އެމްއާރްއެމްގެ ނަމުގައި ސިޔާސީ އެއްވެސް ހަރަކާތެއް ނުހިންގުމަށް އެޕާޓީން އެދިއްޖެ
އެމްއާރްއެމް އުވާލަން ނިންމާފައިވަނީ ގަވާއިދާ ޚިލާފަށް އެޕާޓީން ބުނޭ
އެމްއާރްއެމް އުވާލާފައިވާކަމަށް އީސީން އެންގުމާ ގުޅިގެން އެޕާޓީން ބޭއްވި ނޫސްވެރިންގެ ބައްދަލުވުން
މޯލްޑިވްސް ރިފޯމް މޫވްމެންޓް (އެމްއާރްއެމް)ގެ ނަމުގައި ސިޔާސީ އެއްވެސް ހަރަކާތެއް ނުހިންގުމަށް އެ ޕާޓީން އެދިއްޖެއެވެ.
އެމްއާރްއެމްއިން ބުނީ، ސިޔާސީ އެއްވެސް ހަރަކާތެއް ނުހިންގުމަށް އަންގައި އިލެކްޝަންސް ކޮމިޝަން (އީސީ)ން ބުރާސްފަތި ދުވަހު ސިޓީއެއް ލިބިފައިވާކަަމަށެވެ.
އެހެންކަމުން އެ ޕާޓީގެ އެންމެހާ މެންބަރުންނަށާއި، ކޮމިޓީތަކާއި، ގުނަވަންތަކާއި، ގޮފިތަކުން، އެމްއާރްއެމްގެ ނަމުގައި މިވަގުތު ސިޔާސީ އެއްވެސް ހަރަކާތެއް ނުހިންގުމަށް އެޕާޓީން އެދިފައިވެއެވެ.
އެމްއާރްއެމްއިން ބުނީ، އެޕާޓީން ގަބޫލުކުރާގޮތުގައި އީސީން އެމްއާރްއެމް އުވާލަން ނިންމާފައިވަނީ ގަވާއިދާ ޚިލާފަށެވެ. އެކަން ސާބިތުކުރުމަށް ކުރަންޖެހޭ ހުރިހާ މަސައްކަތެއް ކުރަމުން ގެންދާކަމަށްވެސް އެމްއާރްއެމްއިން ބުނެއެވެ.
މީގެ އިތުރުން އިސްލާހީ މަސައްކަތުގައި ދެމިތިބުމަށް އެމްއާރްއެމްއިން އެދިފައިވެއެވެ.
އެމްއާރްއެމްގެ ނަމުގައި ސިޔާސީ އެއްވެސް ހަރަކާތެއް ނުހިންގުމަށް އެ ޕާޓީން އެދިފައިވާއިރު، އެ ޕާޓީ އުވާލިފަހުން ބުދަ ދުވަހުގެ ހަވީރު ކުއްލި ނޫސްވެރިންގެ ބައްދަލުވުމެއް ބާއްވައި، އީސީއަށް ފާޑުކިޔާފައިވެއެވެ. ޕާޓީ އުވާލާފައިވަނީ ސިޔާސީ ނުފޫޒުން ކަމަށްވެސް ތުހުމަތުކޮށްފައިވެއެވެ. ނަމަވެސް މި ހުރިހާ ތުހުމަތުތަކެއް އީސީން ދޮގުކޮށްފައިވެއެވެ.
