އދ. އާންމު މަޖިލީހުގެ ރައީސްގެ އޮފީހުގައި 42 މުވައްޒަފުން: ޝާހިދު
32 މުވައްޒަފުންނަކީ އެކިއެކި ގައުމުތަކަށް ނިސްބަތްވާ މުވައްޒަފުން
އދގެ އާއްމު މަޖިލީހުގެ 76ވަނަ ސެޝަންގެ ރައީސް އަބްދުﷲ ޝާހިދު،
އދ. އާންމު މަޖިލީހުގެ ރައީސްގެ އޮފީހުގައި 42 މުވައްޒަފުން މަސައްކަތް ކުރަމުންދާ ކަމަށް 76 ވަނަ ސެޝަންގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ބުރާސްފަތި ދުވަހުގެ ރާއްޖެޓީވީގެ ފަށާއިރު ޕްރޮގްރާމްގައި ޝާހިދު ވިދާޅުވީ މަސައްކަތް ކުރަމުންދަނީ 42 މުވައްޒަފުންނާއެކު ކަމަށެވެ. އޭގެ ތެރެއިން 32 މުވައްޒަފުންނަކީ އެކިއެކި ގައުމުތަކަށް ނިސްބަތްވާ މުވައްޒަފުން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އޮފީހުގެ މަސައްކަތްތައް ކުރިއަށް ގެންދަނީ ވަރަށް ރޭވުންތެރިކަމާއެކު ކަމަށެވެ. އެގޮތުން 50 އިންސައްތަ ހިއްސާކުރަނީ އަންހެން މުވައްޒަފުން ކަމަށް ޝާހިދު ވިދާޅުވިއެވެ. ސީނިއަރ ކެބިނެޓަށް އިޝާރާތް ކުރައްވައި ވެސް ވިދާޅުވީ އަންހެން މުވައްޒަފުން ގިނަވާނެ ކަމަށެވެ.
ޝާހިދު ވިދާޅުވީ އާއިލާއާއި ގާތް އެކުވެރިންނާ ދުރުގައި މަސައްކަތް ކުރުމަކީ އުނދަގޫ ކަމެއް ކަަމަށެވެ. އަދި ރާއްޖޭގެ ހިތްގައިމު މާހައުލާއި، ހުރިހާ ކަމެއްގެ މަތިން ހަނދާންވާކަން ޝާހިދު ފާހަގަކުރެއްވިއެވެ.
