ތިމަރަފުށި ހަރުކަށި ފިކުރު: އެއީ ދީނާ ދެކޮޅު ބައެއްކަމަށް ދައުލަތުން ބުނުމުން ދިފާއުގެ ރުޅި

ތ. ތިމަރަފުށީގައި ހަރުކަށި ފިކުރުފަތުރާ، ހަމަލާދޭން އުޅުނު ކަމުގެ ތުހުމަތުކުރެވޭ މީހުންގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ހިމެނޭ މީހުންނަކީ ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފް އާއި، ތ. ތިމަރަފުށި، ކެނެރީގެ، ޢަލީ މުނީޒު އާއި ތ. ތިމަރަފުށި، އަސުރުމާގެ، މުޙައްމަދު އާޞިރު އާއި، ތ. ތިމަރަފުށި، އަސްރަފީވިލާ، އަޙްސަން މުޙައްމަދު އާއި، ރ. މަޑުއްވަރި، ބީޗްހައުސް ޢަބްދުﷲ ޢިމާދު އާއި، ތ. ތިމަރަފުށި، ސައިމާ، ޝަމާޚު ޝަރީފް އާއި، ނ. ކުޑަފަރި، ރޯޒްމީޑު، އިބްރާހިމް ލޫޠު، އަދި ރ. ކަނދޮޅުދޫ، ފެހިވިލާ، ޢަލީ އަރުހަމް މުޙައްމަދުއެވެ.

މައްސަލައިގެ ޚުލާސާއެއް:

އެމީހުންގެ މައްޗަށްދައުވާއުފުލާފައިވަނީ، ތިމަރަފުށީގައި ދީނުގެ ނަމުގައި ޓެރަރިސްޓް ޖަމާޢަތްތަކަށް ތާޢީދުކޮށް ޓެރަރިޒަމަށް ހިތްވަރުދީ ޓެރެރިސްޓް ޖަމާޢަތްތަކުގެ ޢަމަލުތަކަކީ ސަބަބުވެރި ޢަމަލުތަކެއްކަމަށް ދައްކައި ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތުގެ އިރުޝާދުގެ ދަށުން ދިވެހިރާއްޖޭގައި ޓެރަރިޒަމްގެ ޢަމަލުތައްކުރުމަށް ރާވައި އެކަމަށް ހިތްވަރުދިނުމެވެ. އަދި ތިމަރަފުށީގައި ހަރަކާތްތެރިވާ ދީނީ ހަރުކަށި ފިކުރުގެ އިސްފަރާތްތަކުން އޮޕަރޭޓްކުރާ "ނަސާޙް 3" ދޯނި ތެރޭގައި އިމްޕްރޮވައިޒްޑް އެކްސްޕްލޯސިވް ޑިވައިސް (އައި.އީ.ޑީ)އެއް ތައްޔާރުކުރުމަށްފަހު އައި.އީ.ޑީ ގޮއްވާލައި ދިވެހިރާއްޖޭގެ ޤައުމީ ސަލާމަތަށް ނުރައްކަލެއް ކުރިމަތިކުރުވުމަށް ތައްޔާރީތައްވަމުން ދިއުމުގެ ތުހުމަތު ވެސް އެމީހުންގެ މައްޗަށް ކުރެވެއެވެ.

މީގެއިތުރުން، ދަތުރު ދިއުމުގެ ނަމުގައި ފަޅުރަށްރަށަށް ގޮސް ހަނގުރާމައިގެ އެކި އުކުޅުތައް ދަސްކޮށް، ތަމްރީންތައް ހަދަމުންދިއުމާއި، ތިމަރަފުށީގައި ދީނުގެ ނަމުގައި ހަރުކަށި ފިރުކު ފެތުރުމުގެ ގޮތުން އެރަށުގެ ބައެއް ގޭގޭގައި ހަރުކަށި ފިކުރުތަކަށް ހިތްވަރުލިބޭފަދަ ކްލާސްތައް ހިންގައި، ތިމަރަފުށީގައި ދިރިއުޅޭ ކުޑަކުދިންނަށް އަމާޒުކޮށްގެން އެކުދިން ހަރުކަށި ފިކުރަށް ލެންބުވުމަށް މަސައްކަތްކޮށްފައިވާ ކަމަށް ވެސް އެމީހުންގެ މައްޗަށް ތުހުމަތު ކުރެވެއެވެ.

ސަރުކާރުން މިސްކިތްތަކަށް ކަނޑައަޅުއްވާފައިވާ އިމާމުންގެ ފަހަތުގައި ނަމާދު ނުކޮށް ވަކި ޖަމާޢަތް ހަދައިގެން ނަމާދުކުރަމުން ދިއުމާއި ހަރުކަށި ފިރުކުރުގެ މީހުންނާ ގުޅުން އޮންނަ މީހުންނަށް މާލީ އެހީތެރިކަން ފޯރުކޮށްދެމުންދާ ކަމުގެ ތުހުމަތު ވެސް އެ މީހުންގެ މައްޗަށް ކުރެއެވެ.

