ސ. ހިތަދޫ ވަރުދީގޭ އަހުސަން ބަޝީރުގެ މަރުގެ މައްސަލައިގައި ވާރިސުންގެ ބަސް ހައިކޯޓުން ނަގައިފިއެވެ.

ހައިކޯޓުގައި އާދިއްތަ ދުވަހު ކުރިއަށް ދިޔަ ޝަރީއަތުގެ އަޑުއެހުމުގައި ދައުލަތުން ބުނީ، މި މައްސަލައިގައި ކުށް ސާބިތުވެފައިވާ މއ. ވީނަސްތަރި، ހަސަން ޝިމާޒް މުހައްމަދު ސުވާދުއާއި، ގ. ކޯޒީ އިބްރާހިމް ޝަހުމް އާދަމްގެ ކިބައިން އަހުސަންގެ ހުރިހާ ވާރިސުން ވެސް މަރުގެ އަދަބު ބޭނުންވާކަމަށް ބުނެފައެވެ. އަދި އެ ހާދިސާ ހިނގި ދުވަސްވަރު އަމަލު ކުރަމުންދިޔަ ކުރީގެ ޤާނޫނުލް އުގޫބާތުގެ ދަށުންނާއި، މިހާރު އަމަލުކުރާ ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ޤާނޫނުގެ ދަށުން ރިއާޔަތްކުރާއިރު މައްސަލައިގައި ދައުވާލިބޭ ޝަހުމްއަށް ދޭން ޖެހޭނީ މަރުގެ އަދަބުކަން ދައުލަތުން ވަނީ ފާހަގަކޮށްފައެވެ.

އެހެންނަމަވެސް، މީހަކު މެރުމުގައިި އެހީތެރިވުމުގެ ދައުވާ ސާބިތުވެފައިވާ ޝިމާޒަށް އަސްލު ކުށްކުރި މީހާއަށް ދެވޭ އަދަބު ނުދެވޭނެ ކަމަށް ފަނޑިޔާރު ވަނީ ވިދާޅުވެފައެވެ. އެއާއެކު ދައުލަތުން ވަނީ މައްސަލައިގައި ކަން ހިނގާފައިވާ ގޮތަށް ބަލާއިރު ޝިމާޒުގެ މައްޗަށް 17 އަހަރާއި ހަ މަހުގެ ޖަލު ޙުކުމެއް އިއްވައިދެއްވުމަށް އެދިފައެވެ.

ދެން އޮންނާނީ މި މައްސަލައިގައި ޝަރީއަތުން އަދަބު ކަނޑައެޅުމަށް ބާއްވާ އަޑުއެހުމެވެ.

މި މައްސަލައިގައި ދައުވާ އުފުލާފައިވާ މއ. ވީނަސްތަރި، ހަސަން ޝިމާޒް މުހައްމަދު ސުވާދުއާއި، ގ. ކޯޒީ އިބްރާހިމް ޝަހުމް އާދަމްގެ މައްޗަށް ކުށް ސާބިތުނުވާކަމަށް 2014 ވަނަ އަހަރު ކުރި މި ޙުކުމް އިސްތިއުނާފުކޮށް، ދާދި ފަހުން ހައިކޯޓުން ވަނީ އެމީހުންގެ މައްޗަށް ކުށް ސާބިތުވާކަމަށް ނިންމާފައެވެ.

އެ ދެމީހުންގެ މައްޗަށް ކުށް ސާބިތުވާކަމަށް ނިންމާފައިވަނީ މަރުމަތީގައި ބުނި ބަސް (ޑައިންގ ޑިކްލަރޭޝަން) އަށް ބިނާކޮށްގެންނެވެ. އެ ދެމީހުންގެ މައްޗަށް ކުށް ސާބިތުވާކަމަށް ނިންމަވައި ފަނޑިޔާރު ވިދާޅުވީ، މަރުން ސަލާމަތްވާނެ ކަމުގެ އެއްވެސް އުއްމީދެއް ނެތް މީހަކު މަރު މަތީގައި ދައްކާ ވާހަކައަށް ގިނަ ޤައުމުތަކުގެ ކޯޓުތަކުން ރިއާޔަތް ކުރާ ކަމަށެވެ. އަދި އަހުސަން މަރުވުމުގެ ކުރިން ހޮސްޕިޓަލްގައި އޮވެގެން ބައެއް މީހުންގެ ގާތުގައި އޭނާ މަރާލާފައިވަނީ މި މައްސަލައިގައި ދައުވާލިބޭ 2 މީހުންކަމަށް ބުނެފައިވާކަން ފާހަގަކޮށްފައިވެއެވެ.

"މަރުގެ ތުންފަތްމަތީގައި އޮތް މީހަކު، ދޮގެއް ނުހަދާނެކަމަށް ބަޔާންކުރާ ޙާލަތަކީ މިފަދަ ޚާއްސަ ޙާލަތްތަކުގެ ތެރެއިން އެއް ޙާލަތް، ކޮމަންލޯގެ އުސޫލުތަކުގެ ތެރެއިން މަރުގެ ތުންފަތް މަތީގައި ވާ މީހާގެ ބަޔާން ހެކީގެ ތެރެއަށް ވަދެގެން އައީ ލެޓިންގެ ޤާއިދާއެއް ކަމަށްވާ (ދޮގެއްގެ މަތީގައި އިންސާނަކު އޭނާގެ ހެއްދެވި ފަރާތާއި ބައްދަލެއް ނުކުރާނޭ)،

މި މައްސަލައިގައި ކުށް ސާބިތުވެފައިވާ 2 މީހުންގެ ތެރެއިން ޝަހުމް މިހާރުވެސް ހުރީ މަރުގެ މައްސަލައެއްގެ ޙުކުމެއްގައެވެ. އަދި ޝިމާޒު އައްޑޫގައި ހުއްޓައި ހައްޔަރުކޮށް ކޯޓުގެ އަމުރާއި އެއްގޮތަށް ބަންދު ކޮށްފައިވާކަން ފުލުހުންގެ މީޑިއާ އޮފިޝަލު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.