ޕީއެސްޖީގެ މޮޅުވުމުގެ ސިލްސިލާ ކުރިއަށް

ފްރެންޗް ލީގުގައި ހޮނިހިރު ދުވަހުގެރޭ ކުޅުނު މެޗުން މޮންޕެލިއޭ ބަލިކޮށް، ޕީއެސްޖީން ލީގުގައި ސައްތައިން ސައްތަ ރިކޯޑު ދަމަހައްޓައިފިއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ 2-0 ގެ ނަތީޖާއަކުންނެވެ.

މި މެޗުގައިވެސް ވާތު ކަކުލަށް ލިބުނު އަނިޔާއާ ގުޅިގެން އާޖެންޓީނާގެ ތަރި ލިއޮނެލް މެސީ ކުޅެފައެއް ނުވެއެވެ. މީގެ ކުރިން މިދިޔަ ބުދަ ދުވަހުގެރޭ މެޓްޒް އަތުން ޕީއެސްޖީ މޮޅުވި މެޗުގައިވެސް މެސީ ކުޅެފައި ނުވާއިރު، މި ހަފުތާގައި ޔުއެފާ ޗެމްޕިއަންސް ލީގުގައި މެންޗެސްޓާ ސިޓީއާ ދެކޮޅަށް ޕީއެސްޖީން ކުޅޭ މެޗަށްވެސް އޭނާ ފިޓުވާނެކަމާމެދު ވަނީ ސުވާލު އުފެދިފައެވެ.

 ހޮނިހިރު ދުވަހުގެރޭ ކުޅުނު މެޗުގައި ޕީއެސްޖީން މޮޅު ކުޅުމެއް ދެއްކިއިރު، މެޗު ފަށައިގެން 14 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އިދުރީސާ ގާނާ ގޭއެވެ. އޭގެ ފަހުން ފުރަތަމަ ހާފު ނިމުމުގެ ކުރިން ލީޑު ފުޅާކުރަން ޕީއެސްޖީގެ އަންޑަ ހެރޭރާއަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.

މި މެޗުގެ ދެވަނަ ހާފުގައިވެސް ޕީއެސްޖީން ގިނަ ހަމަލާތަކެއް އުފެއްދިއިރު، އެ ޓީމުގެ އިދުރީސާ ގާނާ ގޭ އާއި ނޭމާއަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އެކަމަކު މެޗު ނިމެން ދެ މިނެޓަށް ވެފައި ވަނިކޮށް ޖޫލިއަން ޑްރެކްސްލާ ވަނީ ލަނޑެއް ޖަހައި، ޕީއެސްޖީގެ ލީޑު ފުޅާކޮށްދީފައެވެ.

މި މޮޅާއެކު ޕީއެސްޖީ ވަނީ ލީގުގައި މިހާތަނަށް ކުޅުނު އަށް މެޗުންވެސް މޮޅުވެފައެވެ. އެއާއެކު ކުޅުނު އަށް މެޗުން ލިބުނު 24 ޕޮއިންޓާއެކު ޕީއެސްޖީ ތާވަލުގެ އެއްވަނައިގައި އޮތްއިރު، ދެވަނައިގައި އޮތީ ހަ މެޗުން 14 ޕޮއިންޓް ލިބިފައިވާ މާސޭއެވެ. އަދި ޕީއެސްޖީ އަތުން ބަލިވި މޮންޕެލިއޭ އޮތީ ތާވަލުގެ 11 ވަނައިގަައި އަށް މެޗުން ނުވަ ޕޮއިންޓާއެކުއެވެ.