ފާރިސް މަޢުމޫންގެ އަރިސް ޓީމެއް އެމްޑީޕީއާއެކު މަޝްވަރާކޮށްފި
ފާރިސްގެ ފަރާތްޕުޅުން ގައުމީ ސަލާމަތާއި، އިގްތިޞާދީ ކަންކަމާއި އިޖުތިމާއީ ކަންކަމާއި މެދު ގެންގުޅުއްވާ ޕޮލިސީތައް ހިއްސާކުރެއްވި
ފާރިސް މަޢުމޫންގެ އަރިސް ޓީމެއް އެމްޑީޕީއާއެކު މަޝްވަރާކުރުން
ކުރީގެ ރައީސުލްޖުމްހޫރިއްޔާ މަޢުމޫން އަބްދުލްޤައްޔޫމްގެ ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެންބަރު ފާރިސް މަޢުމޫންގެ އަރިސް ޓީމެއް އެމްޑީޕީއާ ބައްދަލުކުރައްވައިފިއެވެ.
އެކަން ހާމަކުރެއްވީ އެމްޑީޕީގެ އިސް ބައެއް ބޭފުޅުންނާއި ފާރިސް މަޢުމޫނާއެކު މަސައްކަތް ކުރައްވާ ބޭފުޅުންނާއި ބައްދަލުކުރެއްވުމަށް ފަހު ނަންގަވާފައިވާ ފޮޓޯއެއް ހިއްސާކުރައްވާ ފާރިސްކުރެއްވި ޓްވީޓެއްގައެވެ. ފާރިސް ވިދާޅުވީ އޭނާގެ ފަރާތްޕުޅުން ބައްދަލުކުރެއްވި ޓީމުގައި އިސްކޮށް ހުންނެވީ އައިމިނަތު ނާދިރާ ކަަމަށެވެ. ނާދިރާ އަކީ ކުރިން ޕީޕީއެމްގައި އިސްކޮށް އުޅުއްވި ބޭފުޅެކެވެ. ނަމަވެސް ޚިޔާލު ތަފާތުވެ ޕީޕީއެމް ބައިބައިވެގެން ދިޔަ ހިސާބުން ނާދިރާ މަސައްކަތްކުރައްވަމުން ގެންދެވީ ކުރީގެ ރައީސް މަޢުމޫންގެ އަރިހުގައެވެ. އަދި މިއަހަރުގެ ރިޔާސީ އިންތިޚާބުގައި އޭނާ މަސައްކަތް ކުރެއްވީ ފާރިސް މަޢުމޫން އަރިހުގައެވެ.
ފާރިސްގެ ފަރާތްޕުޅުން އެމްޑީޕީއާ ބައްދަލުކުރެއްވި ޓީމުގައި މި ސަރުކާރުގެ ވަޒީރުކަން ކުރިން އަދާކުރައްވާފައި ޒަހާ ވަހީދާއި އާމިނަތު އާތިފާ ވެސް ހިމެނިވަޑައިގަންނަވައެވެ. އެމްޑީޕީގެ ޓީމްގައި ސަރުކާރުގެ ޕޮލިސީ ލެވެލްގައި މަސައްކަތްކުރައްވާ ބޭފުޅުން ހިމެނިވަޑައިގަންނަވާއިރު އެ ޓީމުގައި އިސްކޮށް ހުންނެވީ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އެވެ.
މި ބައްދަލުކުރެއްވުމުގައި ފާރިސްގެ ފަރާތްޕުޅުން ގައުމީ ސަލާމަތާއި، އިގްތިޞާދީ ކަންކަމާއި އިޖުތިމާއީ ކަންކަމާ މެދު ގެންގުޅުއްވާ ޕޮލިސީތައް ހިއްސާކުރައްވާފައިވެއެވެ. އެކަންކަމަކީ ރާއްޖޭގެ ޑިމޮކްރަސީ ހަރުދަނާކޮށް ވަރުގަދަކުރުމަށާއި އިންސާފާއި ހަމަހަމަކަން ޤާއިމްކުރުމަށް މުހިންމު ކަންކަން ކަމަށް ވެސް ފާރިސް ވަނީ ވިދާޅުވެފައެވެ.
