މެލޭޝިޔާގެ ސަރުކާރުގައި މަސައްކަތްކުރާ ހުރިހާ މުވައްޒަފުން ކޮވިޑް ވެކްސިން ޖެހުމަށް މަޖުބޫރުކޮށްފި

މެލޭޝިޔާގެ ސަރުކާރުގައި މަސައްކަތްކުރާ ހުރިހާ މުވައްޒަފުން ކޮވިޑް-19 ވެކްސިން ޖެހުން މިހާރު މަޖުބޫރުވާނެކަމަށް އެގައުމުގެ ސަރުކާރުން ބުނެފިއެވެ.

ކޮވިޑް-19 ވެކްސިން ޖެހުމުން އިސްތިސްނާވާނީ ހަމައެކަނި އެމީހެއްގެ ސިއްހީ ހާލަތަށް ބެލުމަށްފަހު ކަމަށް ސަރުކާރުން ވަނީ ބުނެފައެވެ. މެލޭޝިޔާގެ ސަރުކާރުން މިގޮތަށް ނިންމާފައި މިވަނީ އެގައުމުގައި ކުރިޔަށްދާ ވެކްސިނޭޝަން ޕްރޮގްރާމް މިހާރަށްވުރެ ހަލުވިކޮށް މި އަހަރު ނިމުމުގެކުރިން އާބާދީގެ 80 އިންސައްތަ މީހުންނަށް ވެކްސިން ޖެހުމަށެވެ.

މެލޭޝިޔާއަކީ ދެކުނު އޭޝިޔާގެ ގައުމުތަކުގެ ތެރެއިން އެންމެ ހަލުވި މިނެއްގައި ވެކްސިން ދެމުން އަންނަ ގައުމެވެ. އެގައުމުގެ 32 މިލިއަން މީހުންގެ ތެރެއިން 61 އިންސައްތަ މީހުން ވަނީ ވެކްސިންގެ ދެ ޑޯޒް ފުރިހަމަކޮށްފައެވެ.

މެލޭޝިޔާގެ ޕަބްލިކް ސަރވިސް ޑިޕާޓްމަންޓުން ނެރެފައިވާ ބަޔާނެއްގައި ބުނެފައިވަނީ ސަރުކާރުގެ މުވައްޒަފުންނަށް ވެކްސިން ޖެހުން މަޖުބޫރުކުރީ ވެކްސިން ޖެހުމުގެ ޕްރޮގްރާމް ހަލުވިކޮށް، ސަރުކާރުން ދެމުންގެންދާ ޚިދުމަތްތަކަށް ބުރުނާރާ އެ ޚިދުމަތްތައް ދިނުމަށް މަގުފަހިކުރުމުގެ ގޮތުންކަމަށެވެ.

މެލޭޝިޔާގެ ސިވިލް ސަރވެންޓުންގެ ތެރެއިން މިހާރުވެސް ގާތްގަނޑަކަށް 98 އިންސައްތަ މީހުން ވަނީ ވެކްސިން ޖަހާފައެވެ. ނަމަވެސް އަދިވެސް 16،902 މީހުން ވެކްސިން ޖެހުމަށް ރަޖިސްޓްރީކުރަންޖެހޭކަމަށް ބަޔާނުގައި ބުނެފައިވެއެވެ. އެއީ 1.6 އިންސައްތަ މީހުންނެވެ. މެލޭޝިޔާގެ ސިވިލް ސަރވިސްގައި 1.6 މިލިއަން މީހުން މަސައްކަތްކުރެއެވެ.

ވެކްސިން ނުޖަހާ މުވައްޒަފުން ނޮވެމްބަރ މަހުގެ 1 ވަނަ ދުވަހުގެ ކުރިން ވެކްސިން ޖެހުމަށް ވަނީ އަންގާފައެވެ. އަދި ވެކްސިން ނުޖެހޭ މީހުން ރަސްމީ ލިޔުމަކާއެކު އެކަން އެންގުމަށް ވަނީ ބުނެފައެވެ. ވެކްސިން ނުޖަހާ މުވައްޒަފުންނާ މެދު ފިޔަވަޅު އަޅާނެކަމަށް ވެސް ބަޔާނުގައި ބުނެފައިވެއެވެ.