ޔުއެފާ ޗެމްޕިއަންސް ލީގުގެ ގްރޫޕް އީގައި ބުދަ ދުވަހުގެރޭ ކުޅުނު މެޗުން ބެންފީކާ އަތުން ބާސެލޯނާ ބަލިވިއިރު، ޑީނަމޯ ކިއޭވް އަތުން ފަސޭހަކަމާއެކު ބަޔާން މިއުނިކް މޮޅުވެއްޖެއެވެ.

ރަށުން ބޭރުގައި ކުޅެ ބާސާ ބަލިވީ 3-0 ގެ ނަތީޖާއަކުންނެވެ.

މި މެޗުންވެސް ބާސާ ބަލިވިއިރު، މި ސީޒަނުގެ ޗެމްޕިއަންސް ލީގުގައި ކުޅުނު ފުރަތަމަ މެޗުން ބާސާ ވަނީ އަމިއްލަ ދަނޑުގައި ކުޅެ ބަޔާން އަތުން 3-0 ގެ ނަތީޖާއަކުން ބަލިވެފައެވެ. އަދި މިއާއެކު ބާސާއިން ވަނީ 1997 ވަނަ އަހަރުގެ ފަހުން ޗެމްޕިއަންސް ލީގުގައި މޮޅެއް ނުލިބި ފަސް މެޗު ހަމަކޮށްފައެވެ.

ބުދަ ދުވަހުގެރޭ ކުޅުނު މެޗުގައިވެސް ބާސާއަށް އެންމެ އެދެވޭ ކުޅުމެއް ދެއްކިފައި ނުވާއިރު، މެޗު ފަށައިގެން ތިންވަނަ މިނެޓުގައި ބެންފީކާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑާވިން ނޫނޭޒެވެ. އަދި މެޗުގެ 69 ވަނަ މިނެޓުގައި ރަފާ ސިލްވާގެ ލަނޑުން ބެންފީކާއިން ލީޑު ފުޅާކުރިއިރު، މެޗުގެ 79 ވަނަ މިނެޓުގައި ލިބުނު ޕެނަލްޓީއަކުން ނޫނޭޒް ވަނީ ބެންފީކާގެ ތިންވަނަ ލަނޑު ޖަހައިދީފައެވެ.

ބާސާއިން މި މެޗުން ނިންމާލާފައިވަނީ އެއް ކުޅުންތެރިއަކު މަދުކޮށެވެ. އެއީ މެޗު ނިމެން ތިން މިނެޓަށް ވެފައި ވަނިކޮށް އެ ޓީމުގެ އެރިކް ގާސިއާއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެެވެ.

މި މެޗުން ބާސާ ބަލިވިއިރު، މި ގްރޫޕުގެ އަނެއް މެޗުން ބަޔާން ވަނީ އަމިއްލަ ދަނޑުގައި ކުޅެ ޑީނަމޯ ކިއޭވް އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެފައެވެ.

މި މެޗުގެ ފުރަތަމަ ހާފުގައި ރޮބަޓް ލެވަންޑޯސްކީ ވަނީ ދެ ލަނޑު ޖަހައި ބަޔާނަށް ރަނގަޅު ލީޑެއް ނަގައިދީފައެވެ. އަދި މެޗުގެ 68 ވަނަ މިނެޓުގައި ސާޖް ގްނަބްރީ ބަޔާނުގެ ތިންވަނަ ލަނޑު ޖަހައިދިންއިރު، އޭގެ ހަ މިނެޓު ފަހުން ބަޔާނުގެ ފަސްވަނަ ލަނޑު ކާމިޔާބުކޮށްދިނީ ލެރޯއި ސާނޭއެވެ. ދެން މި މެޗުގައި ބަޔާނުން ކާމިޔާބުކުރި ފަސްވަނަ ލަނޑު މެޗު ނިމެން ތިން މިނެޓަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެރިކް މެކްސިމް ޗޮޕޫ-މޯޓިންއެވެ.

މި ނަތީޖާތަކާއެކު ގްރޫޕް އީގެ އެއްވަނައިގައި ބަޔާން އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. ދެވަނައިގައި އޮތް ބެންފީކާއަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ޑީނަމޯ ކިއޭވަށް ވަނީ ދެ މެޗުން އެއް ޕޮއިންޓް ލިބިފައެވެ. އަދި ފުލުގައި އޮތް ބާސާއަށް ކުޅުނު ދެ މެޗުންވެސް ޕޮއިންޓެއް ލިބިފައެއް ނުވެއެވެ.