުން ނަގާފައިވަނީ އޯގަސްޓު މަހުގެ 31 ވަނަ ދުވަހުއެވެ. އެއީ ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންގތަކެއް ކަމަށް ބުނެ މީޑިއާގައި ދައުރުވި އޯޑިއޯތަކުގެ މައްސަލައިގެ ތަހުގީގަށް އޯޑިއޯ ސާމްޕަލް ދިނުމަށް ފަނޑިޔާރުން ވެސް ރުހުން ދެއްވާފައިވަނިކޮށެވެ.
މި މައްސަލައާ ގުޅިގެން، ކްރިމިނަލް ކޯޓުގެ ފަނޑިޔާރު ޙުސައިން ފާއިޒު ރަޝާދާއި އެ ކޯޓުގެ ފަނޑިޔާރު ޢަލީ އާދަމާއި ޑްރަގް ކޯޓުގެ ފަނޑިޔާރު މުޙައްމަދު ސަމީރުގެ ފަރާތުން މައުލޫމާތު ސާފުކުރުމުގެ މަސައްކަތް ކުރިއަށް ގެންދެވުނު ކަމަށް ޖޭއެސްސީން ބުނެފައިވެއެވެ. މީޑިއާގައި ދައުރުވަމުންދާ އޯޑިއޯތަކަކީ ސައްހަ އޯޑިއޯތަކެއް ނޫންކަމަށާއި އެފަދަ ވާހަކަތަކެއް ދައްކާފައި ނުވާނެކަމަށް ފަނޑިޔާރުން ވިދާޅުވެފައިވާ ކަމަށް ޖޭއެސްސީން ބުނެފައިވެއެވެ.
އެކަމުގެ ތަހުގީގާ ގުޅޭގޮތުން ރާއްޖެއެމްވީން ސުވާލުކޮށްލުމުން ޖޭއެސްސީގެ މީޑިއާ އޮފިޝަލު ވިދާޅުވީ، އޯޑިއޯތަކުގެ މައްސަލަ ލަސްވަނީ ފުލުހުންގެ އެނާލިސިސް ނުނިމޭތީ ކަމަށެވެ. އަދި އެނާލިސިސް ނިމުމުން ތަހުގީގުގެ ބާކީ ބައި ކުރިއަށް ގެންދަވާނެކަން އޭނާ ފާހަގަކުރެއްވިއެވެ.
އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން ފުލުހުންގެ ތަރުޖަމާނު ޔޫނުސް ސޮބާޙް ވިދާޅުވީ، ތަހުލީލު އަދިވެސް ކުރިއަށްދާ ކަމަށާއި، އެކަމާގުޅޭ އެނާލިސިސް ނިމޭނެ ސީދާ ތާރީޚެއް ދަންނަވަން ދަތި ކަމަށެވެ. ނަމަވެސް ވީ އެންމެ އަވަހަށް ތަހުގީގު ނިންމައި، އެ މައުލޫމާތު ހިއްސާ ކުރައްވާނެކަން ޔޫނުސް ފާހަގަކުރެއްވިއެވެ.
މި މައްސަލައާ ގުޅޭ އިތުރު މައުލޫމާތު ސާފުކުރުމަށް, ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްސަލަ ބެއްލެވި ކްރިމިނަލް ކޯޓުގެ ގާޒީންގެ ބެންޗުގައި ދެން ހިމެނިވަޑައިގަންނެވި ދެ ފަނޑިޔާރުން ކަމުގައިވާ ފަނޑިޔާރު ޢަލީ ރަޝީދު ޙުސައިން އާއި ފަނޑިޔާރު އަޙުމަދު ޝަކީލާ ވެސް ވަނީ ސުވާލުކޮށް މައުލޫމާތު ސާފުކޮށްފައެވެ. އެ އޯޑިއޯތަކުގައި ކޮށްފައިވާ ތުހުމަތުތައް ދެ ފަނޑިޔާރުން ވެސް ވަނީ ދޮގުކުރައްވާފައެވެ.
