ރާއްޖެޓީވީ ރޯކޮށްލި މައްސަލައިގައި މީއާދުގެ މައްޗަށް އުފުލާފައިވާ ދައުވާގެ އަޑުއެހުން ކެންސަލް
މި މައްސަލައިގެ ޚުލާސާ ބަޔާން ވަނީ އިއްވާފައި
ރާއްޖެޓީވީ ރޯކޮށްލުމުގެ ދައުވާލިބޭ ހ. ގަސްވާ މުހައްމަދު މީއާދު
ރާއްޖެޓީވީގައި ރޯކޮށްލި މައްސަލައިގައި ޓެރަރިޒަމްގެ ދައުވާ އުފުލާފައިވާ ހ. ގަސްވާ މުޙައްމަދު މީޢާދުގެ މައްސަލައިގެ އަޑުއެހުން ކެންސަލްކޮށްފިއެވެ.
މި މައްސަލައިގެ އަޑުއެހުން ތާވަލުކޮށްފައި އޮތީ ބުދަ ދުވަހުގެ ހެނދުނު 10:00 އަށެވެ. ރާއްޖެއެމްވީއަށް މައުލޫމާތު ދެއްވަމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، އަޑުއެހުން ކެންސަލްވެފައިވަނީ ދިފާއީ ވަކީލުންނާއި މައްސަލަ ބައްލަވާ ގާޒީ އެހެން އަޑުއެހުމެއްގައި އިންނެވުމުގެ ސަބަބުން ކަމަށެވެ. އެގޮތުން މި މައްސަލަ ބައްލަވާ ގާޒީ އަލީ އާދަމް އޭރު އިންނެވީ ތ. ތިމަރަފުށިން ހައްޔަރުކުރި ހަރުކަށި ފިކުރުކަމަށް ބުނާ މީހުންގެ ޝަރީއަތުގެ އަޑުއެހުމުގައެވެ. 09:00ށް ތާވަލުކޮށްފައި އޮތް މި އަޑުއެހުން މީޢާދުގެ މައްސަލަ ތާވަަލުކޮށްފައިވާ ވަގުތު ޖެހުނު އިރުވެސް ނިމިފައި ނުވާތީ އަޑުއެހުން ކެންސަލް ކުރީއެވެ.
މީއާދުގެ މައްޗަށް ދައުވާކުރާ މައްސަލައިގައި މިހާރު ވަނީ ހެކިބަސް ނަގައި ޚުލާސާ ބަޔާން ވެސް އިއްވާފައެވެ.
މައްސަލައިގެ ޚުލާސާ ބަޔާން އިއްވަވަމުން ދައުލަތުގެ ވަކީލާ ވިދާޅުވީ، މީއާދު އިތުރު 5 މީހުންނާ ބައިވެރިވެގެން ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލާފައިވާ ކަމަށާއި، ދައުވާ އިއްވުމުން ދައުވާއަށް މީއާދު އިންކާރު ކޮށްފައިވާ ކަމަށެވެ. މައްސަލަ ސާބިތު ކުރުމަށް ޕީޖީ އޮފީހުން ވަނީ ޝަފަހީ ހެކިންނާއި ކިތާބީ ހެކިންގެ ހެކިބަސް ނަގާފައެވެ.
ޚުލާސާ ބަޔާން އިއްވަވަމުން ވަކީލު ވިދާޅުވީ، ރާއްޖެޓީވީ ރޯކޮށްލި މީހުންގެ ތެރޭގައި މީއާދު ހިމެނޭކަން ސިއްރު ހެކިވެރިންގެ ބަހުން އެނގޭ ކަމަށެވެ. އަދި އޭނާ މޫނުގައި މާސްކް އަޅަން ހުރިތަން ފެނުނު ކަމަށާއި، އޭނާ ބީކޭޓީ އިމާރާތަށް ވަދެގެން ދިޔަތަން ފެނުނުކަމަށް ވެސް ސިއްރު ހެކިންގެ ހެކިބަހުން އެނގޭކަމަށް ދައުލަތުގެ ވަކީލާ ވިދާޅުވިއެވެ. އޭގެ އިތުރުން، ރާއްޖެޓީވީ ރޯކޮށްލަން ބޭނުންކުރި ދަތް ދަގަނޑު ހިފައިގެން މީއާދުއާއެކު އިތުރު 5 މީހަކު އުޅުނުކަމަށް ވެސް ދައުލަތުގެ ވަކީލާ ވިދާޅުވިއެވެ.
ބަރުދަނުގައި 690ގުރާމް، ދިގުމިނުގައި 15.5އިންޗި، ވަށަމިނުގައި 2އިންޗި ހުރި އެއްކޮޅު ލަންބާފައިވާ މި ދަގަނޑު ގަނޑަކީ ރާއްޖެޓީވީ އިމާރާތުގެ ދަގަނޑުގޭޓުގެ ތަޅު ހަލާކު ކޮށްލައި، އެއަށްފަހު ލަކުޑި ގޭޓު ފުނޑާލައިގެން އެތެރެއަށް ވަނުމަށް ބޭނުންކުރި ހަތިޔާރެވެ. ރާއްޖެޓީވީގެ ސްޓޭޝަން ރޯކޮށް އަންދާލުމަށްފަހު އެކަންކުރި މީހުން އެތަނުން ނިކުމެގެން ދިޔައިރު އެމީހުން ހަތިޔާރުގެ ގޮތުގައި ބޭނުންކުރި މި ދަތްދަގަނޑު އޮތީ އެތަނުގެ އެތެރޭގައެވެ.
މި މައްސަލައިގެ ދައުވާލިބޭ މީއާދުގެ ފަރާތުން ޚުލާސާ ގޮތެއްގައި އޭނާގެ ވަކީލު ވަނީ ތަހުގީގު މަރުޙަލާގެ ތެރެއިން މީއާދަށް ލިބެންޖެހޭ ޙައްޤުތައް ކަށަވަރު ކޮށްދީފައިވާކަން ސާފުވާން ނެތްކަމަށް ބުނެފައެވެ. އަދި ތުހުމަތު ކުރެވޭ މީހަކަށް ޤާނޫނު އަސާސީން ލިބެންޖެހޭ ޙައްޤުތައް ލިއްބައިދީފައި ނުވާކަމަށް ވަކީލު ވިދާޅުވިއެވެ. ދިފާއުން ވަނީ މީއާދުގެ މައްޗަށް ކޮށްފައިވާ ދައުވާ ސާބިތުވާ މިންވަރަށް ހެކި ހުށައަޅާފައި ނެތްކަމަށް ބުނެފައެވެ.
މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމް ވަނީ މައްސަލައިގެ ޙުކުމަކަށްދާއިރު، ދެފަރާތުން ފާހަގަކުރި ކަންކަމަށް ރިއާޔަތް ކުރައްވާނެކަމަށް ވިދާޅުވެފައެވެ. ގާޒީ ވިދާޅުވީ ދެން މި މައްސަލައިގައި އޮންނާނީ ޙުކުމް ކުރެއްވުމަށް ބާއްވަވާ އަޑުއެހުމެއް ކަމަށެވެ.
