އިއްތިފާގުން ވިޔަސް 21 ސެޕްޓެންބަރު ރާއްޖެއަށް ޚާއްސަ!
އިއްތިފާގުން ވަރަށް ގިނަކަންކަން ދިމާވެފައިވޭ
ފަށާއިރު ޕްރޮގްރާމްގެ ތެރެއިން،
ރިޔާސަތުގައި ދިވެއްސަކު އިން ދުވަހާއި އދ. އާންމު މަޖިލީހުގެ މެމްބަރަކަށް ރާއްޖެވިތާ 56 އަހަރު ފުރުނު ދުވަސް އެއް ދުވަހަކަށް ވެއްޖެއެވެ.
ބުރާސްފަތި ދުވަހުގެ ރާއްޖެޓީވީގެ ފަށާއިރު ޕްރޮގްރާމްގައި ޕްރޮގްރާމްގެ ހޯސްޓް އަދި ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ވަނީ އިއްތިފާގުން ދިމާވާ ކަންތައްތަކެއް އދ.ގެ އާންމު މަޖިލީހުގެ 76 ވަނަ ސެޝަންގެ ރައީސް އަބްދުﷲ ޝާހިދުއާ ހިއްސާކުރައްވާފައެވެ. އެގޮތުން 2017 އަދި 2019 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ޚާއްސަ މެހެމާނެއްގެ ގޮތުގައި ޝާހިދު ބައިވެރިވެވަޑައިގެންނެވިކަން އާމިރު ފާހަގަކުރެއްވިއެވެ.
އެކަމާ ގުޅިގެން ޝާހިދު ވިދާޅުވީ އެއްވެސް ގޮތަކަށް އެކަން އެނގިވަޑައިނުގަންނަވާ ކަމަށެވެ. ނަމަވެސް އިއްތިފާގުން ވަރަށް ގިނަ ކަންކަން ދިމާވެފައިވާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ 1965 ވަނަ އަހަރުގެ ސެޕްޓެންބަރު މަހުގެ 21 ވަނަ ދުވަހު އދ. މަޖިލީހުގައި ރާއްޖޭގެ ދިދަ ވިހުރުވާލި ކަމަށެވެ. އޭގެ 56 އަހަރު ފުރުނު ދުވަހު ރާއްޖޭގެ ރައީސުލްޖުމްހުރިއްޔާ ހުންނެވީ އދ. މަޖިލީހުގައި ތަގުރީރު ކުރައްވަން ކަމަށާއި، ރިޔާސަތުގައި ހުންނެވީ ވެސް ދިވެއްސެއް ކަމަށެވެ. އަދި ދެ ބޭފުޅުން ވާހަކަ ދެއްކެވީ ދިވެހި ބަހުންކަން ޝާހިދު ފާހަގަކުރެއްވިއެވެ.
އދ. ގެ 76 ވަނަ އާންމު މަޖިލީހުގެ ރައީސްގެ މަގާމަށް ޝާހިދު ހޮވިވަޑައިގަތީ މި އަހަރުގެ ޖޫން މަހުގައެވެ. އާއްމު މަޖިލީހުގެ ރިޔާސަތާ އެމަނިކުފާނު ހަވާލުވެވަޑައިގެންނެވީ ސެޕްޓެމްބަރު މަހުގެ 15 ވަނަ ދުވަހުއެވެ.
އދ. ގެ އާންމު މަޖިލީހުގެ ރައީސް ކަމުގެ އިންތިޚާބު, ޝާހިދު ކާމިޔާބު ކުރައްވާފައިވަނީ 143 ވޯޓުންނެވެ. މެންބަރު 193 ގައުމުން ބައިވެރިވި މި ވޯޓުގައި ރައީސަކު ހޮވާފައި މިވަނީ ސިއްރު ވޯޓަކުންނެވެ.