ބުދަ ދުވަހުގެ އަޑުއެހުން:

ބުދަ ދުވަހުގެ އަޑުއެހުމުގައި ވަނީ ދައުވާލިބޭ 8 މީހުންގެ ބަންދު މުރާޖައާ ބައި ކުރިއަށް ގެންގޮސްފައެވެ. އެގޮތުން ދައުވާލިބޭ އެންމެންގެ މައްޗަށްވެސް މައްސަލަ ސާބިތު ކުރެވޭ މިންވަރަށް ހެކި ލިބިފައިވާކަން ފާހަގަ ކުރައްވައި ދައުލަތުގެ ވަކީލު ވަނީ އެމީހުންގެ ބަންދުގެ މުއްދަތު ދަމަހައްޓަންޖެހޭ ސަބަބުތައް ހުރިކަމަށް ވިދާޅުވެފައެވެ. ދައުލަތުގެ ވަކީލާ ވިދާޅުވީ، އެމީހުންނަކީ މުޖުތަމައުގެ ސަލާމަތަށް ހުރި ނުރައްކަލެއް ކަމަށާއި، ޝަރީއަތް ކުރުމާބެހޭ ޖިނާއީ އިޖުރާއަތުގެ ޤަވާއިދުގައި ބަޔާންކުރާ ގިނަ ސަބަބުތައް ހުރިކަން ވަކީލު ފާހަގަ ކުރެއްވިއެވެ.

އޭގެ އިތުރުން، އެމީހުންނަކީ އެތައް ބައެއްގެ ފުރާނަ ނުރައްކަލަށް ހުށައެޅުމަށް މަސައްކަތްކުރި ބައެއްކަމަށާއި، އެމީހުންނަކީ އިސްލާމް ދީނާ ދެކޮޅު މީހުންކަމަށްވެސް ދައުލަތުން ބުނެފައިވެއެވެ. އަދި އެމީހުން މުޖުތަމައުގެ ތެރެއަށް ދޫކޮށްފިނަމަ، ދީނީ އެއްބައިވަންތަކަން ރޫޅި، މުޅި މުޖުތަމައަށްވެސް ނުރައްކަލަކަށް ވެދާނެކަން ބަޔާންކުރައްވާފައެވެ. ވަކީލު ވިދާޅުވީ، މި މައްސަލައިގައި ގިނަ ސިއްރު ހެކިން ހުށައަޅާފައިވާނެ ކަމަށާއި، ހެކިންނަށް ނުފޫޒު ފޯރުވުމުގެ އިހްތިމާލު ބޮޑު ކަމަށެވެ.

މި މައްސަލައިގެ ދިފާއީ ވަކީލުން ވަނީ އެމީހުންނަކީ އިސްލާމް ދީނާ ދެކޮޅު މީހުންކަމަށް ދޭހަވާ މޭރުމުން ދައުލަތުން ވާހަކަ ދައްކަވާފައިވާކަން ފާހަގަ ކުރައްވައި، އެކަން ކުށްވެރި ކުރައްވާފައެވެ. ވަކިން ޚާއްސަކޮށް އެމީހުން ޤުރުއާނުގެ އާޔަތްތަކަށް ނުވަތަ ސުންނަތަށް ދެކޮޅު ނުހަދާ ކަމަށާއި، ދީނީ ގޮތުން ހިޔާލުތަފާތުވާ އިތުރު ކަންކަން ހުރުމަކީ ދީނާ ދެކޮޅު ބައެއް ކަމަށް ބުނުމަކީ ޤަބޫލު ކުރެވޭ ކަމެއް ނޫންކަން ދިފާއީ ވަކީލުން ފާހަގަކުރެއްވިއެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، އެމީހުންނަކީ މުސްލިމުން ނޫންކަމަށް ވިދާޅުވެފައި ނުވާނެ ކަމަށާއި، ވިދާޅުވެފައިވާނީ ލިބިފައިވާ ހެކިތަކާއި މީހުންގެ ހެކިބަހަށް ބަލާއިރު، އެމީހުންނަކީ އިސްލާމީ އުސޫލުތަކާއި އިދިކޮޅަށް އުޅޭ ބައެއް ކަމުގެ ވާހަކަ ކަމަށެވެ. އެހެންނަމަވެސް މައްސަލަ ބައްލަވާ ގާޒީ އަލީ އާދަމްވެސް ވަނީ އެއްވެސް މީހަކަށް އެބީދައިން "އިސްލާމް ދީނާ ދެކޮޅު ބައެއް" ކަމަށް ވިދާޅު ނުވެވޭނެކަން ފާހަގަކުރައްވާފައެވެ.

އޭގެ އިތުރުން، ޝަރީއަތުން ވަނީ އެމީހުންގެ ޝަރީއަތް ނިމެންދެން ބަންދު ކުރުމަށް ނިންމަވާފައިވާ ނިންމުން ދަމަހައްޓަވާފައެވެ.