ސިޔާސީ މަސައްކަތަކީ ނަޒާހަތްތެރިކަމާއެކު ކުރެވިދާނެ މަސައްކަަތެއްކަން މޯލްޑިވްސް ރިފޯމް މޫވްމަންޓް (އެމްއާރްއެމް)އިން ސާބިތުކޮށްދޭނެ ކަމަށް އެޕާޓީގެ ރައީސް ފާރިސް މައުމޫން ވިދާޅުވެއްޖެއެވެ.

އެމްއާރުއެމްގެ ފުރަތަމަ ނޭޝަނަލް ކޮންވެންޝަންގެ ނިންމުމުގެ ރަސްމިއްޔާތުގައި ވާހަކަދައްކަވަމުން ފާރިސް ވިދާޅުވީ ސިޔާސީ މައިދާނުގައި ކަންކަން ހިނގާފައިވާ ގޮތުން މިއީ ނަޒާހަތްތެރިކަން ގެއްލިފައިވާ މައިދާނެއް ކަމަށް ގިނަ ބަޔަކު ގަބޫލުކުރާ ކަމަށެވެ. ނަމަވެސް ސިޔާސީ މަސައްކަތަކީ ނަޒާހަތްތެރިކަމާއެކު ކުރެވޭނެ މަސައްކަތެއްކަން ސާބިތުކޮށްދޭން ބޭނުންވާ ކަމަށާއި، އެ އިތުބާރު ހޯދައިދިނުމަށް އެމްއާރްއެމުން މަސައްކަތް ކުރާނެ ކަމަށް ފާރިސް ވިދާޅުވިއެވެ. އަދި ވިދާޅުވީ އެމަސައްކަތް ކާމިޔާބު ކުރެވޭނެ ކަމަށެވެ.

އެގޮތުން ޕާޓީގެ ހުރިހާ ކަމެއް ރާވާފައިވާނީ ދެފުށް ފެންނަ ގޮތަށް ހަރުދަނާ ނިޒާމެއްގެ ތެރެއިން ކަމަށް ފާރިސް ވިދާޅުވިއެވެ. އަދި ވިދާޅުވީ މަސައްކަތް ކުރާނީ މަޝްވަރާގެ ތެރެއިން ކަމަށާއި، ކަންކަން ނިންމާނީ ޕާޓީގެ މެޖޯރިޓީން ކަމަށެވެ.

ސަރުކާރުގެ ކޯލިޝާންގައި ދެމިތިބޭނެކަން ފާހަގަކުރައްވައި ފާރިސް ވިދާޅުވީ ކޯލިޝަން އުފެދިފައި ވަނީ ގިނަ ޕާޓީތައް ގުޅިގެން ގައުމުގެ ހެވާލާބަޔަށް މަސައްކަތް ކުރުމަށް ކަމަށެވެ. އަދި ސަރުކާރަށް އެމްއާރްއެމްގެ ފަރާތުން ފުރިހަމަ އެއްބާރުލުން ލިބޭނެ ކަމުގެ ޔަގީން ފާރިސް ދެއްވިއެވެ.

ހޮނިހިރު ދުވަހު އޮންލައިންކޮށް ކުރިއަށް ގެންދިޔަ ނޭޝަނަލް ކޮންވެންޝަންގައި ޕާޓީގެ އަސާސީ ގަވާއިދާ، ޕާޓީ ހިންގުމަށް ބޭނުންވާ ގާއިވާއިދުތައް ފާސްކޮށްފައިވެއެވެ.

ލީޑަރޝިޕް އިންތިޚާބު ކުރިއަށް ގެންގޮސްފައިވާއިރު، ޒައީމަކަށް ކުރީގެ ރައީސް މައުމޫން އަބްދުލްގައްޔޫމް، ޕާޓީގެ ނާއިބުރައީސަކަށް ސަޒައިލް ސިޔާމް، ނާއިބުރައީސްގެ އަންހެނުންގެ ޚާއްސަ ގޮނޑިއަށް އައިމިނަތު ނާދިރާ އިންތޚާބު ކޮށްފައިވެއެވެ. އަންހެނުންގެ ކައުންސިލްގެ ރައީސަކަށް އާރިޒާ ރަޝީދު، ޒުވާނުންގެ ކައުންސިލްގެ ރައީސަކަށް އިބްރާހިމް ފަރުހާދު އިންތިޚާބު ކޮށްފައިވެއެވެ. އަދި އެގްޒެކެޓިވް ކޮމިޓީއަށް 10 ފިރިހެން މެމްބަރުންނާއި 10 އަންހެން މެމްބަރުން އިންތިޚާބު ކޮށްފައިވެއެވެ. މީގެ އިތުރުން އެގްޒެކެވި ކޮމިޓީއަށް ޒުވާނުންގެ ކައުންސިލް ތަމްސީލު ކުރާ 10 މެމްބަރުން އިންތިޚާބު ކޮށްފައިވެއެވެ. އެއީ އަންހެން 5 މެމްބަރުންނާއި ފިރިހެން 5 މެމްބަރުންނެވެ.